‘பிச்சை புகினும் கற்கை நன்றே...’ என்பதற்கு ஏற்ப பிச்சை எடுத்து ஏழைப் பிள்ளைகளின் கல்விக்கு உதவும் செல்வராஜ், ஒரு மாமனிதர்.

‘சொல்றேண்ணே... சொல்றேன்’ கலாட்டா தொடரில், இமான் அண்ணாச்சி சிரிக்க மட்டுமல்ல; சிந்திக்கவும் வைக்கிறார். சின்னக் குழந்தைகளிடம் பெரிய பெரிய விவகாரங்கள் இருப்பது அவரால்தான் தெரிகிறது!

விஜய்சேதுபதி நடிகைகளை சிபாரிசு செய்கிறாரோ இல்லையோ... சும்மா சிபாரிசு செய்யிங்க பாஸ் என நீங்களே தூண்டி விடுவீங்க போலிருக்கே! அந்தக் கேள்வியிலதான் என்னா குறுகுறுப்பு!

‘மஞ்சள் பல்தான் ஆரோக்கியம்’ என மருத்துவர்கள் வழியாகத் தெரிவித்து மஞ்சள் முகமே வருக எனப் பாட வைத்துவிட்டீர்கள். கூடவே, பற்கள் பளிச் என்று சுத்தமாக இருக்க இயற்கை டிப்ஸ் தந்துள்ளதற்கு சபாஷ்!

‘ஹன்சிகாவின் உயிர் கிருஷ்ணன்தான்’ எனத் திரி கிள்ளிப் போட்டு... பின்பு, ‘கடவுள் கிருஷ்ணன்’ என்று ஜகா வாங்கிவிட்டீர். அந்த முதல் வரியில் சிம்பு மனது என்ன பாடுபட்டிருக்கும்! இரக்கமில்லையா உமக்கு?

மாற்றுப் பாலினத்தவர்களின் சோகங்கள் குறித்த மனுஷ்ய புத்திரனின் வருத்தங்கள் நியாயமானவை. ஆனால், அவர்களில் பலரும் தவறான பாதையை விட்டு விலகாத நிலையில் எப்படி அங்கீகாரம் கிடைக்கும்?

ஏற்கனவே நம்மூரில் போலி டாக்டர்கள் அதிகம். இதில், எம்.பி.பி.எஸ் தேர்வில் மாணவர்கள் ஹைடெக்காக காப்பி அடிக்கும் செய்தியைப் படித்து, தலையே சுற்றியது. ஒழுங்காய் பரீட்சை எழுதி பாஸான டாக்டரிடம் தலைசுற்றலுக்கு சிகிச்சை பெறலாம் என்றிருக்கிறேன்.

விண்ணை முட்டும் வெங்காய விலை உயர்வுக்கு மத்திய அரசின் ஏற்றுமதிக் கொள்கையும் காரணம் என்பதைப் படித்து மனம் வேதனையடைந்தது. வெங்காயம்... அதன் விலையால் மக்களுக்கு மனக்காயம்!

‘சிக்கலில் தவிக்கும் படமாச்சே’ என்ற சென்டிமென்ட் இல்லாமல், ‘தலைவா’ படத்துக்கு நடுநிலை விமர்சனத்தைத் தந்துவிட்டீர்கள். பல தமிழ்ப் படங்களின்
கலவைதான் ‘தலைவா’ என்றது, நறுக் பன்ச்!

காதில் பூ சுற்றும் நம் ஆட்கள் மத்தியில், உலகத்திற்கே பூ விற்கும் நம்பிக்கைத் தமிழர், முகமது எஹியாவின் தன்னம்பிக்கை அசரடித்தது. அவர் முயற்சி மேலும் சிறக்க
ஆசிகள்!