நம் அனைவருக்குமே எதிர்காலம் பற்றிய யோசனை சிறுவயதில் இருந்தே இருக்கும். டாக்டராக வேண்டும், ஆசிரியராக வேண்டும், பைலட் ஆக வேண்டும் என பள்ளிப் பருவத்தில் இருந்தே நாம் நமக்குள் ஒரு ஆசை வைத்திருப்போம். ஆனால், சென்னை, கீழ்ப்பாக்கத்தில் ‘பாஸ்ட்ரீ மேனியா’ எனும் கஃபேயை நடத்திவரும் மோனிஷாவிற்கு, தான் கேக் தயாரித்து அனைவருக்கும் கொடுக்க வேண்டும் என்பதுதான் ஆசையாக இருந்துள்ளது. 

பேக்கிங் தொழிலில் எப்படியாவது சாதித்துக்காட்ட வேண்டும். இதுதான் அவரது சிறுவயது ஆசை, கனவு எல்லாம். அந்தக் கனவை எப்படி சாத்தியமாக்கினார் என்பது பற்றி அவரிடம் கேட்டபோது சிரித்தபடியே தனது பேச்சைத் தொடங்கினார் மோனிஷா. ‘‘சென்னைதான் எனது பூர்வீகம்.

பிறந்தது, வளர்ந்தது, கல்லூரி படிப்பு என அனைத்துமே சென்னையில்தான். சிறுவயதில் இருந்தே எனக்கு கேக் செய்வதில் அதிக ஆர்வம். எப்படியாவது கேக் செய்து நண்பர்கள், உறவினர்கள் என அனைவருக்கும் கொடுக்க வேண்டும் என்று நினைத்து நானே வீட்டில் இருந்தபடி கேக் செய்யக் கற்றுக் கொண்டேன். 

கேக் செய்வதற்காக எந்தப் பயிற்சி வகுப்புக்கும் செல்லவில்லை. புத்தகத்தைப் படித்தும் யூடியூப்பில் வீடியோஸ் பார்த்தும்தான் கேக் எப்படி செய்ய வேண்டும் எனக் கத்துக்கிட்டேன்’’ எனக் கூறிய மோனிஷா மேலும் தொடர்ந்தார்.

‘‘முதன்முதலில் வீட்டிலே கேக் செய்து எனது நண்பர்கள் மற்றும் உறவினர்களுக்கு கொடுத்தேன். அனைவருக்கும் நான் செய்த கேக் பிடித்துப்போனது. வீட்டில் உள்ளவர்களுக்கும் எனது கேக் மிகவும் பிடித்துப்போகவே கேக் செய்து விற்பனை செய்யலாம் என முடிவு செய்தேன். 

ஆரம்பத்தில் இந்தத் தொழிலை தொடங்குவதற்காக அம்மாவிடம் ஐந்தாயிரம் வாங்கினேன். அதுதான் எனது தொழிலுக்கு அடித்தளம். கல்லூரி படிக்கும் போதே வீட்டில் இருந்தபடி கேக் ஆர்டர்ஸ் வாங்கி விற்பனை செய்வது, கல்லூரியில் நண்பர்களுக்கு கேக் வேண்டுமென்றால் அவர்களுக்கு  செய்து கொடுப்பது என தொடர்ந்து எனது பேக்கிங் தொழிலை அடுத்த அளவிற்கு எடுத்துச் சென்றேன்.

அதன்பிறகு, தனியாக கிளவுட் கிச்சன் தயார் செய்து அங்கிருந்து கேக்குகளை டெலிவரி செய்து வந்தேன். இப்போது தனியாக கீழ்ப்பாக்கத்தில் கஃபே ஒன்று நடத்தி வருகிறேன். கேக் டெலிவரி செய்யும் போது வாரத்திற்கு ஒருமுறை பாஸ்தா செய்து விற்பனை செய்தேன். 

வாடிக்கையாளர்களிடம் பாஸ்தாவிற்கு நல்ல வரவேற்பு இருந்தது. அதைத் தொடர்ந்து பாஸ்தா, பீட்சா என கொடுத்து வருகிறேன். அனைவருக்குமே நான் செய்கிற உணவுகள் பிடித்துப்போகவே பலவகையான கேக்ஸ் மற்றும் இன்னும் பல உணவுகளை கஃபேயில் அறிமுகம் செய்தேன்’’ என்றவர் கஃபே பற்றி விவரித்தார்.

‘‘எங்கள் கஃபேயை பற்றிச் சொல்லவேண்டுமென்றால் வாடிக்கையாளர்களுக்கு எந்த உணவு எந்த சுவையில் வேண்டுமோ அவர்கள் எந்த மாதிரி சாப்பிட நினைக்கிறார்களோ அந்த சுவையில் நாங்கள் செய்து கொடுக்கிறோம். அதுபோக, நமது கஃபேயில் ட்ரெண்டிங்கில் இருக்கும் எல்லா வகையான கேக்குகளுமே கிடைக்கும். 

சமீபத்தில் நடிகை ஆலியாபட் லண்டனில் கிடைக்கும் மில்க் கேக் தனக்கு பிடிக்கும் என்று கூறியிருந்தார். அந்த கேக் தமிழகத்திலும் ட்ரெண்டானது. அந்த மில்க் கேக்கும் நமது கஃபேயில் கிடைக்கும். அதேபோல, அரேபியன் கேக், பலருக்கு பிடித்த ஜார் கேக் இங்கு ஃபேமஸ். தனித்துவமான சுவையில் கேக் தயாரித்து அதனை காஃபி கப்பில் ஃப்ரீஸ் செய்து கொடுப்பது தான் ஜார் கேக்.