அப்பா ஹீரோ... மகன் டைரக்டர்!

பல நூறு படங்களில் நடித்ததன் மூலம் தமிழ் சினிமாவின் தவிர்க்க முடியாத நடிகராக வலம் வருகிறார் தேசிய விருதுக்குச் சொந்தக்காரரான தம்பி ராமையா.‘மனுநீதி’ படத்தில் இயக்குநராக தன்னுடைய சினிமா பயணத்தை ஆரம்பித்தவர். என்றாலும் நடிகராகவே முத்திரை பதித்து வருகிறார்.‘இம்சை அரசன் 23ம் புலிகேசி’, ‘மைனா’, ‘வாகைசூடவா’, ‘கழுகு’, ‘சாட்டை’, ‘கும்கி’, ‘ஜில்லா’, ‘வீரம்’, ‘நிமிர்ந்துநில்’, ‘காவியத்தலைவன்’, ‘கதை திரைக்கதை வசனம் இயக்கம்’, ‘தனி ஒருவன்’, ‘புலி’, ‘வேதாளம்’, ‘அப்பா’, ‘இருமுகன்’, ‘தொடரி’, ‘பைரவா’, ‘டோரா’, ‘வேலைக்காரன்’, ‘விஸ்வாசம்’, ‘தலைவி’, ‘விநோதய சித்தம்’, ‘எனிமி’, ‘செம்பி’... உட்பட ஏராளமான படங்களில் இவர் ஏற்று நடித்த வித்தியாசமான கதாபாத்திரங்கள் இவரது பன்முக நடிப்புக்கு அடையாளம்.இப்போது தன்னுடைய மகன் உமாபதி ராமையா இயக்கும் ‘ராஜாகிளி’யில் கதையின் நாயகனாக நடித்துள்ளார்.

இளம் ரசிகர்கள் உங்களை வைத்து மீம்ஸ் போடுமளவுக்கு லைம்லைட்டில் இருப்பதைப் பற்றி என்ன சொல்கிறீர்கள்?

என்னுடைய வாழ்க்கை திறந்த புத்தகம் மாதிரி. எல்லோருக்கும் நான் எப்படி இந்த நிலைக்கு வந்தேன் என்று தெரியும். வாழ்க்கையில் திட்டமிடல், கற்றல் எல்லாமே ஒரு மனிதன் செய்யணும். இதெல்லாம் வெற்றியை நோக்கிதான் இருக்கும். ஆனால், நம் முயற்சிகளுக்கு வெற்றி கிடைக்குதா என்றால் அது கேள்விக் குறி. நான் அடிக்கடி சொல்வது, வெற்றி என்பது அமைவதல்ல, அமைத்துக்கொள்வது. எனது உழைப்பால், எனது சிந்தனையால், எனது கஷ்டத்தால், எனது அவமானத்தால், எனது தனிமை கொடுத்த தாக்கத்தால் நான் வெற்றியடைந்தேன்.

தோற்றுவிட்டேன் என்றால் அதைத் தாங்க முடியும். அதில் என்னுடைய முடிவு இருக்கும். அடுத்தவர் எடுத்த முடிவில் நான் ஜெயித்தேன் என்றால் அந்த வெற்றியை என்னால் கொண்டாட முடியாது. அது கூச்சமாக் இருக்கும். கடவுள் எனக்கு அளவுக்கு மீறிய கஷ்டத்தைக் கொடுத்தாலும் அளவான வெற்றியையும் கொடுத்துள்ளார். அந்தவகையில் கடவுளுக்கு நன்றி. என்னை மாதிரியான நடிகனை ஞாபகம் வைத்து பொதுமக்கள் சிலர் ‘சார் நீங்கதான் எனக்கு ரோல் மாடல்’ என சொல்லும்போது மகிழ்ச்சியாக இருக்கும்.

தாய்மாமனாக, சித்தப்பாவாக, தலைமை ஆசிரியராக எந்த வேடத்தில் நடித்தாலும் மக்கள் ஏற்றுக்கொள்ளுமளவுக்கு முகத்தைக் கொடுத்த என் அம்மா அப்பாவுக்கு நன்றி. மீம்ஸ் போட்டு என்மீது வைத்துள்ள அன்பை வெளிப்படுத்துகிறார்கள் ரசிகர்கள். கடவுள் என்னை நல்ல இடத்துல கொண்டு வந்து வைத்திருக்கிறார். இதை நான் தக்கவைத்துக் கொள்ள வேண்டும்.  
‘ராஜாகிளி’?

‘விநோதய சித்தம்’ வந்த பிறகு படங்களை செலக்ட் பண்ணி பண்ண ஆரம்பிச்சேன். வாழ்வியல் சார்ந்த கதைகள் என்னிடம் நிறைய இருக்கிறது. ஒரு நிகழ்ச்சியில் தயாரிப்பாளர் சுரேஷ் காமாட்சியை சந்திச்சேன். அவர் என்னிடம் கதை இருக்கிறதானு கேட்டார். உடனே ஒரு புது இயக்குநர் எப்படி ஆர்வத்தோடு சொல்வாரோ அதுபோல் நடித்துக் காண்பித்து கதை சொன்னேன். கதை அவருக்கு பிடித்துப்போகவே உடனே தயாரிக்க முன்வந்தார்.

என்னுடைய மகன் உமாபதி ராமையா, இயக்குநர் லோகேஷ் கனகராஜுக்கு உடன் பிறவா தம்பி மாதிரி. அர்ஜுன் சார் தொகுத்து வழங்கிய டிவி நிகழ்ச்சியில் நடித்ததன் மூலம் உமாபதிக்கு இண்டஸ்ட்ரியில் நல்ல பேர் கிடைச்சது. உமாபதியின் மிக்சல் ஆர்ட்ஸ் பாத்துட்டு லோகேஷ் அழைக்கவே அவருடன் சேர்ந்து டைரக்‌ஷன் டெக்னிக்கை இம்ப்ரூவ் பண்ணிக்கொண்டார். ‘ராஜாகிளி’க்கு நான் கதை வசனம் எழுதியிருக்கிறேன். உமாபதி டைரக்‌ஷன்.