அஜித்துக்கு ஸ்டண்ட் அமைத்த எம்ஜிஆர் குருநாதரின் பேரன்!

இந்திய சினிமாவின் முன்னணி ஸ்டண்ட் மாஸ்டராக இருப்பவர் சுப்ரீம் சுந்தர். தேசிய விருதுக்கு சொந்தக்காரர். அஜித்தின் ‘துணிவு’க்கு ஸ்டண்ட் அமைத்த துணிச்சல்காரர். இப்போது நிற்க நேரமில்லாதவராக தமிழ், இந்தி என பறந்துகொண்டிருக்கிறார்.உங்க பேருக்கு முன்னாடி இருக்கிற அடைமொழி நீங்களே சூட்டிக்கொண்டதா?

ஒவ்வொரு ஸ்டண்ட் மாஸ்டருக்கும் ஒரு அடைமொழி இருக்கும். ‘ஆணை’ படத்தில் என்னை முதன் முதலாக ஸ்டண்ட் மாஸ்டராக அறிமுகப்படுத்தியவர் இயக்குநர் செல்வா. அப்போது ஹீரோ அர்ஜுன் சாரும், செல்வா சாரும் சேர்ந்து சூட்டிய பட்டப் பெயர் ‘சுப்ரீம்’.

சினிமாவுல நடிக்கணும் என்பதுதான் பலருடைய ஆசை. நீங்க அடிவாங்கணும் என்றே வந்தீர்களா?

எங்கள் குடும்பம் சினிமாவுக்கு பெயர் பெற்ற குடும்பம். ஊமைப் பட காலத்திலிருந்தே எங்கள் குடும்பத்தில் உள்ளவர்கள் சினிமாவில் இருக்கிறார்கள். புகழ் பெற்ற ஸ்டண்ட் மாஸ்டர் சோமு என்னுடைய தாத்தா. எம்ஜிஆரின் குருநாதராக இருந்து கத்திச் சண்டை, வாள் சண்டை உட்பட பல மார்ஷல் ஆர்ட்ஸ் பயிற்சி அளித்தவர். தாத்தா, ஸ்டண்ட் கலைஞர்களின் தந்தை என்று எம்ஜிஆரால் வர்ணிக்கப் பட்டவர். தாத்தாவை கெளரவப் படுத்தும்விதமாக எம்ஜிஆர் ஆட்சியில் இருக்கும்போது சென்னை எம்ஜிஆர் நகரில் ஒரு தெருவுக்கு ‘ஸ்டண்ட் சோமு தெரு’ என்று பெயர் சூட்டினார்.

முதல்வர் ஆன சமயத்தில் செய்தித் தாளில் தாத்தா கையிலிருந்து வீர வாள் வாங்குவதுபோல் ஒரு புகைப்படத்தை பிரசுரித்து  ‘ஸ்டண்டுக்கு தந்தை ஸ்டண்ட் சோமு - என்னுடைய குருநாதர்’ என்ற விளம்பரம் கொடுத்து தாத்தாவை பெருமைப்படுத்தினார்.அப்பா ஜூனியர் கோபால், அண்ணன் ஆக்ஷன் பிரகாஷ் என எல்லோரும் ஃபைட் மாஸ்டர்ஸ். நான்காவது ஜெனரேஷனாக என்னுடைய அண்ணன் மகன் சந்தோஷும் ஃபைட் மாஸ்டராக இருக்கிறார்.

ஆபத்து நிறைந்த ஸ்டண்ட் தொழிலுக்கு குடும்பத்தின் ஆதரவு எப்படி இருந்தது?

ஆரம்பத்திலிருந்து சினிமாவுல இருந்ததால் பெரிய பயம் இல்லை. சில சமயம் அப்பா, அண்ணன் படப்பிடிப்பிலிருந்து வரும்போது காயங்களுடன் வருவார்கள். அப்போது பயந்து, இந்தத் தொழிலில் இருந்தால் காயங்களுடன்தான் வாழணும் என்று  நினைத்து வேறு வேலைக்கு செல்லலாம் என்றெல்லாம் யோசித்திருக்கிறேன்.

எனக்கு படிப்பு அவ்வளவாக வராது. தெரியாத தொழிலுக்கு போவதைவிட தெரிந்த தொழிலில் கவனம் செலுத்தலாம் என்று ஸ்டண்டில் மும்முரமாக இறங்கினேன்.
ராம்போ ராஜ்குமார் மாஸ்டரிடம் உதவியாளராக சேர்ந்து என்னுடைய பயணத்தை தொடங்கினேன். சினிமாவுல ஃபைட்டராக இருப்பவர் காலம் முழுவதும் ஃபைட்டராக இருக்க வேண்டிய சூழ்நிலை ஏற்படும்.

எனக்கு தாத்தா, அப்பா மாதிரி மாஸ்டராக வேண்டும் என்ற விருப்பம். மாஸ்டராக வர விரும்புபவர்களுக்கு எடிட்டிங் நாலெட்ஜ் அவசியம். இது மாஸ்டர்களுக்கு மட்டுமல்ல; இயக்குநர், கேமராமேன் உட்பட மெயின் டெக்னீஷியன்களுக்கும் எடிட்டிங் சென்ஸ் இருந்தால் சீக்கிரத்தில் முன்னுக்கு வர முடியும் என்பதை புத்தகங்களில் படித்திருக்கிறேன்.

எடிட்டிங் சென்ஸ் இருந்தால் இயக்குநர் மூன்று கோணங்களில் சொல்லும் சீக்வென்ஸை பத்து கோணங்களில் எடுக்க முடியும். அந்த வகையில் இயக்குநர் கதை சொல்லும்போதே சண்டைக் காட்சி என் கண்களில் விரிவடைய ஆரம்பித்துவிடும். ராம்போ மாஸ்டர் பலமுறை எடிட் பண்ணும் வாய்ப்பை கொடுத்தார்.