நம் கனவு மட்டுமல்ல... அனைவரது கனவும் இதுதான். ஒரு வட்டம் அல்லது அதைவிட பெரிய வட்டம். கனவும் இலக்கும் இதற்குள்தான் சுற்றி வருகின்றன; இவற்றை நிறைவேற்றத்தான் அல்லும் பகலும் உழைத்துக் கொண்டிருக்கிறோம்; வாழ்கிறோம்.

ஆனால், எலன் மஸ்க் அப்படியில்லை. எப்படி தொழில் ஆரம்பிப்பது என்பது முதல் மற்ற நிறுவனங்களைக் கையகப்படுத்துவது வரை... செவ்வாய் கிரகத்தில் மனிதர்களைக் குடியேற்ற முற்படும் செயல் உட்பட அவரது கனவுகளும் இலக்கும் வித்தியாசமானவை. இதன் காரணமாகவும் நிறுவன செயல்பாடு களில் குழப்பங்களை ஏற்படுத்தும் விதத்திலும் எப்பொழுதுமே லைம்லைட்டில் இருக்கிறார்.

அதேபோல ராய் பகதூர் குஜர் மால் மோடி என்பவர், மோடி தொழில் குழுமத்தை நிறுவினார். அவர், கடந்த 1933ம் ஆண்டு உத்தரப்பிரதேசத்தில் உள்ள மோதி நகர் என்கிற நகரத்தை நிறுவினார் என்பதும் இங்கு நினைவுகூரத்தக்கது.

அவ்வளவு ஏன்..? ஆரக்கிள் நிறுவனத் தலைவர் ஒருவர் கூட அமெரிக்காவில் கிட்டத்தட்ட ஒரு முழுத் தீவை விலைக்கு வாங்கி தன் விருப்பத்துக்கு ஏற்ப மாற்றங்களைச் செய்து சொகுசு வாழ்க்கையை நடத்துவதாகச் செய்திகள் வெளியானதும், அவருக்கு எதிராக அந்தத் தீவைச் சேர்ந்த மக்கள் குற்றம் சாட்டியதும் செய்திகளில் அடிபடத்தானே செய்தன..?