கொழுப்பை கட்டுப்படுத்தும் கவுனி!
கருப்பு அரிசி என்றால் தமிழில் இன்னொரு பெயர் உள்ளது. அதுதான் ‘கருப்பு கவுனி அரிசி.’ அதிக சத்துக்களும், நோய் எதிர்ப்பு சக்தி நிறைந்தது. இந்த அரிசியின் சத்துக்களின் ரகசியம் தெரிந்ததால் அரசர்களும், மந்திரிகளும் மட்டுமே இதனை பயன்படுத்தி வந்தனர்.
கருப்பு கவுனி அரிசியின் சிறப்பு நாம் தினமும் பயன்படுத்தும் வெள்ளை அரிசி, பழுப்பு அரிசியைவிட அதிகச் சத்துக்களைக் கொண்டது கருப்பு அரிசி எனப்படும் கவுனி அரிசி. ஆசிய நாடுகளில் ஆயிரக்கணக்கான ஆண்டுகளாகக் கவுனி அரிசி பயன்படுத்தப்படுகிறது. மற்ற அரிசி வகைகளுடன் ஒப்பிடுகையில் மிகக்குறைந்த அளவே கவுனி அரிசி பயிரிடப்
படுகிறது.
பண்டைய காலங்களில் தென்னிந்தியாவில் செட்டிநாடு சமுதாயம் மட்டுமே இந்தக் கவுனி அரிசியைப் பரவலாகப் பயன்படுத்தியது. இன்றும்கூட, செட்டிநாடு திருமணங்களில் கவுனி அரிசியில் செய்யப்பட்ட ஓர் இனிப்பு வகை இடம் பெறுவது வழக்கமாக இருந்து வருகிறது. இதன் சிறப்பைப் புரிந்து கொண்ட அமெரிக்கா, ஆஸ்திரேலியா மற்றும் ஐரோப்பா நாடுகள் அண்மைக்காலமாக இந்த அரிசியைப் பரவலாகப் பயன் படுத்தத் தொடங்கியுள்ளன.
அரசர்களின் அரிசி சீனாவில் இந்த அரிசியை ‘தடை செய்யப்பட்ட அரிசி’ என்கிறார்கள். அதற்கு ஒரு வரலாற்றுக் காரணம் உண்டு. மிகுந்த மருத்துவ குணங்களைக் கொண்ட இந்த அரிசியை பண்டைய சீனாவில் அரசர்கள் மட்டுமே பயன்படுத்தி வந்தார்கள். ஒரு காலக்கட்டத்தில் இதன் மகத்துவத்தை அறிந்து மக்களும் பயன்படுத்தத் தொடங்க, அரிசிக்குத் தட்டுப்பாடு ஏற்பட்டது. இதையடுத்து, பொதுமக்கள் இந்த அரிசியைப் பயன்படுத்தத்தடை விதிக்கப்பட்டது. அதனால், இன்று வரை சீனாவில் தடை செய்யப்பட்ட அரிசி என்றே இதை அழைக்கிறார்கள்.
கவுனி அரிசியின் தனிச்சிறப்பே அதன் கருப்பு நிறம்தான். கருப்பு நிறத்துக்குக் காரணமாக இருப்பது ‘ஆன்தோசயானின்’ என்னும் நிறமி. திராட்சை வகைகள், கத்தரிக்காய், ஊதா முட்டைகோஸ், மாதுளை, கருப்பு பீன்ஸ் போன்று இந்த அரிசியும் ‘ஆன்தோசயானின்’ நிறமியைக் கொண்டுள்ளது.
இந்த நிறமிகள், இதயம், மூளை மற்றும் ரத்தக் குழாய்களின் செயல்பாடுகளையும், ஆரோக்கியத்தையும் மேம்படுத்துகின்றன. வெள்ளை நிற அரிசி, பழுப்பு நிற அரிசியோடு ஒப்பிடுகையில், கவுனி அரிசி கொஞ்சம் குறைவான மாவுச்சத்தையும் அதிகமான புரதம், இரும்புச்சத்தையும் கொண்டுள்ளது.
