சர்வதேச புக் கிளப் இப்போது சென்னையில்!

‘‘புத்தக வாசிப்பு என்பது ஒருவரின் சிந்தனைகளையும் செயல்திறனையும் அற்புதமாக மாற்றும் வல்லமை கொண்டது. ஒருவரின் பாசிட்டிவிட்டியை எப்போதும் அதிகரிக்கக் கூடியது. புத்தக வாசிப்பினால் ஒரு தனிமனிதனிடம் எண்ணற்ற மாற்றங்கள் நிகழும். பின்னர் அது சமூக மாற்றமாக மாறும். அப்படிெயாரு சமூக மாற்றம் உலகளவில் விரிவடைந்து செல்ல வேண்டும் என்பதே எங்கள் ஆசை. அதற்காகவே இந்தக் கிளப்பைத் தொடங்கினோம். அறிவார்ந்த சமூகத்தை உருவாக்குவதுதான் எங்களின் அல்டிமேட் கோல்...’’ நம்பிக்கை துளிர்க்கப் பேசுகிறார் ராகுலன் தர்மகுலசிங்கம்.   

இலங்கைத் தமிழரான இவர் சமீபத்தில் சென்னையில், ‘பிக் ஏ புக்’ (Pick a Book) என்ற பெயரில் ஒரு கிளப்பை தொடங்கியிருக்கிறார். ‘புத்தகத்தைத் தேர்ந்தெடு’ எனப் பொருள்படும் இந்தக் கிளப்பின் சிறப்பம்சம், அனைவரிடமும் வாசிப்புப் பழக்கத்தை வளர்ப்பதுடன் அறிவாற்றலை மேம்படுத்தும் பணிகளையும் முன்னெடுப்பதுதான். ‘‘இந்தியாவில் மட்டுமே பதினாறு இடங்கள்ல எங்க கிளப் செயல்பட்டுட்டு வருது. சென்னை 17வது இடம்...’’ என உற்சாகமாகச் சொல்லும் ராகுலனிடம் இந்த ஐடியா குறித்து கேட்டோம்.

‘‘முதல்ல என்னைப் பற்றி சொல்லிடுறேன். நான் பிறந்தது யாழ்ப்பாணம். வளர்ந்தது, படிச்சதெல்லாம் கொழும்புல. எம்பிஏ முடிச்சிருக்கேன். எனக்கு சின்ன வயசுல வாசிப்பு பழக்கம் இருந்தது. அதுதான் இப்ப கனெக்ட்டாகி இருக்கு. அப்ப, பள்ளி விடுமுறையின்போது யாழ்ப்பாணத்துக்குப் போவேன். அங்கே தாத்தாக்கள் குரூப்பா உட்கார்ந்திருப்பாங்க. அவங்க தினசரி செய்தித்தாள்களை வாசிச்சுக் காட்டச் சொல்வாங்க. அப்படிதான் வாசிப்பு பழக்கம் எனக்குள் வளர்ந்தது.

ஒவ்வொரு நாளும் நான் செய்தித்தாள்கள் வாசிக்க, அவங்க கேட்பாங்க. முதல்ல எனக்கு பிடிக்கல. ஆனா, அவங்க அதைக் கேட்டு விவாதம் பண்றதும் கருத்துகளைப் பரிமாறிக்கிறதும் அருமையாக இருந்தது. பிறகு நான் வாசித்ததையும், தாத்தாக்களின் விவாதக் கருத்துகளையும் நண்பர்களிடம் ஷேர் பண்ணுவேன். அது அவங்க மத்தியில் என்னை நிறைய விஷயங்கள் தெரிஞ்சவன் போல் மாற்றியது. அது எனக்கு ஊக்கத்தை ஏற்படுத்துச்சு.