சமீபத்தில் நடந்து முடிந்த பீகார் சட்டமன்றத் தேர்தலில் வெற்றி பெற்று மிகக் குறைந்த வயதிலேயே MLAவான பாஜக இளம் பெண் வேட்பாளர் மைதிலி தாக்கூர் ஒரு நாட்டுப்புற பாடகி. 

தன் கலைத் திறமையை தன் இணையப் பக்கங்களில் வெளிப்படுத்தி, இளம் வயதில் MLA ஆனதற்கு, மைதிலி தாக்கூருக்கு இணையவாசிகள் தங்கள் வாழ்த்துக்களை பதிவிட்டு வருகின்றனர். சமீபத்தில் இவர் தமிழில் பாடி பதிவேற்றிய “கண்ணான கண்ணே” பாடல் இணையத்தில்  வைரலானது.

மைதிலியின் குரல், உச்சரிப்பு, தமிழ் மீது கொண்ட அவரின் அன்பு ஆகியவை தமிழக மக்களைக் கவரவே, “தமிழுக்கு மரியாதை கொடுத்ததற்கும், தங்களின் தேர்தல் சாதனைக்கும் பாராட்டுகள்!” என்று வாழ்த்துகளை தமிழ் ரசிகர்கள் ஏகமனதாக அள்ளிவீசி வலைத்தளத்தில் பதிவிட்டு வருகின்றனர்.

இசைத்துறையில் இருந்து அரசியலுக்கு வந்த மைதிலி தாக்கூர், பீகார் சட்டசபைக்கு 25 வயதில் தேர்ந்தெடுக்கப்பட்ட இளம் பெண் தலைவர் என்ற பெருமையை பெற்றிருக்கிறார். அலிநகர் தொகுதியில், ராஷ்ட்ரிய ஜனதா தளம் கட்சியின் முக்கிய தலைவரான வினோத் மிஸ்ராவை 12,000 வாக்குகள் வித்தியாசத்தில் தோற்கடித்து தனது வெற்றியைப் பதிவு செய்திருக்கிறார்.

ஜூன் மாதம் 25 வயதை நிறைவு செய்த மைதிலி தாக்கூர், சட்டசபை தேர்தலுக்கு சில மாதங்களுக்கு முன்புதான் பாரதிய ஜனதா கட்சியில் இணைந்தார் என்பதும் இங்கு குறிப்பிடத்தக்கது. 

தேர்தலில் தான் வெற்றியடைந்தால் தனது தொகுதியை ‘சீதாநகர்’ என பெயர் மாற்றுவேன் என இவர் பிரச்சாரம் செய்தது பெரும் சர்ச்சையையும் கிளப்பியிருந்த நிலையில், ‘‘எனக்கு இந்த வெற்றி ஒரு கனவு போல இருக்கிறது. மக்கள் என்னிடம் நிறைய எதிர்பார்க்கிறார்கள் எனத் தெரிகிறது. நான் ஒரு மகள் போல மக்களுக்கு சேவை செய்ய வேண்டும் என்பதே என் எண்ணமாக உள்ளது” என்றும் கூறியுள்ளார்.