முத்தமிழறிஞர், கலைஞர் மு.கருணாநிதியின் நூற்றாண்டு விழா தொடங்கியிருக்கிறது. 13 முறை சட்டமன்ற உறுப்பினராகவும், ஐந்து முறை தமிழ்நாட்டின் முதல்வர் பதவியையும் அலங்கரித்த ஒரு மகத்தான மனிதரின் நூற்றாண்டு இது.

பத்திரிகையாளராக, எழுத்தாளராக, கவிஞராக, வசனகர்த்தாவாக, அரசியல்வாதியாக... எனப் பல துறைகளில் அவரின் பன்முக ஆற்றலும், ஆளுமையும் வியக்கத்தக்க ஒன்று. இந்த நூற்றாண்டு கொண்டாட்டத்தையொட்டி அவற்றை கொஞ்சம் பின்நோக்கி பார்க்கலாம்.

இந்நேரம், ஏ.எஸ்.ஏ.சாமியிடமிருந்து அவரின் ‘ராஜகுமாரி’ திரைப்படத்திற்கு வசனம் எழுத வேண்டுமென வந்த அழைப்பை ஏற்றுக் கொண்டார் கலைஞர். 1946ம் ஆண்டு ‘ராஜகுமாரி’ படத்திற்கு வசனம் எழுதினார். அங்கிருந்து கலைஞரின் சினிமா பயணம் தொடங்கியது.

பிறகு, ‘அபிமன்யூ’, ‘மருதநாட்டு இளவரசி’, ‘மந்திரிகுமாரி’, ‘பராசக்தி’, ‘மனோகரா’, ‘பூம்புகார்’, ‘மறக்கமுடியுமா’, ‘இருவர் உள்ளம்’, ‘வண்டிக்காரன் மகன்’, ‘பாலைவன ரோஜாக்கள்’, ‘நியாயத் தராசு’, ‘பொன்னர் சங்கர்’... என 65 ஆண்டுகால திரைத்துறை வாழ்க்கையில் அறுபதுக்கும் மேற்பட்ட படங்களுக்கு திரைக்கதை, வசனம், பாடல்கள் எழுதியிருக்கிறார் கலைஞர்.

1952ல் கலைஞர் கதை, வசனம் எழுதி வெளியான ‘பராசக்தி’ திரைப்படம், தமிழ்த் திரையுலக வரலாற்றில் மிகப்பெரிய திருப்புமுனையை ஏற்படுத்தியது. தமிழகத்தின் புகழ்பெற்ற நடிகராக சிவாஜி கணேசனை அறிமுகப்படுத்தியது. ‘பராசக்தி’ திரைப்படத்தில் இடம்பெற்ற சமூக நோக்கிலான கூர்மையான வசனங்கள் திரைப்படத் துறையை புதிய பாதைக்கு அழைத்துச் சென்றது.

இலக்கியத்திலும் தனித்துவமான ஆளுமை செலுத்தியவர் கலைஞர். 10 சமூக நாவல்களும், 6 சரித்திர நாவல்களும், 44 சிறுகதைகளும் எழுதியிருக்கிறார். தவிர தன் வரலாறு, குறளோவியம், திருக்குறள் உரை, தொல்காப்பியப் பூங்கா, கவிதைகள், கட்டுரை நூல்கள், பயணநூல், பொன்மொழிகள் என எண்ணற்ற படைப்புகளைப் படைத்துள்ளார்.