‘‘அரெஸ்ட் வாரன்ட்டுக்கு நம்ம தலைவர் மஞ்சள், குங்குமம் எல்லாம் வைக்கிறாரே... ஏன்?’’
‘‘எல்லா சமயத்திலும் நீதிமன்றத் தீர்ப்பை நாம ‘கௌரவிக்கணும்’னு அவர்கிட்ட யாரோ சொன்னாங்களாம்...’’

‘‘தலைவருக்கு டாக்டர் பட்டம் கொடுத்தது தப்பாப் போச்சா... ஏன்?’’
‘‘இலவச மருத்துவ முகாம் நடத்தி கட்சிக்கு தொண்டர்களை சேர்க்கப் போறேன்னு சொல்லிக்கிட்டுத் திரியறாரே..!’’

அம்மாவின் கை அன்பைக் காட்டும்; அப்பாவின் கை அறிவைக் காட்டும்; நண்பனின் கை ஃபிகரைக் காட்டும்... ஆனால், ஃபிகரின் கை டாட்டா காட்டும்!
- சும்மாவே காட்டு காட்டுன்னு காட்டுவோர் சங்கம்

‘‘சுற்றுப்பயணம் போனப்ப தலைவர் லாட்ஜ்ல ரூம் போட்ட செலவா இவ்வளவும்..?’’
‘‘கூடவே அவர் லார்ஜ் போட்ட செலவும் இல்லே சேர்ந்திருக்கு..!’’

‘‘கல்யாணம் முடிஞ்சு ரெண்டு வருஷ மாகுது... இன்னும் பணத்தைத் தராம இழுத்தடிக்கிறான்...’’
‘‘வரதட்சணை பணமா..?’’
‘‘இல்லைங்க... மொய்ப் பணம்!’’

என்னதான் சோகமான மூட்ல தண்ணி அடிச்சாலும் ‘சியர்ஸ்’னுதான் சொல்வாங்க; ‘டியர்ஸ்’னு சொல்லி அழ மாட்டாங்க!
- சரக்கு அடிக்க காசில்லாமல், பாட்டில் வாசனையை முகர்ந்து போதை ஏற்றிக் கொள்வோர் சங்கம்

‘‘மகளிரணித் தலைவி ஏன் கோபமா இருக்காங்க..?’’
‘‘கறுப்பா இருக்கிற அவங்களை ‘எங்கள் கட்சியின் மின்வெட்டே’ன்னு யாரோ வர்ணிச்சுட்டாங்களாம்...’’