புருஷ பிரேதம்

‘சோனி லிவ்’வில் வெளியாகி அப்ளாஸை அள்ளிக்கொண்டிருக்கும் மலையாளப்படம், ‘புருஷ பிரேதம்’. தமிழ் டப்பிங்கில் காணக்கிடைக்கிறது. நதியில் பிணம் ஒன்று மிதந்து கொண்டிருக்கும் செய்தி தீயாகப் பரவுகிறது. சப் இன்ஸ்பெக்டர் செபாஸ்டியன் தலைமையிலான காவல் படை அந்தப் பிணத்தை மீட்கிறது.

இறந்தவர் யார் என்று அடையாளம் தெரியவில்லை.இறந்தவரின் உறவினர்கள் தேடி வருவார்கள் என்று அந்தப் பிணத்தை பிணவறையில் வைத்திருக்கிறது காவல்துறை. நாட்கள் ஓடுகின்றன. இறந்தவரைத் தேடி யாரும் வரவில்லை. அனாதைப் பிணம் என்று கருதி காவல்துறையே பிணத்தை அடக்கம் செய்துவிடுகிறது.

சில நாட்கள் கழித்து சூசன் என்ற பெண், இறந்தவர் எனது கணவர் என்று காவல் நிலையத்துக்கு வருகிறாள். அவர் உன் கணவர் இல்லை என்று காவல்துறை சாக்குப் போக்கு சொல்லி சமாளிக்கிறது.

அந்தப் பெண் நீதிமன்றத்துக்குச் செல்கிறாள். பிணத்தைத் தோண்டி எடுத்து சூசனிடம் காட்டுமாறு நீதிமன்றம் உத்தரவிடுகிறது. புதைத்த இடத்தில் அந்தப் பிணம் இல்லை. சூடுபிடிக்கிறது திரைக்கதை. சீரியஸான கதையை நகைச்சுவை ததும்ப சொல்லியிருக்கின்றனர். கதாபாத்திரங்களின் தேர்வும், நடிப்பும் படத்துக்கு பலம். படத்தின் இயக்குநர் கிரிஸண்ட்.

‘நெட்பிளிக்ஸி’ல் நேரடியாக வெளியாகி, டாப் டிரெண்டிங்கில் இடம்பிடித்திருக்கும் ஆங்கிலப்படம், ‘சுப்பா’. தமிழில் டப்பிங்கிலும் பார்க்கலாம். ஓர் அரிய வகை விலங்கு சுப்பாகாப்ரா. மருந்துத்துறையில் புரட்சி செய்யும் அளவுக்கு மருத்துவ குணங்கள் நிறைந்த ஒரு விலங்காக கருதப்படுகிறது சுப்பா.

உண்மையில் சுப்பா என்ற ஒரு விலங்கே கிடையாது. அது ஒரு கட்டுக்கதை என்றும் சொல்கின்றனர். இந்நிலையில் மெக்சிகோவில் சுப்பாவைத் தேடி அலைகிறார் விஞ்ஞானி குயின்.  அவரது கண்ணில் ஒரு குட்டியும், அம்மாவும் கண்ணில் படுகிறது. அவரது குழு இரண்டு சுப்பாக்களையும் துரத்திச் செல்கிறது. இரண்டும் தப்பித்துவிடுகிறது.