நந்தா பிகினிங் to ... via நான் மகான் அல்ல... வினோத் கிஷானின் ஜர்னி

‘நந்தா’ படத்தில் சின்ன வயது சூர்யாவாக தன் சினிமா பயணத்தைத் தொடங்கிய வினோத், இன்று ‘பிகினிங்’ படத்தில் வித்யாசமான மனவளர்ச்சி குறைந்த நடிகராக, உடல்மொழி, வாய்மொழி என அனைத்தையும் மாற்றி ஹீரோவாக நடித்திருக்கிறார். படம் முழுக்க குளறும் பேச்சு, தத்தி நடக்கும் இயல்பு, திரும்பத் திரும்ப சொன்ன விஷயத்தையே சொல்வது என வினோத் கிஷானின் நடிப்பு நம்மை அடடே சொல்ல வைத்திருக்கிறது.

ஆசியாவிலேயே முதல் முயற்சியாக ஒரே நேரத்தில், ஒரே திரையில், ஒரே படத்தின் இரு சம்பவங்கள் என ‘பிகினிங்’ படம் பல நாடுகளின் சினிமா விழாக்களில் விருதுகளும், அங்கீகாரங்களும் பெற்றிருக்கும் நிலையில் படத்தின் நாயகன் வினோத், தான் கடந்த வந்த பாதை குறித்து மனம் விட்டு பேசினார்.

‘பிகினிங்’ கேரக்டருக்கு எப்படி தயார் ஆனீர்கள்?

குறைஞ்சது ஒரு மாதம் ஆச்சு நான் திரும்பவும் பழைய மாதிரி சரளமா பேசவே. ஆனால், யாரையும் எடுத்துக்காட்டா எடுத்துக்கிட்டு எல்லாம் இந்த கேரக்டர் செய்யலை. நிறைய குழந்தைகள், பெரியவங்களை ரெஃபரன்ஸ் எடுத்துக்கிட்டு நிறைய பயிற்சி செய்தேன். உண்மையாகவே அப்படி நடிக்கறது அவ்வளவு சுலபமா இல்லை. கொஞ்சம் கடினமாத்தான் இருந்துச்சு. ஆனா, என் கேரக்டருக்கு ஒரு கட்டத்திலே ஆடியனஸ் கிளாப்ஸ் அடிக்கும்போது இதுக்காக என்ன வேணும்னாலும் செய்யலாம்னு தோணுச்சு.

இந்தப் படத்தின் விநியோகஸ்தராக, இயக்குநர் லிங்குசாமி என்ன சொன்னார்?

அவர் செம ஹேப்பி. படம் முடிச்சு ஓடிடின்னுதான் படக்குழு திட்டமிட்டிருந்தாங்க. ஆனா, ஃபிலிம் ஃபெஸ்டிவல்ல சார் படம் பார்த்திருக்கார். உடனே ‘நான் தியேட்டர்ல ரிலீஸ் செய்யறேன்’னு அவரே முன்வந்தார். என் நடிப்பு பிரமாதமா இருக்கறதாவும் பாராட்டினார். ‘ஆமால்ல... பெரிய ஸ்கிரீன்ல ஒரே நேரத்துல இரு காட்சிகள் ஓடினா நல்ல இருக்கும்ல’ன்னு அப்பதான் நாங்களும் யோசிச்சோம்.

‘நந்தா’ டூ ‘பிகினிங்’... பயணம் எப்படி இருக்கு..? என்ன கிடைச்சிருக்கு?

நல்ல நடிகன்னு ஒரு அங்கீகாரத்தை மக்கள் கொடுத்திருக்காங்க. ரொம்ப ஆசைப்படறதில்ல; அவசரப்படறதில்ல. அதுக்கேத்த மாதிரியான படங்களும் சரியா வந்துட்டு இருக்கு. எங்க போனாலும் இத்தனை வருஷங்கள் கழிச்சும் கூட ‘நந்தா’ படம் என்னுடைய அடையாளமா நிற்குது. தொடர்ந்து ‘சமஸ்தானம்’ படத்திலே சின்ன வயது ஆசிஷ் வித்யார்த்தி சார் கேரக்டர், ‘சேனா’ படத்திலே சின்ன வயது சத்யராஜ் சார் கேரக்டர், ‘கிரீடம்’ படத்திலே அஜித் சார் தம்பி... இப்படி நடிச்சுட்டு அப்புறம் சினிமாவுக்கு பிரேக் கொடுத்துட்டு படிப்பை முழுமையா முடிக்கணும்னு முடிவெடுத்தேன்.