அதிகாரப்பூர்வ கையொப்பம் தொடங்கி ஆகப்பெரும் சிந்தனைகளை வெளிப்படுத்துவது வரை பேனா முனை இன்றியமையாதது. இந்த நவீன காலத்தில் எழுதுவதற்கென்று எத்தனையோ டிஜிட்டல் வசதிகள் வந்துவிட்டாலும் இப்போதும் எப்போதும் பேனாவின் மவுசு குறைவதில்லை. 

அதே குறையாத மவுசுடன் சென்னை அடையாரில் மார்ச் 7, 8 மற்றும் 9 ஆகிய தேதிகளில் மிகச் சிறப்பாக நடந்தேறியது சென்னை பென் ஷோ. சென்னை வாசிகள் மட்டுமின்றி பல்வேறு நகரங்கள், மாநிலங்கள், நாடுகளை சேர்ந்தவர்களும் கூட பங்கேற்ற இந்தக் கண்காட்சியில் பல்வேறு வகையான பேனாக்கள், மைகள், நோட்டுப்புத்தகங்கள் போன்றவை கவனம் ஈர்த்தன.

உலகின் மிகப்பெரிய பென் ஷோவாக கருதப்படும் இந்த நிகழ்வில் 150க்கும் மேற்பட்ட இந்திய மற்றும் சர்வதேச அளவிலான பேனா உற்பத்தியாளர்கள் பங்கேற்றனர். சிலர் தங்களது தனித்துவமான பேனாக்கள் பற்றியும் அனுபவங்களையும் பகிர்ந்து கொண்டனர்.  “நாங்க திருவள்ளூர்லருந்து வந்திருக்கோம். 

ரங்கா பென்ஸ் என்றாலே உலகம் முழுவதும் பிரபலம்தான். தொடர்ந்து 60 ஆண்டுகளாக பேனா உற்பத்தியில் சிறந்து விளங்கி வருகிறோம். 100க்கும் மேற்பட்ட நாடுகளுக்கு பல்வேறு வகையான பேனாக்களை ஏற்றுமதி செய்கிறோம். பலவகையான பேனாக்களை நாங்க உற்பத்தி செய்து வந்தாலும் எபோனைட் பேனாக்கள் தயாரிப்பில் எல்லோராலும் அறியப்படுகிறோம்.

தைவானிலிருந்து வந்திருந்த இங்க் இன்ஸ்டிட்யூட் எனும் ப்ராண்ட் அதிக கவனத்தை ஈர்த்தது. மரத்தினால் நேர்த்தியாக செய்யப்பட்ட இங்க்கில் தோய்த்து எழுதக்கூடிய கேலியோகிராஃபி பேனாக்களை கொண்டு பலரும் எழுதிப் பார்த்தனர். பேனாவை சுற்றிலும் ஒரு பாம்பு பின்னியிருப்பது போன்று வடிவமைக்கப்பட்ட பேனாவை பார்வையாளர்கள் வியந்து பார்த்துக் கொண்டிருந்தனர்.

பேனாவில் காணப்படும் பாம்பு போன்ற வடிவம் வெள்ளியில் செய்யப்பட்டது என்பது குறிப்பிடத்தக்கது. பல வித்தியாசமான பேனாக்களை வைத்திருந்தாலும், ப்ராண்டின் அடையாளமாக இருந்த இங்க் வகைகள் பயன்படுத்த வேண்டுமென்கிற ஆர்வத்தை தூண்டும் வகையில் இருந்தன. லில்லி மலர்களின் நிறங்களிலும், அந்நாட்டின் சோடியாக் குறியீடுகளின் அடிப்படையில் தயாரிக்கப்பட்ட பேனா மைகளும் வைக்கப்பட்டிருந்தன.

“ரெட் ஸ்னேக் விஷமற்றது, அது புனிதமான ஒரு பிரகாசமான நிறம் கொண்டது. இந்த இங்க் நிறமும் அப்படித்தான். இதை பயன்படுத்தும் போது பிரகாசமான ஒரு உணர்வை தருவதாக இருக்கும்” என அவற்றை காட்சிப்படுத்தியிருந்த நபர் விளக்கினார். 

தவிர, 9 கேரட் தங்கத்தால் ஆன நான்கு ஷேட்களை கொண்ட ஒரே பேனா, 25 லட்சம் மதிப்புள்ள 800 வைரக்கற்கள் பதிக்கப்பட்ட வைர பேனா போன்றவையும் பார்வையாளர்களை வெகுவாக கவர்ந்தன. சென்னை பென் ஷோவை நடத்திய இந்நிகழ்ச்சியின் ஒருங்கிணைப்பாளரும் எண்ட்லெஸ் ப்ராண்டின் இணை நிறுவனருமான தீரஜ் நந்தூரி உடன் பேசியதில்...

நிறைய சிறுவர்களும் விரும்பி பேனாக்களை வாங்கினர். பொதுவாக சென்னையில் ஏகப்பட்ட பேனா பிரியர்கள் உள்ளனர். ஆனால் பெரும்பாலும் ஆன்லைன் மூலமாகவும் விற்பனையாளர்கள், இடைத்தரகர்கள் மூலமும் தங்களுக்கு விருப்பமான ப்ராண்ட் பேனாக்களை வாங்கியிருப்பார்கள். இந்த காண்காட்சியின் போது ப்ராண்ட் நிறுவனர்களும் உற்பத்தியாளர்களும் நேரடியாக வந்திருந்ததால், வாடிக்கையாளர்களுடன் நேரில் சந்தித்து உரையாட முடிந்தது. 

‘‘இத்தனை வருடங்களுக்கு முன் உங்ககிட்டருந்துதான் ஆர்டர் செய்து பேனா வாங்கினேன், உங்க ப்ராண்ட் பேனாக்கள் எனக்கு மிகவும் பிடிக்கும்” என சந்தோஷமாக உரையாடும் அளவிற்கு வாடிக்கையாளர்களுக்கும் உற்பத்தியாளர்களுக்கும் அந்த வாய்ப்பினை ஏற்படுத்திக் கொடுத்தது பெருமையாக உள்ளது. தவிர, இங்கு நடத்தப்பட்ட கேலியோகிராஃபி ஒர்க் ஷாப்பிலும் ஆர்வமுள்ளவர்கள் பலரும் கலந்து கொண்டனர்.