காதல் ஸ்பெஷலில் பக்கத்துக்குப் பக்கம் இளமைத் துள்ளல். ‘காதலர் தினம்’ வரும் நேரத்தில் ‘காதல் தேர்வு’க்கான வினாத்தாளை அவுட் செய்து அமர்க்களப்படுத்திவிட்டார் ஆல்தோட்ட பூபதி!

தந்தையின் ஆசிட் வீச்சால் கருகிய முகத்துடன் இருக்கும் காயத்ரியைக் காணும்போது, காதலை மறுக்கும் பெண்கள் மீது அமிலம் கொட்டும் மனித மிருகங்கள்தான் நினைவுக்கு வருகின்றனர். காயத்ரியை கைபிடித்த காதல் கணவன் அப்துல்லா உண்மையிலேயே ‘ஆயிரத்தில் ஒருவன்’தாங்க!

நிஜக் காதலுக்கு ‘உடல் ஊனம்’ ஒரு தடையே இல்லை என்று நிரூபித்திருக்கிறார்கள் தஞ்சாவூரைச் சேர்ந்த லட்சுமி-கண்ணன் தம்பதிகள். லட்சுமியின் பெற்றோரும் இக்கட்டுரையைக் கண்டு மனம் மாறுவார்கள் என்று நம்புவோம்.

தடைகளை உடைத்தெறிந்து ‘ஃபீனிக்ஸ்’ பறவையாய் ‘விஸ்வரூபம்’ எடுத்திருக்கும் கமலுக்கு ‘ரசிகர்கள் பணம் தருகிறார்களோ இல்லையோ... மரியாதை தருவார்கள்’ என்று இறுதி பஞ்ச் வைத்தது நச்!

‘ஒஸ்தி பொண்ணு... டஸ்ட்டு பின்னு’ என பின்னியெடுக்கும் ‘கானா’ பாலா, படுஜோரான திறமைசாலிதான். சினிமா உலகம் அவரை முழுமையாகப் பயன்படுத்திக்கொள்ள வேண்டும்!

‘மனித உயிர் காக்கும் சந்தர்ப்பங்களைத் தவிர, மற்ற எதன்பொருட்டும் ஆண்மை நீக்கம் என்பது அப்பட்டமான உரிமை மீறல்தான்’ என்ற ‘ச்சீய் பக்கத்தின்’ கருத்து, நியாயத்தின் பக்கம்!

எந்தக் கண்டமாக இருந்தால் என்ன... பெண்களின் ‘பொஸஸிவ்நெஸ்’ ஒரே மாதிரிதான் இருக்கும். அமெரிக்க இசை ஜோடி பீபர்-செலினா பிரிவும் இதைத்தான் வெளிப்படுத்தியிருக்கிறது.

பதினான்கு வயது சிறுமி (துளசி)யை காதலியாக நடிக்க வைத்தது சரியா? இன்று முத்தக் காட்சி குறித்து கருத்து தெரிவிப்பவர்கள் இதனையும் கருத்தில் கொள்ள வேண்டும்.

போட்டோவில் ஏவி.எம்.சரவணன், இளையராஜா, கவிஞர் வாலி போன்ற ஜாம்பவான்கள் இருக்கும்போது, பாண்டியராஜன் அவர்களைப் பற்றி மூச்சு விடாமல், தன் மனைவி வாசுகி பற்றிக் கூறியுள்ளது சற்று வித்தியாசமாகவும், சுவையாகவும் இருந்தது. ஏன்னா... இது காதல் ஸ்பெஷல் இதழ்ங்க!

‘யானைக்கும் அடி சறுக்கும்’ என்பதை படத்தின் எல்லா முனைகளிலும் அக்குவேறு ஆணிவேறாக அலசி ஆணித்தரமாகச் சொன்ன உங்கள் நடுநிலை விமர்சனத்திற்கு ‘கடலளவு’ பாராட்டுக்கள்!