கலர் கலர்...what கலர்... சினிமா கலர்!

ஒரு திரைப்படத்தில் டிஜிட்டல் இமேஜிங் டெக்னீஷியன் எனும் கலரிஸ்ட் என்பவரின் வேலை என்பது மிக முக்கியம். அவர்தான் படத்தின் இறுதித் தோற்றத்தை நிர்ணயம் செய்பவர். போஸ்ட் ப்ரொடக்‌ஷன் வேலையில் காட்சிகளை மெருகேற்றுவது இவர்களின் முக்கிய வேலை. ஒரு படம் வெற்றி பெற்றாலும் இவர்கள் அவ்வளவாக வெளியே தெரிவதில்லை. ஆனாலும் அவர்கள் ஓசையில்லாமல் படத்தின் வெற்றிக்கு உறுதுணையாக இருப்பார்கள். அப்படி ஏராளமான படங்களில் கலரிஸ்ட்டாக பணிபுரிந்து வருபவர் கோபால் பாலாஜி.

‘காத்துவாக்குல ரெண்டு காதல்’, ‘ஓ2’, ‘சூப்பர் டீலக்ஸ்’, ‘ஆடை’, கடைசி விவசாயி’, ‘நவரசா’, ‘இறுதிச் சுற்று’, ‘ஜெய்பீம்’, ‘டாணாக்காரன்’, ‘வெந்து தணிந்தது காடு’ உட்பட ஏராளமான படங்களுக்கு இவர்தான் கலரிஸ்ட். இப்போது ‘துருவ நட்சத்திரம்’, ‘பாபா பிளாக்‌ஷீப்’, ‘ஜோஸ்வா’, ‘கேப்டன் மில்லர்’ உட்பட ஏராளமான படங்களை கைவசம் வைத்துள்ளார்.

கலரிஸ்ட்டாக உங்கள் பயணம் எப்படி ஆரம்பமானது?பொதுவாக பலருக்கு நடிகராகணும், டைரக்டராகணும்னு லட்சியம் இருக்கும். எனக்கு விஷுவல் எஃபெக்ட் துறையில் பெரிய ஆளாக வரணும் என்ற ஆசை இருந்துச்சு. அப்போது அந்தத் துறைக்கு உதவியாளர்களை வேலைக்கு எடுக்கமாட்டார்கள். அதனால் உதவி எடிட்டராகத்தான் சினிமாவில் என்னுடைய பயணம் ஆரம்பிச்சது. உதவியாளராக ஒர்க் பண்ணிய முதல் படம் ‘கும்மாளம்’.

சினிமா டிஜிட்டலுக்கு மாறியதும் டிஜிட்டல் இமேஜிங் டெக்னீஷியனாக (DIT) ஒர்க் பண்ண ஆரம்பிச்சேன். அப்படி எடிட்டிங்கிலிருந்து DIT... DITயிலிருந்து கலரிஸ்ட்டாக மாறினேன்.
கலரிஸ்ட் என்பவரின் வேலை என்ன?ஒரு காட்சியை காலை முதல் மாலை வரை படம் பிடித்திருப்பார்கள். காலையில் ஒருவித லைட்டிங் இருக்கும். மாலையில் வேறுவித லைட்டிங் இருக்கும். அந்தக் காட்சி ஐந்து நிமிடம் திரையில் வருகிறது என்றால் ஒரே சமயத்தில் நடப்பதுமாதிரிதான் திரையில் காண்பித்திருப்பார்கள்.

கலரிஸ்ட்டாக எங்கள் வேலை என்ன என்று பார்க்கும்போது கலர் டைமிங்கை காட்சிக்குத் தகுந்த மாதிரி பிரித்துத் தரணும். காலை, மதியம், மாலை என காட்சிகளை பல பகுதிகளாகப் பிரித்து காண்பிக்க வேண்டும். அதுமட்டுமல்ல, படத்துக்கான லுக்கை நிர்ணயிப்பதிலும் எங்கள் பங்கு இருக்கும். அடிதடி படம் என்றால் சிவப்பு கலர், ஹாரர் த்ரில்லர் படங்கள் என்றால் நீலக் கலர் என்று கதைக்களத்துக்கு ஏற்றமாதிரி லுக் தரவேண்டும்.  

இயல்பாகவே மனிதனின் கண்கள் நெருப்பை பார்க்கும்போது அவர்களையும் அறியாமல் அச்சம் எழும். அப்படி கலர் மூலம் ஒரு மூட் எங்களால் உண்டாக்க முடியும். அதை ‘லுக் ஆஃப் த ஃபிலிம்’னு சொல்வோம். தவிர, நியூ டெக்னாலாஜியுடன் புதுப் புது கலர் டோன் தருவதும் எங்கள் வேலை.

கலரிஸ்ட்டுக்கான தேவை இப்போது எப்படி இருக்கிறது?

சினிமா ஃபிலிம்ல ஷூட் பண்ணும்போதும் கலரிஸ்ட்டுக்கான வேலை இருந்தது. ஆனால், RGB வேல்யூவுக்குள்தான் அவர்களால் வேலை செய்ய முடிந்தது. அப்படித்தான் 70, 80 வருட சினிமாக்களை பார்த்திருக்கிறோம்.நவீன டெக்னாலஜி வந்த பிறகு ஒரு படத்தோட 25 சதவீத கிராஃபிக்ஸ் வேலைகளை கலரிஸ்ட் மூலம் பண்ணிடலாம். ‘புதுப்பேட்டை’, ‘காக்கி’ (இந்தி) டைமிலிருந்து எல்லா படங்களும் டிஜிட்டல் கலர் கரெக்‌ஷன் தொழில்நுட்பத்தில் வெளிவர ஆரம்பித்தது. இன்றைய தொழில்நுட்பத்தில்  ஒரு திரைப்படத்தில் என்ன வேண்டுமானாலும் செய்ய முடியும் என்ற நிலை வந்துள்ளது.

நீங்கள் பணிபுரிந்த படங்களில், ஒரு கலரிஸ்ட்டாக உங்களுக்கு மனநிறைவு கொடுத்த படம் எது?