பிலிப்பைன்ஸின் விவசாய தொழில் அதிபர்!

அக்ரிநர்ச்சர், இன்க்.

பிலிப்பைன்ஸ் பங்குச் சந்தையில் இடம்பிடித்த முதல் மற்றும் ஒரே விவசாய நிறுவனம் என்ற பெருமையைத் தன்வசம் வைத்திருக்கிறது,

விவசாயம், விநியோகம், சில்லறை விற்பனை, ஏற்றுமதி... என ஒரு கார்ப்பரேட் போல இயங்குகிறது இந்நிறுவனம். அரிசி, சோளம், காய்கறிகள், பழ வகைகள் என பிலிப்பைன்ஸ் மண்ணில் விளையும் அனைத்தையும் விளைவிக்கிறது ‘அக்ரிநர்ச்சர்’. இதுபோக விவசாய இயந்திரங்களையும்  விற்பனை செய்கிறது. பிலிப்பைன்ஸிலே அதிகளவு மாம்பழங்களை ஏற்றுமதி செய்வதும் இந்நிறுவனம்தான்.

குறிப்பாக இதன் விவசாயப் பொருட்கள் சீனா, ஜப்பான், கொரியா, மத்திய கிழக்கு நாடுகள், ஐரோப்பா, வட அமெரிக்காவுக்கு ஏற்றுமதியாகின்றன. இந்நிறுவனத்தை உருவாக்கியவர் அந்தோணியோ ட்யூ. ஒரு விவசாய தொழில் அதிபராக அறியப்படுகின்ற ட்யூவின் கதை, விவசாயம் பிசினஸாக மாறினால்தான் நிலைத்திருக்கும் என்பதை ஆழமாகப் பதிவு செய்கிறது. பிலிப்பைன்ஸில் வசித்து வந்த ஒரு சாதாரண குடும்பத்தில் 47 வருடங்களுக்கு முன்பு பிறந்தார் அந்தோணியோ ட்யூ. வசதியற்ற பெற்றோர் என்பதால் ட்யூவுக்குக் கொடுப்பதற்கு அவர்களிடம் ஒரு சென்ட் நிலம் கூட இல்லை. அப்பாவுடைய சொற்ப வருமானத்தில் குடும்பம் நகர்ந்தது.

நன்றாகப் படிக்கக்கூடியவர் ட்யூ. அதனால் மணிலாவில் உள்ள டிஎல்எஸ்யூ பல்கலைக்கழகத்தில் இளங்கலை வணிகப்பாடம் படிக்க அவருக்கு இடம் கிடைத்தது. தான், வாங்கும் குறைந்த வருமானத்திலிருந்து ஒரு தொகையை ட்யூவுக்கு அனுப்பி வைப்பார் அவரது தந்தை. படிப்பை முடிப்பதற்கு ஒரு வருடம் இருக்கும்போதே அவரது தந்தை இறந்துவிட்டார். நிலைகுலைந்து போனார் ட்யூ. அதே நேரத்தில் தன்னால் பணம் ஈட்ட முடியுமா என்ற பாதுகாப்பின்மையும் அவருக்குள் உருவானது.

‘‘பாதுகாப்பின்மைதான் பலரது தவறான முடிவுகளுக்குக் காரணம். ஆனால், என் வாழ்க்கையில் பாதுகாப்பின்மைதான் என்னுடைய வளர்ச்சிக்கு  காரணம். அப்பா இறக்கும் வரை ஒரு ஜாலியான இளைஞனாக, எந்தவித பொறுப்பும் இல்லாமல் இருந்தேன். அவர் இறந்த பிறகு பொருளாதார ரீதியாகவும், உறவு ரீதியாகவும் எனக்குள் ஒருவித பாதுகாப்பின்மையை உணர்ந்தேன். ஜாலியான இளைஞனிலிருந்து தீவிரமான மனிதனாக என்னை மாற்றிக்கொண்டேன்...’’ என்று சமீபத்தில் ஒரு நேர்காணலில் சொல்லியிருந்தார் ட்யூ.

அடுத்த ஒரு வருடம் பகுதி நேரம் வேலை பார்த்து படிப்பை முடித்தார் ட்யூ. கல்லூரிப் படிப்புக்குப் பிறகுதான் ட்யூவின் வெற்றிக்கதை ஆரம்பித்தது. ட்யூவுக்கு விவசாயிகளுடன் நேரடி தொடர்பில் இருக்கும் ஒரு நிறுவனத்தில் வேலை கிடைத்தது. விவசாயிகளுடனான வேலை அவருக்கு விவசாயம் மற்றும் விவசாயிகளின் மீது பெரும் மரியாதையைக் கொடுத்தது. அத்துடன் விவசாயத்தில் இருக்கும் பிசினஸ் வாய்ப்புகளையும் கண்டுபிடிக்க உதவியது. மிகக்குறைந்த சம்பளம் என்ற போதிலும் விவசாயிகளுடனான வேலை அவருக்கு திருப்தியைக் கொடுத்தது.

பிலிப்பைன்ஸில் மிகக்குறைந்த தினக்கூலிக்கு வேலை செய்பவர்களாக விவசாயிகள் இருந்ததைக் கவனித்தார். அதே நேரத்தில் விவசாயப் பொருட்களை விற்பனை செய்பவர்கள் பெரும் பணக்காரர்களாக இருப்பதையும் கண்டுகொண்டார். இந்த அனுபவத்தைக் கொண்டு விவசாயிகளையும், வாடிக்கையாளர்களையும் இணைக்கும் விதமாக 1997ம் வருடம் ‘அக்ரிநர்ச்சர், இன்க்’ எனும் நிறுவனத்தை ஆரம்பித்தார் ட்யூ.