தினமும் மக்கள் ஆக்சிஜனும், மருத்துவமனை படுக்கைகளையும் தேடிவரும் நிலையில், சென்னையைச் சேர்ந்த சீதா தேவி என்ற தன்னார்வலர், ஒரு ஆட்டோவையே அவசர ஆக்சிஜன் ஆம்புலன்ஸாக மாற்றியுள்ளார்.சீதா தேவி, ஸ்ட்ரீட் விஷன் என்ற தன்னார்வ தொண்டு நிறுவனத்தை நடத்தி வருகிறார். கடந்த மாதம் மே 1 அன்று சீதாதேவியின் தாயாருக்கு கொரோனா தொற்று ஏற்பட்டு, படுக்கை கிடைக்காமல் அவர் உயிருக்குப் போராடிய நிலையில் குடும்பமே தவித்துள்ளனர்.

மருத்துவமனையின் வெளியே பல மணி நேரம் ஆக்சிஜன் படுக்கைக்காகக் காத்துக்கிடந்துள்ளனர். ‘‘என் அம்மாவிற்கு என்னையும் சேர்த்து ஆறு பிள்ளைகள். இத்தனை பேர் இருந்தும் என் அம்மாவைத் தனியாக மருத்துவமனையின் வாசலில் இறக்கவிடக்கூடாது என நானும் என் சகோதர, சகோதரிகளும் சேர்ந்து என் அம்மாவிற்காக ஒரு படுக்கை கிடைக்க போராடினோம். கடைசியாக ஸ்டான்லி மருத்துவமனையில் அனுமதி கிடைத்தும், உரிய நேரத்தில் ஆக்சிஜன் கிடைக்காததால், படுக்கை கிடைத்த ஐந்தே மணி நேரத்தில் அவரது உயிர் பிரிந்தது.