கவுனி அரிசியில் வைட்டமின் இ உள்ளதால் கண் மற்றும் சரும ஆரோக்கியத்துக்கு நல்லது. தவிர நோய் எதிர்ப்பு சக்தியும் நிறைந்துள்ளது.இந்த அரிசியில் சக்தி வாய்ந்த ஆன்டி ஆக்ஸிடெண்ட்ஸ் இருக்கிறது. நீரிழிவு, புற்றுநோய், இதய நோய் மற்றும் எடை அதிகரிப்பு போன்ற பிரச்னைகளிலிருந்து ஆன்டி ஆக்ஸிடெண்ட்ஸ் நம்மைக் காப்பாற்றுகிறது. கவுனி அரிசியில் உள்ள நார்ச்சத்து, உணவுக்குப்பின் ரத்தத்தில் சர்க்கரையின் அளவு உயராமல், சீராக இருக்க உதவுகிறது. மலச்சிக்கல், செரிமானப் பிரச்னைகள், வாய்வு, வயிற்று வீக்கம், வயிற்றுவலி போன்ற பிரச்னைகளுக்கும் இந்த அரிசி மிகச்சிறந்த தீர்வாக இருக்கிறது.
கருப்பு கவுனி அரிசியின் வெளிப்புற அடுக்கில், அதிக அளவில் ‘ஆன்தோசயானின்’ நிறமி காணப்படுகிறது. இது ரத்த நாளங்களில் படியும் கொலஸ்ட்ராலைக் கட்டுப்படுத்துகிறது. தவிர, நல்ல கொலஸ்ட்ராலின் அளவை உயர்த்தி, கெட்ட கொலஸ்ட்ராலின் அளவைக் கட்டுப்படுத்தவும் செய்கிறது.
ரத்த நாளங்கள் முதிர்ச்சி அடையாமல் பாதுகாத்து இதய ஆரோக்கியத்தைத் தக்க வைக்கிறது. நச்சுப் பொருள்கள் உடலில் சேர்வதே பல்வேறு நோய்களுக்குக் காரணம். கவுனி அரிசியில் காணப்படும் ‘பைட்டோ நியூட்ரியன்ட்ஸ்’ (Phytonutrients), உடலுக்குத் தீங்கு விளைவிக்கும் நச்சுகள், கல்லீரல், ரத்த நாளங்கள், பெருங்குடல் ஆகியவற்றில் குவியாதவாறு தடுக்கிறது.
கருப்பு கவுனி அரிசியும், பழுப்பு அரிசியை போன்ற சுவையைக் கொண்டதுதான். சமைக்க அதிக நேரம் எடுக்கும். ஒரு மணி நேரம் ஊற வைத்துச் சமைத்தால் எளிதாக இருக்கும். உணவும் மென்மையாக இருக்கும். கவுனி அரிசியின் முழுப்பயன்களும் அதன் மேல்பகுதியில் ஒட்டியிருக்கும் தவிட்டில்தான் இருக்கிறது. அதனால் வாங்கும்போதே முழுக்கவுனி அரிசியா என்று பார்த்து வாங்க வேண்டும். இதில் இனிப்பு பொங்கல், பாயசம், சாதம், கஞ்சி, இட்லி மற்றும் தோசை, புட்டு, பணியாரம் என சமைத்து சாப்பிடலாம்.
கருப்பு கவுனியின் பயன்கள்
*உணவுக்குழாய் புற்றுநோயிலிருந்து பாதுகாக்கிறது.
*உயிர்வளியேற்ற எதிர்ப்புப் பொருள் நிறைந்துள்ளது.
*நாட்பட்ட நோய்களாகிய சர்க்கரை, புற்றுநோய், இதயக்கோளாறு போன்றவற்றிலிருந்து பாதுகாக்கிறது.
*தேவையற்ற கொழுப்புக்களை கட்டுப்படுத்துகிறது.
*நார்ச்சத்து மற்றும் இரும்புச்சத்து நிறைந்தது.
*விட்டமின் பி, ஈ நிறைந்தது.
எஸ்.மேரி ரஞ்சிதம்
|