ஃபேஷன் ஒரு சக்கரம் போன்றது. அந்தந்த காலத்திற்கு ஏற்ப மாறிக் கொண்டே இருக்கும். ஒரு காலத்தில் பழைய டிரெண்ட் என்று சொன்னவை இப்போது லேட்டஸ்ட் டிரெண்டாக மாறிவருகிறது. அதை மக்களின் விருப்பத்திற்கு ஏற்ப மாற்றி அமைத்து வருகிறார்கள் இன்றைய ஃபேஷன் கலைஞர்கள்.

அந்த வரிசையில் சென்னையின் பிரபல சலூனான ‘வர்வ்’ ரெட்ரோ கலெக்‌ஷனை அறிமுகம் செய்துள்ளது. இதன் நிறுவனர்களான மனோஜ், ரெபேக்கா மற்றும் சுஷீல் இந்த வருடம் ‘டைம்லெஸ்’ என்ற பெயரில் புதுவித ரெட்ரோ ஹேர்ஸ்டைலினை அறிமுகம் செய்துள்ளனர். தங்களின் புது அறிமுகம் குறித்து பேசினார் மனோஜ்.

‘‘வர்வ் ஆரம்பிச்சு பத்து வருஷமாகுது. இது எங்களின் பத்தாவது ஆண்டு. நானும் என் மனைவி ரெபேக்காவும் ஐ.டி துறையை சேர்ந்தவங்க. எங்களின் முதல் மகன் பிறந்த போது, ரெபேக்கா ஐ.டி வேலை வேண்டாம் என்று முடிவு செய்தாள். தினமும் அலுவலகம் செல்வதற்கு பதில் சொந்தமாக தொழில் துவங்க விரும்பினாள். அதன் மூலம் குழந்தையுடன் நேரம் செலவிட முடியும் என்று யோசித்தாள். 

பலவிதமான தொழில் செய்வது குறித்து யோசித்தோம். அப்போது தான் பிரபல ப்யூட்டி சலூன் பிரான்சைசி தருவது தெரிய வந்தது. அந்த சமயத்தில் நான் வேலை காரணமாக அமெரிக்காவில் இருந்தேன். என் மனைவி பிரான்சைசி குறித்து சொன்ன போது, எனக்குள் எழுந்த கேள்வி ஐ.டியில் இருந்து சலூன்... எப்படி என்பதுதான்.

‘‘நாங்க சொந்தமா ஆரம்பித்த போது எங்களுக்கு முழு ஆதரவு அளித்தது வாடிக்கையாளர்கள்தான். அவர்கள் கொடுத்த ஊக்கம்தான் செயலாக மாறி வருடத்திற்கு இரண்டு கிளைகள் என் செயின் ஆஃப் ஸ்டோர்களாக மாற்றி அமைக்க முடிந்திருக்கிறது. ஆனால் ஆரம்பித்த போது வாடிக்கையாளர்கள் எங்கள் முன் வைத்த ஒரே கோரிக்கை உங்களின் ஹேர்ஸ்டைல் கிளைக்கு கிளை மாறுபடுகிறது என்பது தான். 

அதனால் எங்களின் அனைத்து கிளைகளில் வேலை பார்க்கும் ஸ்டைலிஸ்டுகளுக்கு ஒரே மாதிரியா பயிற்சியினை கொடுக்க திட்டமிட்டோம். அந்த சமயத்தில்தான் இந்தியாவின் பிரபல ஹேர் ஸ்டைலிஸ்ட் விபுல் சதுசாமாவின் அறிமுகம் எங்களுக்கு கிடைத்தது.