ஒரு நாள் ஏதோ ஒரு காரணத்தினால் எங்கிருந்தோ வரும் உணவு நிறுத்தப்படலாம். வாகனங்கள் ஓடுவதும், கப்பல்கள் மிதப்பதும், விமானங்கள் பறப்பதும் கூட நிறுத்தப்படலாம்.

ஆனால் உனக்கான உணவை, நீ உற்பத்தி செய்ய பழகியிருந்தால், இதையெல்லாம் எண்ணி நீ அஞ்ச வேண்டியதில்லை என்று வேளாண் விஞ்ஞானி நம்மாழ்வார் கூறியது தற்போதைய சூழ்நிலைக்கு சரியாக பொருந்துகிறது. அவர் சொன்னதை தனக்காக மாற்றி அமைத்துள்ளார் சென்னை புரசைவாக்கத்தை சேர்ந்த 72 வயது நிரம்பிய அம்ருதா குமாரி.

பொதுவாக நாம் மொட்டை மாடியினை துணிகளை காயப் போடுவதற்கு மட்டுமே பயன்படுத்தி வருகிறோம். ஆனால் அம்ருதா குமாரியோ அந்த இடத்தையும் மிகவும் பயனுள்ளதாக மாற்றி ஒரு மினி தோட்டத்தையே அங்கு பராமரித்து வருகிறார்.அவரின் மொட்டைமாடிக்கு சென்றால், அங்கு வண்ண வண்ண மலர்கள் பூத்துக் குலுங்கி இருப்பதை பார்க்கும் போதே நம் விழித்திரைக்குள் ஒரு குளிர்ந்த காற்று வீசியது போன்ற உணர்வு ஏற்படுகிறது.

அதிலும் குறிப்பாக வித்தியாசமான வண்ணங்களில் அல்லி மலர்களை பார்க்கும் போது, இது மொட்டை மாடியிலும் வளர்க்கலாமா என்ற ஆச்சரியம் நம்மைக் கவ்விக் கொள்கிறது. இதை ரசித்துக் கொண்டு இருக்கிற நேரத்தில் அம்ருதா... தன் உதவியாளரிடம்... தக்காளிச் செடிக்கு ஜீவாமிர்தம் போடு... அல்லி மலர் பூத்து இருக்கிறதா என்று வினவிக் கொண்டு இருந்தார்.