பணத்துக்காகத்தான் சினிமாவுக்கு வந்தேன்னு ஓப்பனா பேட்டி தர்றீங்களே..? ஆத்மிகா Open Talk

‘மீசைய முறுக்கு’, ‘கோடியில் ஒருவன்’ படங்களைத் தொடர்ந்து ‘கண்ணை நம்பாதே’படத்தின் மூலம் ஹாட்ரிக் அடித்துள்ளார் ஆத்மிகா. நுனி நாக்கு இங்கிலீஷ் பேசும் நடிகைகள் மத்தியில் தமிழில் விளையாடுகிறார்.

‘கண்ணை நம்பாதே’ அனுபவம் எப்படி?

ஒரு தமிழ்ப் பெண்ணா, தமிழ் நாட்டில் என்னுடைய படம் வெளியானதில் மகிழ்ச்சி. சீனியர் நடிகரான உதயநிதி, சீனியர் இயக்குநரான மாறன் ஆகியோருடன் இணைந்து வேலை செய்தது அதைவிட மகிழ்ச்சி. க்ரைம் படங்களுக்கு எப்போதும் தனி ஆடியன்ஸ் இருப்பார்கள். அதுமாதிரி இந்தப் படத்துக்கும் ரசிகர்கள் நல்ல வரவேற்பு கொடுத்தார்கள்.
உதயநிதியுடன் நடித்த அனுபவம் சொல்லுங்களேன்?

‘கண்ணை நம்பாதே’ படத்துக்காக நைட் ஷூட், ரெயின் எஃபெக்ட் காட்சி எடுக்க வேண்டி இருந்ததால் லாங் டைம் டிராவல் பண்ணினோம். அதனால் எங்களுக்கிடையே கம்ஃபோர்ட் லெவல் இயல்பா இருந்துச்சு. உதயநிதி சாரைப் பொறுத்தவரை அவர் ஹியூமர் பெர்சன்னு எல்லோருக்கும் தெரியும். சில சமயம் டேக் போகும்போதும் காமெடி பண்ணுவார். அப்போது ரீடேக் போகும். உதய் சார் சக நடிகர், நடிகைகளிடம் எந்த அழுத்தத்தையும் கொடுக்கமாட்டார். மற்றவர்களின் பார்வையில்தான் அழுத்தம் இருப்பதுபோல் தெரியும். அவர் எப்போதும் நார்மலாக இருப்பார்.

சமீபத்தில் ஒரு நிகழ்ச்சியில் காதல் தோல்விக்காக கண் கலங்கியதாகப் பேசியிருந்தீர்களே..?

என்னுடைய வாழ்க்கையில் பிரேக் அப் நடந்துச்சு. அதை மறந்து இப்போது சந்தோஷமாக இருக்கிறேன். காதல் தோல்வியினால் பாதிப்பு இருந்துச்சு. சில விஷயங்களை நம்பினேன். நாம் உண்மையைப் பேசும்போது எல்லோரும் உண்மைதான் பேசுவாங்கனு நம்புவோம். ஒவ்வொருவரும் ஒவ்வொரு சமயத்தில் சந்தர்ப்பவாதியாக இருப்பார்கள். ஏதோ ஒரு சூழ்நிலையால் லவ் பிரேக்கப் ஆச்சு. அதுக்காக அதை நெனைச்சு நான் கவலைப்படல.

மெச்சூரிட்டி கிடைக்கும்போதுதான் சில விஷயம் நமக்கு செட்டாகாது என்றும், சில விஷயம் நம் கையை விட்டுப் போகும்போது அது நமக்கு சொந்தமில்ல, அதை நெனைச்சு அழணும்னு அவசியமில்ல என்ற தெளிவும் கிடைக்கும்.புகழைவிட பணத்துக்காகத் தான் சினிமாவுக்கு வந்தேன்னு ஓப்பனா பேட்டி தர்றீங்களே?

நான் கொடுத்த பேட்டி வேறு. ஆனா, வெளியே எனக்கு பணம் முக்கியம்னு நியூஸ் வந்துடுச்சு. எப்படி வேண்டுமானாலும் சம்பாதிக்கலாம். ஆனா, நியாயமா சம்பாதிக்கணும். அது உழைப்பு மூலம் கிடைக்கணும். எல்லோரும் அதுக்காகத்தான் கஷ்டப்படுகிறோம். புகழா,பணமா என்று வரும்போது பணத்துக்கு நாம் முக்கியத்துவம் கொடுக்காமல் இருக்கமுடியாது. மனிதனின் அடிப்படைத் தேவைக்கு பணம் முக்கியம். அதுக்கு நியாயமா உழைக்கணும். ‘கர்மா’ என்பது பணத்துக்கும் இருக்கிறது. நல்ல முறையில் சம்பாதிக்கும் பணம்தான் நம் கையில் தங்கும்.

சம்பள விஷயத்தில் டிமாண்ட் பண்ணும் இடத்துக்கு நான் இன்னும் வரவில்லை. அதுக்காக உழைக்கிறேன். அடுத்து, ஹீரோ அளவுக்கு ஹீரோயினுக்கு சம்பளம் தருவதில்லையேனு கேட்கிறார்கள். ஹீரோ நாற்பது நாள் கால்ஷீட் கொடுத்திருப்பார். ஹீரோயின் அப்படி இல்லை. ஹீரோ, ஹீரோயின் இருவருடைய  பங்களிப்பை எடுத்துக்கொண்டால் வேறுபாடு அதிகமா இருக்கும்.

இப்போது ஹீரோயினுக்கு கெளரவமான சம்பளம் கொடுக்க ஆரம்பித்துள்ளார்கள். ஹீரோயின்கள் அதுல விழிப்புடன் இருக்கவேண்டும். சுயநலமா இல்லாமல் அடுத்தடுத்து வரும் புதியவர்களுக்கும் அந்த பலன் சேருகிற மாதிரி குரல் கொடுக்க வேண்டும்.

உங்கள் படத்தேர்வு எப்படி?

நாயகிகளுக்கு படங்களைத் தேர்வு செய்யும் சுதந்திரம் பெரியளவில் இருக்காது. கிடைக்கும் வாய்ப்புகளில் எவ்வளவு பெஸ்ட்டா பண்ண முடியுமோ அப்படிச் செய்தாக வேண்டும். சில காட்சிகள் வந்தாலும் நம்முடைய பங்களிப்பை பதிவு செய்ய வேண்டும் என்ற கவனம் இருக்கும். சினிமாவைப் பொறுத்தவரை டைரக்டர், ஆக்டர் என எல்லாம் சேர்ந்தது, ஒரு பாக்கேஜ் மாதிரி. அப்படி ‘கண்ணை நம்பாதே’ படத்தில் அனுபவம் வாய்ந்தவர்கள் இருந்ததால் படத்தின் மீது நம்பிக்கை இருந்தது. என்னுடைய கேரியர் ஆரம்பத்துலேயே இந்த மாதிரி படம் பண்ணுவது பெருமை.