இறைச்சி மசாலா

என்னென்ன தேவை?

எலும்பு நீக்கிய மட்டன் - 1/4 கிலோ,
மிளகாய்த்தூள் - 50 கிராம்,
தனியா தூள் - 50 கிராம்,
மஞ்சள் தூள், சீரகத்தூள், சோம்பு தூள் - தலா 10 கிராம்,
கரம்மசாலாத்தூள் - 50 கிராம்,
இஞ்சி - 1 துண்டு, பூண்டு - 5 பல்,
பட்டை - 1  துண்டு,
கிராம்பு - 6, ஏலக்காய் - 5,
பெரிய வெங்காயம் - 200 கிராம்,
தக்காளி - 2,
சின்ன வெங்காயம் - 100 கிராம்,
பச்சைமிளகாய் - 5,
தேங்காய் - 1/2 மூடி,
முந்திரி - 15 கிராம்,
எண்ணெய் - 200 மி.லி.
நெய் - 50 கிராம்,
உப்பு, கொத்தமல்லித்தழை, கறிவேப்பிலை - தேவைக்கு.

எப்படிச் செய்வது?

மட்டனை சிறு துண்டுகளாக வெட்டிக்  கொள்ளவும். பெரிய வெங்காயம், தக்காளி, பச்சைமிளகாயை பொடியாக நறுக்கவும். சின்ன வெங்காயத்தை உரித்து முழுசாக வைத்துக் கொள்ளவும். இஞ்சி, பூண்டை அரைக்கவும். தேங்காயை துருவி முந்திரியுடன் அரைத்து கொள்ளவும். கடாயில் எண்ணெயை காயவைத்து பட்டை, கிராம்பு, ஏலக்காய் தாளித்து, வெங்காயத்தை பொன்னிறமாக வதக்கி, இஞ்சி பூண்டு விழுது, தக்காளி, பச்சைமிளகாய் போட்டு வதக்கவும்.

பின் அனைத்து தூள் வகைகள், மட்டன், அரைத்த தேங்காய் விழுது, சின்ன வெங்காயம், தேவையான அளவு தண்ணீர் ஊற்றி வேகவிடவும். மட்டன் நன்கு வெந்து கிரேவி பதத்திற்கு வந்ததும் நெய், கறிவேப்பிலை, கொத்தமல்லித்தழையை தூவி சூடாக சாதத்துடன் பரிமாறவும்.