எதிர் நீச்சல் சீரியல் அசத்தலான டிராவல்-சமையலறை பெண்களின் சாதனைக் கதை!

சிறந்த கதையம்சம், விறுவிறுப்பான காட்சிகள், நச்சென்ற வசனங்கள், சுவாரஸ்யமான திருப்பங்கள்... எனப் பார்வையாளர்களை தினம் தினம் ரசிக்க வைத்துக் கொண்டிருக்கும் தொடர் ‘எதிர்நீச்சல்’. சீரியல்கள் பார்க்காதவர்கள் அல்லது சீரியல்களை விமர்சனம் செய்பவர்கள் கூட இந்த சீரியலைப் பார்த்து அவ்வளவு குதூகலம் அடைகின்றனர் என்பதே உண்மை. அதுமட்டுமல்ல. இந்த சீரியலுக்கென தனியாக ஃபேன்ஸ் கிளப்களும், வாட்ஸ்அப் குழுக்களும்கூட நிறைய இருக்கின்றன.

இப்படி உலகம் முழுவதுமுள்ள தமிழர்களுக்கு, குறிப்பாக பெண்களுக்கு எனர்ஜி பூஸ்ட்டாக இருக்கும் ‘எதிர்நீச்சல்’ குடும்பத்தை சந்திக்கச் சென்றோம். ஒரு திருமண மண்டபத்தில் ஆதிரையின் நிச்சயதார்த்தத்தில் அனைவரும் கூடியிருந்தனர். நம்மிடம் முதலில் எதிர்ப்பட்டார், ஆதி குணசேகரனாக மக்கள் மனதில் நீங்கா இடம்பிடித்திருக்கும் நடிகர் மாரிமுத்து.‘‘55 ஆண்டுகளாக என் கூடவே ஒட்டியிருந்த என் நிஜப்பெயர் இப்ப ஆதி குணசேகரன்னு மாறியிருக்கு. காரணம் ‘எதிர்நீச்சல்’ சீரியல். நான் சினிமா துறைக்கு வந்து 35 ஆண்டுகள் ஆகுது. உதவி இயக்குநர், இணை இயக்குநர், இயக்குநர்னு கடந்து வந்த பாதை நீண்ட பயணம். அதுல சின்னத்திரை என்பது இப்ப என் நிகழ்கால டிராவல்.

இவ்வளவு பெரிய கதாபாத்திரம் எனக்கு கிடைச்சிருப்பது என் பாக்கியம்னுதான் சொல்லணும். ‘எதிர்நீச்சல்’ல நடிக்க முதல்முதலாக திருச்செல்வம் சார் ஆபீசில் இருந்து அழைச்சாங்க. சும்மா போய் பார்ப்போமேனுதான் போனேன். அதுக்கு முன்னாடி எனக்கும் திருச்செல்வம் சாருக்கும் பழக்கமே இல்ல. சேர்ந்து வேலை பார்த்ததும் இல்ல. அதுதான் எங்கள் இருவருக்குமான முதல் சந்திப்பு. தவிர இதுக்கு முன்னாடி சீரியல்ல நடிச்சதும் இல்ல.

இந்தத் தொடர்ல நான் நடிக்கிற கதாபாத்திரத்தை மூன்று மணிநேரம் சொன்னார். எனக்கு ஏற்ற கதை. என் மொழிக்கு வசதியான கதை. இதை மிஸ் செய்யக்கூடாதுனு நினைச்சேன். இந்தக் கதைக்கு எஞ்சின் மாதிரியான கேரக்டர் எனக்கு அமைஞ்சது ரொம்பப் பெருமையாக இருக்கு. இந்தத் தொடர்ல நடிக்க ஆரம்பிச்சதுக்குப் பிறகு எதிர்பார்க்காத உலகளாவிய ரீச் கிடைச்சிருக்கு. மக்கள் என்னை பெரிசா கொண்டாடுறாங்க. இந்தத் தொடர்ல நான் பேசுற ‘ஏம்மா... ஏய்...’ அவ்வளவு ஹிட்டாகி இன்னைக்கு தேசியகீதம் மாதிரி உலக முழுக்கப் பரவிடுச்சு. இந்தளவுக்கு மீம்ஸ் ஆகும், டிரண்டிங் ஆகும்னு நான் எதிர்பார்க்கல.  

