கலைஞர் தாத்தா பாராட்டினாங்க...

தட்டாம்பூச்சி பிடித்து விளையாட வேண்டிய பத்து வயதில், தவில் கச்சேரி செய்கிறார் ராகத்தின் பெயரையே தன் பெயராக கொண்டிருக்கும் குட்டிப்பெண் அமிர்தவர்ஷினி. ஆறாம் வகுப்பு படிக்கும்போதே தவில் கச்சேரியில் அரை சதம் அடித்திருக்கிறார் இவர். மன்னார்குடிதான் இவரது சொந்த ஊர். சிறந்த தவில் கலைஞர் என பெயர் எடுத்திருக்கும் அமிர்தா, முன்னணி நாதஸ்வர கலைஞர் எட அன்னவாசல் மணி சங்கரின் மகள். இவரது அம்மா ஜெயந்தி வயலின் கலைஞர். அண்ணன்களும் நாதஸ்வர கலைஞர்கள்தான். தன் அப்பாவுடன் இணைந்து கச்சேரிகளில் வாசிக்கும் அமிர்தா, தனது தவில் அனுபவங்களை பகிர்ந்து கொள்கிறார்...

“நான் அசோகா சிசு விஹார் மெட்ரிக் பள்ளியில் ஆறாம் வகுப்பு படிக்கிறேன். நான் நாலாவது படிக்கும் போதில் இருந்து தவில் கத்துக்கிறேன். 3 வருஷமா கத்துக்கிறேன். ஏ.பி.ராம்தாஸ் தான் என்னுடைய முதல் குரு. கோவிலூர் கலைமாமணி கல்யாணசுந்தரம்தான் என்னுடைய இப்போதைய குரு.
 
நான் பாட்டும் கத்துக்கிறேன். ஆனால் எனக்கு பாட்டை விட தவில் வாசிக்கத்தான் ரொம்பப் பிடிக்கும். ஒன்றரை வருஷத்துக்கு முன்னாடியில் இருந்து கச்சேரிகள் பண்ண ஆரம்பிச்சேன். அப்பாவுடன் சேர்ந்து கோயில் மற்றும் சில விசேஷ நிகழ்ச்சிகளில் வாசிச்சிட்டு இருக்கிறேன். இது வரைக்கும் மொத்தம் 50 கச்சேரிகள் வாசிச்சு இருப்பேன். ஒரு தரம் டிரம்ஸ் சிவமணி அவர்களுடன் இணைந்து தவில் வாசித்தேன். அந்த நிகழ்ச்சி எனக்கு ரொம்ப சந்தோஷமாக இருந்தது.

எம்.ஆர்.வாசு அங்கிளும் என் கச்சேரியைக் கேட்டுட்டு ரொம்ப பாராட்டினாங்க. சென்னையில் அண்ணா அறிவாலயத்தில் முன்னாள் நிதி அமைச்சர் எஸ்.எஸ்.பழனிமாணிக்கம் மகள் திருமணத்தில் வாசிச்சேன். அப்போது என் வாசிப்பைக் கேட்டு கலைஞர் தாத்தா என்னை மிகவும் பாராட்டினாங்க. அது இன்னும் என் மனதில் சந்தோஷமா நிலைச்சிருக்கு. நான் இன்னும் அரங்கேற்றம் பண்ணலை. அரங்கேற்றம் செய்த பிறகு இன்னும் கொஞ்சம் வளர்ந்து பெரியவளானதும் தனிக் கச்சேரி பண்ணணும்னு ஆசை இருக்கு.

நிறைய பேர் என் தவில் இசையைப் பாராட்டி இருக்காங்க. ஆனால் இதுக்கெல்லாம் என் அம்மா அப்பாவும் என்னுடைய ஆசிரியர்களும் தான் காரணம். இவங்க எல்லாரும் எனக்கு எப்பவுமே ரொம்ப சப்போர்ட்டிவ்வா இருக்காங்க. அப்பா எனக்கு பயங்கர சப்போர்ட்டிவ்வாக இருப்பாரு. அப்புறம் எனக்கு கச்சேரிக்காக லீவு தேவைப்பட்டால் உடனே எந்த மறுப்பும் சொல்லாம எங்க கரஸ்பாண்டன்ட் கல்பனா மேடம் ரொம்ப உதவியா இருக்காங்க. அவங்களுக்கு இந்த சமயத்தில் நன்றி சொல்லிக்கிறேன்”.

படிப்புக்கு நடுவில் இதற்கு எப்படி நேரம் ஒதுக்குகிறீர்கள் என்றால், “தினமும் ஆறு மணியில் இருந்து எட்டு மணி வரைக்கும் இரண்டு மணி நேரம் பயிற்சி பண்ணுவேன். மற்ற நேரங்களில் படிப்பு. லீவு நாட்கள்ல அரை நாள் தவில் வகுப்புக்கு போவேன். ஃப்ரீயா இருக்கும் மற்ற நேரங்களிலும் பயிற்சி பண்ணுவேன்” என்று சொல்லும் அமிர்தா இனி வெளிநாட்டிலும் நிகழ்ச்சி நடத்தவிருக்கிறார்.
 
“எனக்கு ஆஸ்திரேலியா போக வாய்ப்பு கிடைச்சிருக்கு. ஆமா, ஆஸ்திரேலியாவில் உள்ள துர்க்கையம்மன் கோயிலில் தவில் வாசிக்க அழைப்பு வந்திருக்கு. இந்த மாதம் இறுதியில் அப்பாவோட ஆஸ்திரேலியா போறேன். அது முடிஞ்ச பிறகு சுவிட்சர்லாந்தில் உள்ள அம்பாள் கோயில் நிகழ்ச்சியிலும் வாசிக்கக் கூப்பிட்டு இருக்காங்க. அங்கேயும் போகப் போறேன். அதுக்காகத்தான் இப்ப நிறைய நேரம் சின்சியரா பிராக்டீஸ் பண்றேன்”. அமிர்தவர்ஷினி - பெயரைப்போலவே இசையோடு வாழட்டும் எந்நாளும்.