பீஸ்ட் , ஜெயிலர் படங்களுக்கு செட் போட்டிரு க்கேன்... வாரிசுல நடிச்சிருக்கேன்!

புன்னகைக்கிறார் ஆர்ட் டைரக்டர் கிரண்

சினிமா நட்சத்திரங்களுக்கு அவர்களுடைய தேர்ந்த நடிப்பு பெயர் வாங்கித் தருவதுபோல் ஆர்ட் டைரக்டர் எனும் கலை இயக்குநர்களுக்கு அவர்களுடைய கைவண்ணத்தில் உருவாகும் பிரம்மாண்ட அரங்குகள் பெயர் வாங்கிக் கொடுக்கும். அந்த வகையில் தமிழ் சினிமாவின் முக்கியமான ஆர்ட் டைரக்டர் கிரண். ‘இரண்டாம் உலகம்’, ‘அனேகன்’, ‘கவண்’, ‘நானும்
ரவுடிதான்’, ‘பீஸ்ட்’, ‘டாக்டர்’ என ஹிட் படங்களில் இவருடைய கை வண்ணம் ரசிகர்களின் மனங்களை மகிழ்ச் செய்துள்ளது.

நடிகராகவும் தன் சினிமா பயணத்தைத் தொடரும் கிரண் சமீபத்தில் வெளியான ‘சர்தார்’ படத்தில் நெகட்டிவ் கேரக்டரில் நடித்திருந்தார். அடுத்த ஆண்டு தமிழ் சினிமாவின் மிகப் பெரிய படமாக வெளிவரவுள்ள சன் பிக்சர்ஸ் தயாரிப்பில் ரஜினி நடிக்கும் ‘ஜெயிலர்’ படத்துக்கும் இவர்தான் ஆர்ட் டைரக்‌ஷன்.

ஆர்ட் டைரக்‌ஷன் மீது ஆர்வம் எப்படி வந்தது?

டைரக்‌ஷன் பண்ணணும்னுதான் வந்தேன். கல்லூரி சமயத்தில் அதுவே என் ஆசை. ‘காதல்தேசம்’ கதிர் சாரின் வகுப்புத் தோழர் என்னுடைய பேராசிரியர். அவர் ‘கதிர் சாரிடம் உதவி இயக்குநராக சேர்த்துவிடுகிறேன்’ என்று சொன்னார். ஆனால், அது நடக்கவில்லை. அப்போது என் நண்பர், ராஜ்கபூர் இயக்கிய ‘சீமான்’ படத்தில் வேலை செய்தார். அதில் உதவி ஆர்ட் டைரக்டராக வேலை செய்யும் வாய்ப்பு கிடைத்தது. அப்போது ஆர்ட் டைரக்‌ஷன் மீது ஆர்வம், பிடிப்பு ஏற்பட்டது.

ஜே.கே, சாபுசிரில், ராகவன், நாகராஜ் ஆகியோரிடம் உதவியாளராக ‘குருதிப்புனல்’, ‘அலைபாயுதே’, ‘நேருக்குநேர்’ உட்பட ஏராளமான படங்களில் வேலை செய்தேன். என்னுடைய முதல் படமாக கன்னடத்தில் ‘சயனைடு’ வெளிவந்தது. தமிழில் ‘திருதிரு துறுதுறு’. தெலுங்கில் ‘ஜெகடம்’ வந்தது.கல்லூரி முடித்து,  இண்டஸ்ட்ரியில் நுழைந்தபோது என்ன மாதிரியான ஆலோசனைகள் கிடைத்தது?