40 வயதினைக் கடந்துவிட்டாலே ஆரோக்கியத்தின் மேல் கவனம் செலுத்த வேண்டும். அப்போதுதான் 60 வயதிலும் உற்சாகமாக செயல்பட முடியும். ஆனால், சில சமயம் நாம் எதிர்பார்க்காத நிகழ்வுகளும் ஏற்பட வாய்ப்புள்ளது. அதற்கான தீர்வு மருத்துவங்களில் இருந்தாலும், முறையாக பின்பற்றினால் கண்டிப்பாக உடல் சார்ந்த அனைத்து பிரச்னைகளில் இருந்தும் மீள முடியும். 

அப்படிப்பட்ட மருத்துவ உதவிகளை கொடுத்து வருகிறார் சென்னையை சேர்ந்த விஜய் கருணாகரன். இவர் ‘ரீவின் ஹெல்த்’ என்ற பெயரில் நிறுவனம் ஒன்றை நிர்வகித்து அதன் மூலம் பலரின் உடல் சார்ந்த பிரச்னைக்கு பாலமாக இருந்து வருகிறார்.

‘‘நான் இந்த நிறுவனத்தை நான்கு வருடங்களுக்கு முன் துவங்கினேன். அதற்கு முக்கிய காரணம் என் அம்மா. அவங்க சில காலம் பக்கவாதத்தினால் பாதிக்கப்பட்டிருந்தாங்க. அதுவரை நான் அமெரிக்காவில் வேலை பார்த்து வந்தேன். 

அவர்களை பார்த்துக் கொள்வதற்காக சென்னைக்கு வந்தேன். அப்போது கோவிட் பாதிப்பு ஏற்பட்டது. அந்த இரண்டு வருடம் என் சிந்தனை முதியவர்கள் பற்றி தான் இருந்தது. உடலில் எந்த ஒரு பாதிப்பு ஏற்பட்டாலும், அதற்கான மருத்துவ ஆலோசனைகளை முறையாக பின்பற்றினால் கண்டிப்பாக மீள முடியும் என்று புரிந்து கொண்டேன். 

என் அம்மாவை நான் கவனமாக பார்த்துக் கொண்டாலும், அவர்களால் அந்த பாதிப்பில் இருந்து மீண்டு வர முடியவில்லை. காரணம், மருத்துவ சிகிச்சைக்கு பிறகு இங்கு பெரிய அளவில் போஸ்ட் கேர் குறித்த விழிப்புணர்வு இல்லை. அதற்கு என்ன செய்யலாம் என்று சிந்திக்க ஆரம்பித்தேன். 

இதனால் ஆரம்பத்தில் குணமானாலும், நாளடைவில் தொடர் பயிற்சியின்மை காரணத்தினால் மீண்டும் பழைய நிலைக்கு தள்ளப்படுகிறார்கள். உடலில் உள்ள உறுப்புகளில் பிரச்னை ஏற்பட்டால் சிகிச்சைக்குப் பிறகு அவை சரியாக இயங்குகிறதா என்று பரிசோதனை மூலம் தெரிந்து கொள்ளலாம். 

ஆனால், பக்கவாதம், முதுகுவலி, கைவலி, ப்ரோசன் ஷோல்டர் போன்ற பிரச்னைக்கு இயன்முறை மருத்துவம் மட்டுமே தீர்வு. தற்போது இது குறித்த விழிப்புணர்வு மக்கள் மத்தியில் உள்ளதால் அதனை தொழில்நுட்பம் மூலமாக செயல்படுத்த திட்டமிட்டோம். 

அதற்கான ஆய்வில் ஈடுபட்டோம். மக்களின் தேவை என்ன? எந்தப் பிரச்னைக்கு என்ன சிகிச்சை அளிக்க வேண்டும் என்று இயன்முறை மருத்துவம் குறித்து தெரிந்து கொண்டோம். அதில் முக்கியமானது எளிதாகவும், பிடித்து செய்ய வேண்டும் என்பதில் உறுதியாக இருந்தோம். 

அடுத்து இதில் தொழில்நுட்பத்தினை எவ்வாறு பயன்படுத்தலாம் என்றும் திட்டமிடலானோம். எல்லாவற்றையும் விட அவர்களின் பிரச்னைக்கு ஏற்ப சிகிச்சைகளும் சரியாக இருக்க வேண்டும் என்பதில் உறுதியாக இருந்தோம்’’ என்றவர் ஒன்றரை வருட ஆய்வுக்குப் பிறகு சிகிச்சை முறைகளை விளையாட்டு மூலமாக செய்ய வெர்சுவல் ரியாலிட்டி தொழில்நுட்பத்தை கண்டறிந்துள்ளார்.

‘‘முழுக்க முழுக்க தொழில்நுட்பத்தினை பயன்படுத்திதான் இந்த வெர்சுவல் ரியாலிட்டி கருவியினை அறிமுகம் செய்திருக்கிறோம். கண்களில் மாட்டிக் கொண்டால் அவர்கள் முன் ஒரு திரை வரும். அதில் அவர்களின் சிகிச்சைக்கு ஏற்ப செயல்முறைகள் வரும். 

அதை அவர்கள் செய்ய வேண்டும். முழுக்க முழுக்க விளையாட்டு முறையில் வடிவமைக்கப்பட்டிருப்பதால் அவர்களும் சிகிச்சை மேற்கொள்கிறோம் என்று நினைப்பு இல்லாமல் சந்தோஷமாக செய்வார்கள். இதனால் அவர்களின் பிரச்னைக்கு தீர்வு கிடைக்கும். 

