ஒன்றோ… இரண்டோ அல்ல. நூற்றுக்கணக்கான விழிப்புணர்வு வீடியோக்கள். தவிர, எக்கச்சக்க எலக்டரானிக்ஸ் தகவல்கள் என யூடியூப்பிலும், இன்ஸ்டாகிராமிலும் அசத்தி வருகிறார் சுபியான். அவரின், ‘AR7 TECH’ சேனலுக்கோ அல்லது ar7_tech இன்ஸ்டா ஐடிக்கோ போனால், ‘தேவையில்லாத லிங்க்கை திறக்காதீங்க.

திறந்தால் என்னவாகும்’ என்பதில் தொடங்கி, ‘ஏன் சார்ஜ் போட்டுக்கொண்டே செல்போன் பேசக்கூடாது, வாட்ஸ்அப் காலினை ரிக்கார்டு செய்வது எப்படி...’ என ஏகப்பட்ட பயனுள்ள விஷயங்களை வீடியோக்களின் வழியே அள்ளித் தெளிக்கிறார்.

‘‘2019ல்தான் யூடியூப் சேனல் ஆரம்பிச்சேன். பிறகு, இன்ஸ்டாவுல பக்கம் ஓப்பன் பண்ணினேன். எல்லாவற்றையும் கொஞ்சம் கொஞ்சமாக கத்துக்கிட்டேன். எந்த ஒரு விஷயத்தையும் வீடியோவாக போஸ்ட் பண்றதுக்கு முன்னாடி நான் முதல்ல செய்து பார்த்திடுவேன்.  அப்பதான் தவறில்லாமல் தகவல்களைத் தரமுடியும்.

அதனாலதான் இத்தனை ஃபாலோயர்ஸ், வியூவர்ஸை பெறமுடிஞ்சது...’’ என்கிற சுபியானுக்குப் பூர்வீகம் வேலூர்.‘‘நான் பிறந்து வளர்ந்தது வேலூர்ல. இப்ப குடியாத்தம் அருகே மேல்ஆலத்தூர்னு ஒரு கிராமத்துல வசிக்கிறோம். அப்பா அப்துல் ரஹ்மான் ரியல் எஸ்டேட் பிசினஸ் செய்றார். நான் ஆறாம் வகுப்பு படிக்கிறப்ப எலக்ட்ரானிக்ஸ்ல ஆர்வம் வந்துச்சு.

அப்பா பெயர் அப்துல் ரஹ்மான் என்பதையும், என் பெயர் ஆங்கிலத்துல ஏழு எழுத்து வரும் என்பதால் 7 என்றும், இதனுடன் டெக்னாலஜி, டெக்னிக்கல் என்பதை குறிக்க டெக்னும் போட்டு சேனலுக்கு பெயர் வச்சேன்.

பிறகு எலக்ட்ரானிக்ஸ் சம்பந்தமான எட்டு வீடியோஸ்… அதாவது எப்படி ஒரு பவர் பாங்க் செய்றது, எமர்ஜென்ஸி லைட்லேம் செய்றது எப்படி, பவர்கட் ஆகும்போது எப்படி சார்ஜ் பண்ணிக்கலாம்னு சில விஷயங்களை போஸ்ட் செய்தேன். அப்ப எனக்கு யூடியூப் பற்றி போதுமான அறிவு இருக்கல. அதாவது வீடியோ எப்படி எடுக்கிறது, எந்தமாதிரி கொடுக்குறதுனு எதுவும் தெரியாது. சும்மா செல்போன் கேமராவுல இந்த விஷயங்களை முன்னெடுத்தேன்.