இந்தக் காயை சமைத் தாலே, சிறியவர்கள் மட்டுமல்ல... பெரியவர்களும் முகம் சுழித்தபடி உணவை ஒதுக்கும் கசப்பு..! இதன்மேல் எப்போதும் ஒரு தீரா வெறுப்பு..!! என்றாலும்... ‘‘சுவைதான் கசப்பு. இதுதரும் பலன்களோ இனிப்பு..!” ஆம்..! ‘‘தாவர இன்சுலின்” என்று கொண்டாடப்படுகிற பாகற்காய் பற்றி இன்றைய இயற்கை 360° தெரிந்து கொள்வோம் வாருங்கள்..!

ஆனால், ‘‘கசக்குற வாழ்வே இனிக்கும்..!” என்பதை இந்தக் கசப்புக்காய்கள் தமது அரிய மருத்துவ குணங்கள் வாயிலாக நமக்கு உறுதிசெய்கின்றன. குறைந்த கலோரிகளும், நிறைந்த நீர்த்தன்மையும், நிறைந்த நார்ச்சத்தும் உள்ள பாகற்காயில் வைட்டமின்கள் C, B, E, குறிப்பாக தையமின், நியாசின், ஃபோலிக் அமிலம் உள்ளிட்ட பி வைட்டமின்களும், கால்சியம், பொட்டாசியம், பாஸ்ஃபரஸ், மெக்னீசியம், இரும்புச்சத்து, மாங்கனீஸ் உள்ளிட்ட கனிமச்சத்துகளும் அதிக அளவில் காணப்படுகின்றன. 

இதுதவிர Carotene, Charantin, Triterpene, Vivien, Polypeptide P, Catechin, Epicatechin, Gallic acid ஆகிய தாவரச் சத்துகளும் ஆன்டி ஆக்சிடென்டுகளும் நிறைந்து காணப்படும் பாகற்காய், நமது அன்றாட பயன்பாடான வாழைப்பழம், கீரை, ப்ரோக்கோலி ஆகியவற்றைவிட இருமடங்கு சத்துகள் உள்ளதாக  சொல்லப்படுகிறது.

சர்க்கரை நோயைக் கட்டுக்குள் வைக்க பாகற்காய் பயனளிக்கிறது என்பதை நம்மால் மறுக்க முடியாது. ‘தாவர இன்சுலின்’ (Plant insulin) என்று முன்மொழியும் பாரம்பரிய சீன மருத்துவம், சர்க்கரை நோயைக் கட்டுப்படுத்தும் தாவரங்களில் முதன்மைத் தாவரமாக இதனை குறிப்பிடுகின்றது. 

பாகற்காயில் உள்ள அதிகப்படியான நார்ச்சத்தும் நீர்த்தன்மையும் பசியைக் கட்டுப்படுத்தி, எடையைக் குறைக்கவும், மலச்சிக்கலைப் போக்கவும் உதவுவதுடன், இதன் டெர்பீன்கள் மற்றும் பெப்டைட்கள், குடல் புழுக்கள், குடல் ஒட்டுண்ணிகள் உள்ளிட்ட கிருமிகள் தாக்கத்தை மட்டுப்படுத்த துணைபுரிகிறது. 

பாகற்காய் மட்டுமன்றி அதன் தளிர்களும், பழங்களும், விதைகளும் ஆரோக்கியம் நிறைந்தவை என்பதால், இந்த பாகற்காய் இலைகள் மற்றும் தளிர்கள் கொண்டு தயாரிக்கப்படும் டீட்டாக்ஸ் (detox) பானங்கள், குறிப்பாக தேநீர், சூப், ஜூஸ் மற்றும் ஸ்மூத்தீ சமீபகாலமாக பிரபலமாகி வருகின்றன. 

பழுத்த மஞ்சள் அல்லது சிவப்பு நிற பாகற்காயில் கசப்புத் தன்மையும், மருத்துவ ஆற்றல்களும் சற்றுக் குறைவாகவே இருக்கும் என்றாலும், இதிலும் வைட்டமின் சி மற்றும் கரோட்டீன்கள் சருமத்திற்கு நன்மைகள் பல தருகின்றன.