‘ஃப்ரெண்ட்ஸ்’ திரைப்படத்தில் விஜய்யின் சின்ன வயது கேரக்டரில் வந்து அசத்தியிருப்பார் பரத் ஜெயந்த். அதற்கு முன்பே 90ஸ் கிட்ஸ்களுக்கு நன்கு பரிச்சயமான முகம் பரத். சன் டிவியில் ஒளிபரப்பான ‘ஜீபூம்பா’ குழந்தைகள் தொடர் முதல் ஏராளமான சீரியல்களில் நடித்திருக்கிறார். 

‘ஃப்ரெண்ட்ஸ்’ திரைப்படத்திற்குப் பிறகு சில படங்கள், சீரியல்கள் என டீன் ஏஜ் பருவம் வரை பிரபலமாக இருந்தவர் சட்டென காணாமல் போனார். இதோ மீண்டும் ‘த டிக்கிள் ட்ரக்’ என்னும் ஐஸ்கிரீம் ட்ரக் மூலம் எங்கும் எதிலும் டிரெண்டாகிக் கொண்டிருக்கிறார்.

எனக்கு மிகப்பெரிய பலம்னா என்னுடைய நண்பர்கள்தான். நான் விளம்பரக் கம்பெனியில் சேரும்பொழுது என்கூட நண்பர்களானவங்கதான் இப்பவும் என் கூட பயணம் செய்துட்டு இருக்காங்க. அம்மா இறந்து ஏழு வருஷம் ஆகிடுச்சு.

அதிலிருந்து வெளியே வரும்பொழுது எனக்கு கை கொடுத்தது என்னுடைய வேலையும் என்னுடைய நண்பர்களும்தான்...’’ என்னும் பரத் ஜெயந்த் மூன்று மாதங்களுக்கு முன்பு ஒரு ஐஸ்கிரீம் ட்ரக் கொண்டு வரலாமே என முடிவெடுத்திருக்கிறார்.

இந்த பிசினஸை ஆரம்பிக்கிறதுக்கு ஒரு மாதம் முன்பு வரை கூட சென்னை முழுக்க தேடிப் பார்த்தேன். எங்கயும் ஐஸ்கிரீம் ட்ரக் என் கண்ணில் படவே இல்ல. ஆனா இருபது முப்பது வருடங்களுக்கு முன்பே டாம் & ஜெர்ரி கார்ட்டூன் தொடங்கி நாம பார்த்து வளர்ந்த அத்தனை கார்ட்டூன்களிலும், ஹாலிவுட் படங்களிலும் ஐஸ்கிரீம் வேன் ரொம்ப பிரபலம்.

‘த டிக்கிள் ட்ரக்’கைப் பொறுத்தவரை ஐஸ்கிரீம்தான் பிரதானம். இதிலே இருந்து வேறு பெயர்கள்ல கிளைகள் உருவாக்கி மத்த உணவுகள் சார்ந்த பிஸினஸ்கள் தொடங்கும் பிளான் இருக்கு.