தொடர்ந்து மக்கள் சப்போர்ட் செய்யணும். அது எங்களுக்கு இன்னும் எனர்ஜியைக் கொடுக்கும்...’’ என முத்தாய்ப்பாக மாரிமுத்து முடிக்க, ஷாட் முடித்து வந்தார் அவரின் தங்கை ஆதிரைச்செல்வி ஆக நடிக்கும் சத்யா. ‘‘இதுல என் ஆதிரை கேரக்டருக்கும் நல்ல ரெஸ்பான்ஸ் கிடைச்சிருக்கு. இப்ப எல்லோரும் அடையாளம் கண்டு அவங்க வீட்டுல ஒருத்தர்மாதிரி பேசுறதும், விசாரிக்கிறதும் சந்தோஷமாக இருக்கு.

நான் சன் மியூசிக்ல ஆங்கராக இருந்தப்ப சேனல் வழியாக ‘அருவி’ சீரியல்ல வாய்ப்பு கிடைச்சது. ‘அருவி’யில் மலர்னு ஒரு கேரக்டர் பண்ணிட்டு இருந்தேன். அப்ப சேனல்ல இருந்து ‘எதிர்நீச்சல்’னு ஒரு சீரியல் வரப்போகுது. பண்றீங்களானு கேட்டாங்க. அப்பதான் திருச்செல்வம் சார்கிட்ட இருந்து அழைப்பு. முதல்ல பண்ண வேண்டாம்னுதான் இருந்தேன். ஆனா, சார் பேசியிருந்ததால போய் மீட் பண்ணிட்டு வந்திடலாம்னு போனேன். அங்கபோய் கதையை கேட்டதும் பிடிச்சது. இருந்தும் எனக்குள்ள நெகட்டிவ் கேரக்டர் பண்ணலாமா... வேண்டாமானு ஒரு குழப்பம் இருந்தது.

சார் ரொம்ப நம்பிக்கை கொடுத்தார். போகப்போக உங்க கேரக்டர் மாறும்னு சொன்னார். சாரை நம்பி ஆதிரை கேரக்டரை ஏற்றுக்கிட்டேன். அவர் சொன்னமாதிரி இப்ப மக்கள்
அவ்வளவு ஆதரவு  தர்றாங்க...’’ என நெகிழ்ந்தார் சத்யா. அவரைத் தொடர்ந்தார் கதையின் நாயகி ஜனனி @ மதுமிதா. ‘‘இந்த சீரியலுக்கு ஆரம்பத்துல இருந்தே மக்கள் சப்போர்ட் ரொம்ப அலாதியானது. தமிழ்ல எனக்கு இது பெரிய ரீச்னு சொல்லணும். இப்படியொரு வாய்ப்பை கொடுத்த சன் டிவிக்கும், இயக்குநர் திருச்செல்வம் சாருக்கும் நன்றி சொல்லிக்கிறேன்...’’ என அவர் முடிக்க, ஹீரோ சக்தியாக நடிக்கும் சபரி சாந்தமாக என்ட்ரி தந்தார்.  

‘‘இன்னைக்கு ‘எதிர்நீச்சல்’ ஒன்றரை ஆண்டுகளாக வெற்றிகரமாகப் போயிட்டு இருக்கு. இப்படியொரு சக்ஸஸ்ஃபுல்லான சப்ஜெக்ட்ல நானும் ஒரு அங்கமாக இருக்கேன் என்பதில் பெருமையாக இருக்கு. அதுக்கு எங்க தயாரிப்பாளரும், இயக்குநருமான திருச்செல்வம் சாருக்கு நன்றி.ஒரு வெப்சீரிஸ் புரொஜெக்ட்டுக்காக திருச்செல்வம் சார் அறிமுகம் கிடைச்சது. ஆனா, கொரோனா உள்ளிட்ட பல காரணங்களால் அது கைவிட்டுப் போயிடுச்சு. அப்புறம், ‘எதிர்நீச்சல்’ புரொஜெக்ட் பண்ற நேரம் சார் அலுவலகத்துல இருந்து மீண்டும் அழைப்பு. உள்ளே வந்தேன்.

