ஆதிசங்கரருக்கு ஞானம் கிடைத்த இடம் புதைகிறது..!

இந்தியாவின் புனித நகரங்களில் ஒன்றாகக் கருதப்படும் இடம் ஜோஷிமத். 8ம் நூற்றாண்டில் ஆதிசங்கரர் ஞானம் பெற்றதாக சொல்லப்படும் இந்த இடம், இப்போது இமயமலைக்கு ஆன்மிகப் பயணம் மேற்கொள்பவர்களுக்கு நுழைவாயிலாக இருக்கிறது. ஆயிரக்கணக்கான மக்கள் வசிக்கும் இயற்கை எழில் கொஞ்சும் இந்த ஊர் இப்போது தேசிய அளவில் தலைப்புச் செய்தியாகி இருக்கிறது. காரணம், அந்த நகரம் கொஞ்சம் கொஞ்சமாக மண்ணுக்குள் புதையத் தொடங்கியிருப்பதுதான்.

எனவே ஜோஷிமத் நகருக்கான பாதைகள் மூடப்பட்டுள்ளன. அங்கு வசிக்கும் மக்கள் உடனடியாக வீடுகளில் இருந்து வெளியேற்றப்பட்டுள்ளனர். சுற்றுலாப் பயணிகள் தங்குவதற்காக அங்கு அமைக்கப்பட்டுள்ள ஹோட்டல்கள் மூடப்பட்டுள்ளன. ஜோஷிமத் நகரம் முழுக்க புதைந்து போகாமல் இருப்பதற்கு தேவையான நடவடிக்கைகள் பற்றி அதிகாரிகளுடன் சிறப்பு ஆலோசனைகளை நடத்தி வருகிறார் பிரதமர் மோடி.உத்தரகண்ட் மாநிலத்தில் உள்ள சமோலி என்ற மாவட்டத்தில்தான் ஜோஷிமத் நகரம் அமைந்துள்ளது.

இமயமலையின் அடிவாரத்தில் உள்ள இந்நகரம் ஒருகாலத்தில் எந்தப் பிரச்னையும் இல்லாமல் அமைதியாகத்தான் இருந்தது. இயற்கையோடு இணைந்து வாழ ஏற்ற பகுதியாகவும், தூய காற்று, மெல்லிய குளிர், மாசில்லாத சுற்றுச்சூழல் என மக்கள் விரும்பும் அத்தனை விஷயங்களையும் கொண்ட பகுதியாகவும் ஜோஷிமத் இருந்தது.

யார் கண்பட்டதோ... மாதம் ஒரு புதிய கட்டடம் மலைகளைக் குடைந்து முளைக்கத் தொடங்கியது. இது போதாதென்று ஹோட்டல்களும் தோன்றின. இதனால் மண்ணின் தன்மை மாறத் தொடங்கியது.இந்த நேரம் பார்த்து தேசிய அனல் மின் கார்ப்பரேஷன் சார்பில் Tapovan Vishnugad Hydro Power Project அந்த இடத்தில் தொடங்கப்பட்டது. இதற்கான கட்டுமானப் பணிகள் ஜோஷிமத் நகரின் புவியியலை வேகமாக சிதைக்கத் தொடங்கியது.

ஒரு பக்கம் புதிது புதிதாக முளைக்கும் கட்டடங்கள், மறுபக்கம் பிரம்மாண்ட மின் திட்டத்தின் தொடக்கம்... விளைவு- ஜோஷிமத் நகரின் மண் தனது பிடிமானத்தை இழக்கத் தொடங்கியது.
இப்போது 600க்கும் மேற்பட்ட கட்டடங்களில் விரிசல் விழ, அங்கிருந்து வெளியேற்றப்பட்டிருக்கிறார்கள் மக்கள். மற்ற கட்டடங்களுக்கு என்ன ஆகுமோ என்ற அச்சமும் ஏற்பட்டுள்ளது.

ஜோஷிமத்தில் தேவையில்லாமல் கட்டுமானப் பணிகளை மேற்கொண்டால் மண் சரிவு ஏற்படும்... நகரமே புதைந்து போகும் என்று சுமார் 70 ஆண்டுகளுக்கு முன்பே புவியியல் ஆர்வலர்கள் எச்சரித்திருந்தனர். ஆனால், அதையெல்லாம் கவனத்தில் கொள்ளாமல் தங்கள் வசதிகளுக்காக பலரும் இங்கு குடிவர, இப்போது தன்னால் தூக்க முடியாத பாரத்தை தாங்க முடியாமல் மண்ணுக்குள் புதைகிறது ஜோஷிமத் நகரம்.