மேலும், மனசும் இளமையாக மாறும். இவை முதியவர்களுக்கு மட்டுமில்லை... பிரச்னையுள்ள அனைவரும் இந்த வெர்சுவல் ரியாலிட்டி சிகிச்சை முறையினை மேற்கொள்ளலாம்’’ என்றவர் சிகிச்சையின் செயல்பாடு குறித்து விவரித்தார்.‘‘இயன்முறை மருத்துவம் பொறுத்தவரை பிரச்னை என்னவென்று கண்டறிந்து அதற்கான சிகிச்சை மேற்கொள்வது. 

அதே சமயம் இதனை மக்கள் சரியாக செய்கிறார்களா என்று பார்க்க வேண்டும். தொடர் சிகிச்சையால் அவர்களிடம் முன்னேற்றம் இருக்கிறதா என்று கவனிக்க வேண்டும். மாற்றம் இல்லாத பட்சத்தில் வேறு சிகிச்சை முறைகளை மாற்றி கொடுக்க வேண்டும். 

ஆனால், இதில் மிகப்பெரிய சிக்கல், தொடர்ச்சியாக ஒரே சிகிச்சை முறைகளை மேற்கொள்ளும் போது அவர்களுக்கு அதன் மேல் சலிப்பு ஏற்படும். அவ்வாறு ஏற்படாமல் இருக்கதான் இந்த விளையாட்டு முறைகள். உதாரணத்திற்கு பென்க்வினை பிடித்து பனிக்கட்டி மேல் வைக்க வேண்டும்.

அல்லது கோயிலில் ஆரத்தி செய்ய வேண்டும். இதில் ஒருவர் குறிப்பிட்ட தூரம் கையினை நீட்ட வேண்டும் என்றால் அதற்கேற்ப ஆரத்தியினை நீட்டி எடுப்பது போல்  அமைத்திருப்போம். அவர்கள் குறிப்பிட்ட தூரம் கைகளை நீட்டினால்தான் ஆரத்தி தட்டினை எடுக்க முடியும். அடுத்து மரத்தில் இருக்கும் பழத்தினை பறித்து  பறவைக்கு கொடுக்க வேண்டும். 

மேலும், உறைந்த தோள்பட்டை பிரச்னை உள்ளவர்களுக்கு தனிப்பட்ட பிசிக்கல் மற்றும்  காக்னேடிவ் சிகிச்சைகள் இரண்டுமே இருக்கும். ஸ்ட்ரோக் பொறுத்தவரை அவர்களின்  மூளையில் சில பகுதி வேலை செய்யாது. 

அதனை மீட்டெடுக்க அதற்கேற்ப  கொடுக்கிறோம். இதன் மூலம் செயலிழந்த பகுதிகளை மீட்க முடியும். முதலில் பக்கவாதத்திற்கான சிகிச்சை மட்டுமே இதில் அமைத்திருந்தோம். தற்போது பார்கின்சன் மற்றும் அனைத்து நரம்பியல் சார்ந்த நோய்களுக்கான சிகிச்சைகள் மற்றும் அறுவை சிகிச்சைக்குப் பிறகு, வலி சார்ந்த மற்றும் இதயம் சார்ந்த சிகிச்சைகளும் உள்ளன. ஒருவரின் தேவைக்கேற்ப எளிதாக செய்யும் படி அமைத்திருக்கிறோம். 

முதலில் நோயாளியின் பிரச்னைகளை இயன்முறை மருத்துவரிடம் கூறுவோம். அவர் அதற்கான சிகிச்சை முறைகளை விளக்குவார். அதற்கேற்ப நாங்க வெர்சுவல் ரியாலிட்டியில் எவ்வாறு அமைக்கலாம் என்று திட்டமிடுவோம். ஆனால், இதில் மிகப்பெரிய சவால் என்றால் அந்த இயந்திரத்திற்கான விலை. 

அதனை எல்லோரும் வாங்க இயலாது. அவர்களுக்கு என தனிப்பட்ட ஆப் வசதியினை அமைத்திருக்கிறோம். அதன் மூலம் அவர்கள் அனைத்து சிகிச்சைகளையும் பெறும் படி வசதி படைத்திருக்கிறோம். மேலும், எங்களின் கருவியினை மருத்துவமனை மட்டுமில்லாமல் தனிப்பட்ட கிளினிக் ஒன்றையும் அமைத்திருப்பதால், அங்கும் சிகிச்சையினை பெற்றுக் கொள்ளலாம்.

சென்னையை தொடர்ந்து விழுப்புரம், பண்ருட்டி, சேலம், தஞ்சாவூர், தேவக்கேட்டை, புதுச்சேரி மற்றும் திருச்சியில் எங்களின் கிளினிக் செயல்பட்டு வருகிறது. இயன்முறை மற்றும் இளங்கலைப் பட்டம் பெற்றவர்களுக்கு பிரான்சைசி முறையில் வழங்கி வருகிறோம். இதுவரை 2000த்துக்கும் மேற்பட்ட நோயாளிகளுக்கு சிகிச்சை அளித்திருக்கிறோம்.

இதைத் தொடர்ந்து ஆன்லைன் முறையிலும் அமைக்க இருக்கிறோம். இன்னும் 2 வருடத்தில் 100 கிளினிக் மற்றும் 200க்கும் மேற்பட்ட மருத்துவமனைகளை இணைக்க ேவண்டும் என்பதுதான் எங்களின் டார்கெட்’’ என்றார் விஜய் கருணாகரன்.