கடந்த வாரம் மேற்கு வங்காளத்தைச் சேர்ந்த ஐந்து மீனவர்கள் ஒரே நாளில் லட்சாதிபதியாகி, இணையத்தில் வைரலாகிவிட்டனர். ஆம்; சுந்தரவனக்காடுகளில் ஓடுகின்ற நதியில் மீன் பிடிப்பதற்காகச் சென்றபோது அவர்களது வலையில் ராட்சத மீன் ஒன்று மாட்டிவிட்டது. இவ்வளவு பெரிய மீன் வலையில் மாட்டியதும் துள்ளிக்கொண்டே இருந்திருக்கிறது.

என்ன செய்வதென்று தெரியாமல் ஐந்து மீனவர்களும் பதறிப்போய்விட்டனர். இறுதியில் ஐந்து பேரும் ஒன்றிணைந்து அந்த மீனைக் கரைக்குக் கொண்டு வந்து சேர்த்தனர். அதன் நீளம் 7 அடி, எடை 78.4 கிலோ. தவிர, மீனின் வகை... விலை.... போன்ற எந்த விஷயங்களும் அந்த மீனவர்களுக்கு மட்டுமல்லாமல் சுற்றியிருப்பவர்களுக்கும் தெரியவில்லை.