ஆரம்பத்துல சக்தி கேரக்டரை மக்கள் திட்டித் தீர்த்தாங்க. இப்ப முழுவதும் மாறின ஒரு சக்தியை பாராட்டுறாங்க. ஆதரவு தரும் மக்களுக்கு நன்றி...’’ என சபரி நிறுத்த, மூன்றாவது மருமகள் நந்தினி கேரக்டரில் கலக்கும் ஹரிப்ரியாவிடம் பேசினோம். இவர் ப்ரியதர்ஷினியுடன் சேர்ந்து செய்யும் பகடிக்கு உலகம் முழுவதும் எக்கச்சக்க ரசிகர்கள் உள்ளனர்.

‘‘எங்க வாழ்க்கையில் மட்டுமில்ல எல்லோர் வாழ்க்கையிலும் மிகப்பெரிய ஜர்னியா ‘எதிர்நீச்சல்’ இருக்கு. நான் சன்டிவியில் நிறைய சீரியல்கள் பண்ணியிருக்கேன். முக்கியமா ‘ப்ரியமானவள்’ நல்ல பெயர் வாங்கித் தந்தது. அப்புறம், ‘கண்மணி’யில் வளர்னு நெகட்டிவ் கேரக்டர் பண்ணினேன். பிறகு, சன்டிவியில் ஆங்கராக இருந்தேன். அப்பதான் ‘எதிர்நீச்சல்’ சீரியலுக்கு அழைப்பு வந்தது. என்ன கேரக்டர்னு எதையும் கேட்கல. ஏன்னா, திருச்செல்வம் சார் என்கிற ஒரே காரணத்துக்காக ‘பண்றேன்’னு சொன்னேன்.

ஆனா, இவ்வளவு அழகான நந்தினி கேரக்டர் பண்ணுவேன்னு நினைக்கல. இப்ப நிறையபேர், ‘உங்களால் சிரிக்கிறேன். காலையில் ரொம்ப அழுத்தத்துடன் வேலைகள் செய்வேன். இரவு உங்க காமெடி பார்க்கிறப்ப அவ்வளவு மகிழ்ச்சியாக இருக்கு’னு சொல்லி கேட்கிறப்ப ரொம்ப சந்தோஷமாக இருக்கு. இந்த புகழ் எல்லாம் திருச்செல்வம் சாருக்கும், வசனகர்த்தாவான வித்யா மேடத்திற்கும்தான் போய் சேரணும்.

இந்த ஜர்னியில் நானும் ஒரு பார்ட்டாக இருக்கேன் என்பதே ரொம்ப சந்தோஷமாக இருக்கு. இது என்னுடைய மோஸ்ட் ஃபேவரைட்டாக இருக்கும்னு நம்புறேன்...’’ என ஹரிப்ரியா நிறுத்த, ரேணுகாவான ப்ரியதர்ஷினி தொடர்ந்தார். ‘‘இந்தப் பயணம் ரொம்ப சுவையானது. பெரிசா எந்தவித எதிர்பார்ப்பும் இல்லாமல்தான் இந்த சீரியலுக்குள்ள அடியெடுத்து வச்சேன். இப்ப ரொம்ப சிறப்பாக வந்திட்டு இருக்கு. நான் பேசுற வசனங்கள் எல்லாமே திருச்செல்வம் சார் பேசுறதுதான். அவர் பேசுறதை கூர்ந்து கவனிச்சாலே போதும். நமக்கு முகபாவம், மொழி எல்லாம் சரியாக வந்திடும்.