M C D N A R Y T என்றால் யாருக்காவது புரிகிறதா? ப்ளஸ்டூ படிக்கும் போது தனககுத்தானே வைத்துக் கொண்ட பெட் நேம் என்கிறார் தீனா. இவரை நண்பர்கள் எல்லாம் டிஎன்ஏ என்று அழைக்க, கல்லூரியில் படிக்கும் பல்லாயிரக்கணக்கான மாணவ - மாணவிகள் இவரை ஹிப்ஹாப் தீனா என்றே அறிந்திருக்கிறார்கள்.

இவர் படிக்கும் கோவை இந்துஸ்தான் கல்லூரியில் நடந்த பிரம்மாண்ட விழாவுக்கு நடிகர் ஆர்யாவை அழைத்திருந்தார்கள். அவர் வர தாமதமான நிலையில் கல்லூரி மாணவர்கள் மேடையில் தங்கள் தனித்திறனைக் காட்டிக் கொண்டிருந்தார்கள்.

இவரின் இந்த செயல்பாடுகளைப் பார்த்த திரைத்துறையில் இருக்கும் சீனியர் மாணவர் ஒருவர் இவரைப் பற்றி, தான் டைரக்டராகப் பணியாற்றும் திரைப்பட தயாரிப்பாளரிடம் சொல்ல, அவர் இவரை சந்திக்க கோவை வர உள்ளார். அதற்கு பிப்ரவரி மாதம் தேதி கொடுத்துள்ளார். அவர் வரும்போது பாடிக் காட்ட இப்பவே ஆறு பாடல்கள் ரெடியாம்! 

தமிழைப் படிக்க, பேச, எழுதவே வாய்ப்பற்றுச் சென்று கொண்டிருக்கும் நம் இளைய தலைமுறை மத்தியில் இவருக்கு எப்படி இப்படி சுத்தத் தமிழில் கவிதையும், பாட்டும் எழுதி, அதை ஹிப்ஹாப் எனப்படும் சொல்லிசையில் ஆடிக் கொண்டே பாடத் தோன்றியது... கேள்வியுடன் தீனாவை சந்தித்தோம்.

‘‘எனக்கு தமிழ் மேல ரொம்ப ஆர்வம். என் அம்மா தமிழ் டீச்சர். அவர் படிக்கப்படிக்க அதைக் கேட்டுக் கேட்டு அதிலேயே லயிச்சுப் போயிட்டேன். அப்படித்தான் சின்னச் சின்ன கவிதைகள் எழுதிட்டிருந்தேன். பத்தாம் வகுப்பு படிக்கும்போதே நூறு கவிதைகளுக்கு மேல எழுதிட்டேன்.

‘‘அண்டம் பிறந்தது முதலடி பதிந்தது. தமிழனே பதித்த நிஜம் நீ அதைக் கேளு. அகிலம் யாவையும் ஆளப் பிறந்தவன். ஆழியில் போனவன் ஒரு வரலாறு... புதைந்த பூமியில் விளைந்த முத்துக்கள். என் மனம் அறியும் நான் யாரென்று. எந்தன் மண்ணில் உந்தன் ஆதிக்கம் என்றும் அமையா நீ நடை கட்டு.

அடிமைத்தனத்தை அடியோடு ஒழிக்க, மத, சாதி போதையை மண்ணுள் புதைக்க, சகுனிகள் ஆடிடும் ஆட்டத்தைக் கலைக்க, மதங்கொண்டு வருகிறான் வெறி கொண்ட வீரனாய், ஆண்ட பரம்பரை அடிமையாவதா? எவனோ ஒருவன் நம்மை ஆள்வதா? கலப்படம் இல்லா அரசியலாக தமிழனே என்றும் தமிழனை ஆள, தடம் பதிக்கணும், தடைகளை உடைக்கணும்.  தலைமுறை தமிழினை, தரத்தினை போற்றட்டும்.

விழி திறக்கட்டும், விடியலும் பிறக்கட்டும் என் தமிழ் கவிமொழி ஆட்சியில் பரவட்டும். சிறுவயதிலே சிந்தனைத் தீயிலே ஊற்றிய வார்த்தைகள். கேள்விகள் முழங்கட்டும். வழிமாறிச் சென்ற தலைமுறைகள் வந்து சேரும் வரை என்  வார்த்தைகள் போரிடும். வரலாறை வாசித்துப் பாரடா. வந்தவன் யாராடா? ஆண்டவன் யாரடா?

அனைத்தையும் அறிந்து விட்டால் ஆண்டவன் பரம்பரை நாமென கூறிடுவாயடா. வந்தேறியவன் சூடிய வேடம். சில காலம் சில்லறை வியாபாரம். அதன் மேலே உனக்கென்ன மோகம். அனைத்தையும் துறந்திடு. தமிழே உன் அடையாளம்!’’

‘‘அவரை அணுகி, ‘அக்கா இப்படி ஒரு சாங் பண்ணணும். நீங்க அதில் நடக்கற மாதிரி பர்ஃபாமன்ஸ் கொஞ்சம் கொடுக்க முடியுமா?’ எனக் கேட்டேன். உடனே சம்மதித்து விட்டார். அப்படி ஷூட் செய்யப்பட்டதுதான் இந்தப் பாடல்!’’ என்ற தீனா, ‘‘எனக்காக மெனக்கெட்டு இப்படி படம் எடுக்க பத்துப் பேர் கொண்ட நண்பர்கள் டீமே இயங்குகிறது.

அவர்கள் எல்லாம் சீனியர் மாணவர்கள். நான் எழுதும் தமிழ்ப் பாடலை சில இடங்களில் ஆங்கிலமாக மொழி மாற்றம் செய்ய வேண்டி வரும். அதற்கெனவே இரண்டு பேர் உள்ளார்கள்!’’ என்ற தீனா, தனது பெட் நேம் ஆன ‘டிஎன்ஏ’ எப்படி வந்தது என விளக்கினார்.

‘‘நான் ப்ளஸ்டூ சயின்ஸ் ஸ்டூண்ட். ஜுவாலஜி வகுப்பு நடந்துட்டிருக்கும்போது அதில் அடிக்கடி டிஎன்ஏவைப் பற்றிய பாடம் வந்தது. நம்ம பேர் தீனா. அதையே ஏன் டிஎன்ஏவாக சுருக்கக்கூடாது? அதுவே ஏன் எனக்கு பிராண்ட் ஆகக்கூடாதுன்னு யோசிச்சேன். அதுக்காக டிஎன்ஏவுக்கு முன்னாடி எம்.சின்னு சேர்த்துட்டேன்.

எம்.சி.ன்னா மாஸ்டர் ஆப் செரிமணி (master of ceremany)! அதாவது எந்த ஒரு மேடையையும் எடுத்துக் கொள்பவன் என்ற பொருள். அப்போ இருந்து என் செல்லப்பெயரே டிஎன்ஏ ஆகி விட்டது!’’ என்றவரிடம், ‘அப்படியானால் RYT என்று கூடவே ஒரு வார்த்தை... அதிலேயே உங்க யூட்யூப் பெயரும் வருகிறதே... அதற்கும் இது மாதிரி அர்த்தம் உண்டா?’ என்று கேட்டோம்.