‘‘இயற்கைச் சமநிலை மாறாமல் இருக்க பறவைகளும், வனவிலங்குகளும், தாவரங்களும் ரொம்ப ரொம்ப முக்கியம். காடுகள் இருந்தால்தான் தட்பவெப்பமும் சமநிலையில் இருக்கும். அப்பதான் சூழல் காக்கப்படும். ஆனா, இன்னைக்கு பல பறவைகளும், விலங்குகளும், தாவரங்களும் அழியும் தருவாயில் இருக்கு.

இதற்கான விழிப்புணர்வை ஏற்படுத்தணும்னு தோணுச்சு. அதனால, அழிவின் விளிம்பில் உள்ளவற்றை ஓவியமாக ஆவணப்படுத்தியிருக்கேன்...’’ என ஓவியங்களைக் காட்டியபடியே பேசுகிறார் ராகவன் சுரேஷ். இவர் கோவையிலுள்ள ஒன்றிய அரசின் இந்திய தாவர மதிப்பீட்டு ஆய்வகத்தில் ஓவியராகப் பணிபுரிந்து வருபவர். அவரின் அந்த ஓவியங்கள் ஒவ்வொன்றும் அத்தனை தத்ரூபமாக மிளிர்கின்றன.

முதல்ல மேற்குத்தொடர்ச்சி மலையிலிருந்து தொடங்கினேன். இங்க பூக்கும் தாவரங்கள் மொத்தம் 7 ஆயிரத்து 402 இருக்குது. 139 வனவிலங்குகளும், 508 பறவைகளும் உள்ளன. மீன்கள் 290ம், இருவாழ்விகள் 176ம், பூச்சிகள் 6 ஆயிரம் வரையும் இருக்கின்றன. இது பரந்துவிரிந்த பகுதி. சுமார் ஒரு லட்சத்து 60 ஆயிரம் சதுரகிமீ கொண்டது.

இந்த 508 பறவைகள்ல 30 பறவைகளும், 139 வனவிலங்குகள்ல 18 வனவிலங்குகளும், பூக்கும் தாவரங்கள்ல 138 தாவரங்களும் அழிவின் விளம்பில் உள்ளவை. இந்தப் பட்டியலை எடுத்ததும் அதனை வன அறிவியலாளர்கள், வன அதிகாரிகள், ஆர்வலர்கள், போட்டோகிராபர்கள் உதவியுடன் ஓவியமாகத் தீட்டினேன். அவங்களும் ஒரு சமூக விழிப்புணர்வாக செய்றேன்னு சொன்னதும் எனக்கு ரொம்பவே உதவினாங்க. அவங்களுக்கு நன்றி சொல்லணும்.

‘‘இது முடிஞ்ச நேரம் இந்தியா முழுவதும் அழியும் தருவாயில் உள்ளவற்றை ஏன் ஆவணப்படுத்தக்கூடாதுனு தோணுச்சு. அப்படியாக இந்தியாவில் மட்டும் 50 பறவைகள் இருந்துச்சு. அதேபோல வனவிலங்குகளும் 50 இருந்தன. இவற்றையும் வரைஞ்சிருக்கேன். அந்தமான்ல உள்ள எண்டமிக் தாவரங்களை மட்டும் தனியா வரைஞ்சேன்.

இது மட்டும் இன்னும் கொஞ்சம் வரைய வேண்டியிருக்கு. இப்ப மொத்தமாக பார்க்கிறப்ப 80 பறவைகளும், 68 வனவிலங்குகளும், 138 தாவரங்களும் வரைஞ்சு ஆவணப்படுத்தி வைச்சிருக்கேன். இந்தியாவில் நிறைய ஓவியர்கள் இருக்காங்க. அவங்க இந்தமாதிரி ஒரு சப்ஜெக்ட்டாக எடுத்து அதை சயின்டிஃபிக்காக செய்திருக்காங்களானு தெரியல. எனக்குத் தெரிஞ்சு இதுதான் முதல்முறை.  

‘‘எனக்கு இதையெல்லாம் டிஸ்பிளே செய்து விழிப்புணர்வு ஏற்படுத்தணும்னு ஆசை. என் நோக்கமும் அதுதான். ஆனா, இப்ப அதுக்கு பொருளாதாரம் இடம் கொடுக்கல. ஏன்னா, இதையெல்லாம் என் கைகாசு போட்டுதான் செய்திருக்கேன். சுமார் 300 ஓவியங்கள் இருக்குது. எல்லாத்தையும் காட்சிக்கு வைக்க பெரிய இடம் தேவை.

அதுக்கு செலவு ரொம்பப் பிடிக்கும்.ஆனா, என் பணியைப் பார்த்திட்டு கடந்த ஆண்டு கோவை புத்தகக் காட்சியில் கடைசி ரெண்டு நாட்கள் ஓவியத்தைக் காட்சிக்கு வைக்க இடம் தந்தாங்க. அப்ப கொடிசியாவின் செயலாளராக இருந்த ரமேஷ் சார்தான் எனக்கு கட்டணம் இல்லாமல் இடம் வழங்கி ஆதரவு தந்தார். என் அளப்பரிய பணியை நிறைய கல்லூரி, பள்ளி மாணவர்களும், பொதுமக்களும் பார்த்து வியந்தாங்க. நல்ல ரீச் கிடைச்சது.