புதிய தொடர்-டார்க்நெட்

01. பாதாள உலகின் வாசல்

அமெரிக்கா.கேரி அல்ஃபோர்டிடம் அந்தச் சின்ன  கவரை கூரியர் நபர்  தந்தார். அந்தக் கவரை பிரித்துப் பார்த்தார் கேரி. உள்ளே ஒரு சின்ன பொட்டலம். முகர்ந்து பார்த்தார்.
சந்தேகமே இல்லை போதைப் பொருள்தான். கேரிக்கு உற்சாகம் தாங்கவில்லை.  கேரி அல்ஃபோர்ட் அமெரிக்காவின் புலன் விசாரணை அமைப்பான எஃப்.பி.ஐ (FBI)யில் போதை தடுப்பு பிரிவில் பணிபுரியும் காவலர். அமெரிக்காவில் போதை மருந்து விற்பவர்களைக் கண்டுபிடித்து நீதியின் முன் நிறுத்துவதுதான் அவரின் வேலை.

கூரியரில் வந்த அந்தக் கவரில் ஒரு 50 கிராம் போதைப்பொருள் இருக்கலாம். அதை எடுத்துக்கொண்டு தன் மேலதிகாரியிடம் சென்றார். அந்த போதைப் பொருள் பொட்டலத்தை நீட்டியபோது  மேலதிகாரிக்கு கோபம் வந்தது.  வழக்கமாக கேரியின் குழு போதை மருந்தைக் கைப்பற்றினால் அது கிலோ கணக்கில் இருக்கும். சாதாரண 100 கிராம், 200 கிராம் போதை மருந்து என்றால் அங்கு இருக்கும் லோக்கல் போலீசை அனுப்புவார்கள். கிலோ கணக்கு என்றால் மட்டும்தான் எஃப்.பி.ஐ கேசை எடுக்கும்.  

கேரியின் 50 கிராம் பொட்டலம் மேலதிகாரியின் கோபத்தைக் கிளறியதில் ஆச்சரியம் இல்லை.ஆனால், கேரி இந்த பொட்டலத்தின் பின்னிருக்கும் மிகப்பெரிய ஆபத்தை விளக்கினார்.
“ சார்... முதலில் இந்த பொட்டலம் சாதாரண கூரியரில் வந்து சேர்ந்தது. இதை லோக்கல் ஏஜென்ட் அனுப்பவில்லை. இதை நான் ஒரு வலைத்தளத்தில் ஆர்டர் செய்தேன். கனகச்சிதமாக கூரியரில் எனக்கு சரக்கை அனுப்பி விட்டார்கள். அமெரிக்காவின் சாதாரண போஸ்டல் சர்வீஸ், கூரியரைப் பயன்படுத்தி இப்படி 50 கிராம் பொட்டலங்களாக பல கிலோ போதை மருந்தை இன்டர்நெட் வாயிலாக விற்றுக் கொண்டிருக்கிறார்கள்.  

காலம் மாறிவிட்டது. எல்லாம் இணையத்தில் நடந்து கொண்டிருக்கிறது. நாம் இருட்டான வீதிகளில் போதை மருந்து விற்பவரைத் தேடிக்கொண்டிருப்பதில் இனி பயனில்லை...’’  என்றார்.
மேலதிகாரிக்கு குழப்பம். “இன்டர்நெட்டில் என்றால் அவர்களை மிக எளிதாகப் பிடித்து விடலாமே..? பின்னே என்ன குழப்பம்..?” எனக் கேட்டார்.‘‘சார்... சாதாரண இன்டர்நெட் என்றால் எப்போதோ நம் சைபர் பிரிவிற்கு சொல்லி அவர்களைப் பிடித்துவிட்டிருப்பேன். அவர்கள் பயன்படுத்துவது ரகசிய இன்டர்நெட். அவர்களை அவ்வளவு சாமானியமாக பிடிக்க முடியாது...’’ என கேரி கூறினார்.

“கேரி... எனக்கு சுத்தமாகப் புரியவில்லை... அது என்ன ரகசிய இன்டர்நெட்?”

கேரி இப்போது மேல் மூச்சை வாங்கினார். தன் மேலதிகாரிக்கு இந்தத் தொழில்நுட்பம் புரியவில்லை என்பது அவருக்கு உரைத்தது. அதனால் இந்த தொழில்நுட்பத்தைப் புரிய வைத்தால்தான் இந்த கேசை நகர்த்த முடியும். எப்படியாவது இவருக்கு அதை விளக்கிவிட வேண்டும் என்று முயன்றார்.