சுதந்திர போராட்ட தலைவர்களை தெரியும்... சுதந்திர போராட்ட வீரர்களை தெரியுமா..?ஆவணப்படுத்துகிறார் பேராசிரியர்

‘‘பொதுவாக, நாம் சுதந்திரத்திற்காக பாடுபட்ட முக்கிய தலைவர்களை மட்டுமே அறிந்திருப்போம். ஆனா, சுதந்திரத்திற்காக தலைவர்களுடன் போராடிய அல்லது தனியாக நின்று போராடிய பலர் நம் கவனத்திற்கு வரவேயில்ல. அப்படியானவங்க தமிழகத்துல நிறைய இருக்காங்க. இவங்க மத்திய, மாநில அரசுகளின் ஊக்கத்தொகையும் விருதுகளும் கூட வாங்கியிருக்காங்க. ஆனா, இவங்க சுதந்திரத்திற்காக பண்ணின விஷயங்கள் யாருக்கும் தெரியாது.

அந்த அறியப்படாத தியாகிகளை வெளிச்சத்திற்கு கொண்டு வர்றதும், அவங்க போராட்டம் எப்படியானதாக இருந்ததுனு சொல்லவுமே இந்த ஆய்வை பண்ணினோம்...’’ அத்தனை ஆர்வமாகப் பேசுகிறார் பேராசிரியர் சுமதி.சென்னை ஆழ்வார்பேட்டையில் இருக்கும் சி.பி.ராமஸ்வாமி ஐயர் இண்டோலாஜிக்கல் ரிசர்ச் இன்ஸ்டிடியூட்டில் உதவிப் பேராசிரியராக பணியாற்றி வருபவர். கடந்த ஒன்றரை ஆண்டுகளாக அறியப்படாத சுதந்திரப் போராட்ட வீரர்கள் பற்றின ஆய்வை மேற்கொண்டு அத்தனை சிரத்தையாகச் செய்து முடித்திருக்கிறார்.  

‘‘முதல்ல என் ஆசிரியரும் இந்த இன்ஸ்டிடியூட்டின் இயக்குநருமான நந்திதா கிருஷ்ணன் மேடத்திற்குதான் நன்றி சொல்லணும். அவங்க தந்த நம்பிக்கையில்தான் இந்த ஆய்வை என்னால் சிறப்பாக செய்ய முடிஞ்சது. இதை மத்திய அரசின் கலாசாரத் துறைக்காக (http://amritmahotsav.nic.in/unsung-heroes.htm)செய்தோம். அவங்க அறியப்படாத சுதந்திரப் போராட்ட தியாகிகள் பற்றி தகவல் கேட்டிருந்தாங்க.

அதாவது, ‘ஆசாதி கா அம்ரித் மஹோத்சவ்’னு 75வது சுதந்திர தினத்தையொட்டி நம் கலாசாரத்தைக் கொண்டாடும்விதமாகவும், தியாகிகளை நினைவுகூரும்விதமாகவும் இந்தத் தகவல்களை சேகரிக்கச் சொன்னாங்க. இதை ஓர் ஆய்வாக எடுத்து நாங்க செய்தோம். அப்ப நிறைய தகவல்கள் கிடைச்சது.என் கணவரின் நண்பர் மன்னார்குடியில் இருக்கார். அவங்க அப்பா ‘காக்காஜி’ ராமசாமி சுதந்திரப் போராட்ட வீரர். அதனால, அவர் பற்றின தகவலை முதல்ல சேகரிச்சேன். பிறகு ஒருவர் மூலமாக இன்னொருவர் தொடர்பு கிடைத்து, அடுத்தடுத்து நிறைய தகவல்கள் சேகரிச்சோம். இதுல பலரின் சுதந்திரப் போராட்ட அனுபவங்கள் மெய்சிலிர்க்க வைப்பவை.

அப்புறம் அவங்க வாங்கின சான்றிதழ், பிறந்ததேதி, ஜெயில்ல இருந்த சான்றிதழ், உறவினர்கள் சொன்ன தகவல்கள், செய்தித்தாள்களில் உள்ள செய்திகள்னு எல்லாவற்றையும் வச்சு நாங்களே ஒவ்வொருவருக்கும் ஒரு கட்டுரையைத் தயாரிச்சோம். இப்படியாக 408 அறியப்படாத தியாகிகள் பற்றின தகவல்களை சேகரிச்சிருக்கோம். இதுல சுமார் 160 பேர் பலரும் அறியப்படாத பெயர்கள். ஆனா, அவங்க சுதந்திரப் போராட்டத்துல பெரும்பங்கு வகிச்சிருக்காங்க...’’ என்கிறவர், சிலரின் சுதந்திரப் போராட்டப் பணிகளையும், அவர்களின் வீரசாகசங்களையும் நம்மிடம் பகிர்ந்தார்.

‘‘நான் முதல்முதலாக சந்திச்ச தியாகி ‘காக்காஜி’ ராமசாமியின் மகன் ராஜகோபாலன், தன் தந்தையைப் பற்றிச் சொன்ன தகவல்கள் ரொம்ப சுவாரஸ்யமானது.
‘காக்காஜி’ என்கிற அடைமொழி வந்ததே பெரிய கதை. இவர் பள்ளி நாட்கள்லயே காந்திஜியின் கொள்கையால் ஈர்க்கப்பட்டிருக்கார். காந்திஜி உப்பு சத்தியாக்கிரகம் பண்ணினபோது இவர் மன்னார்குடியில் அந்தப் போராட்டத்தை முன்னெடுத்திருக்கார். அப்ப போலீஸ் அவரை கைது செய்றாங்க. அவருக்கு அப்ப வயசு 21.

அதேநேரம் பிரிட்டிஷ் அரசின் கொடுங்கோல் ஆட்சியை எதிர்த்து போஸ்டர் ஒட்டிய குற்றச்சாட்டிற்காக ஆறு மாசம் திருச்சி சிறையில் அடைக்கிறாங்க. அப்புறம், தனிப்பட்ட முறையில் சத்தியாக்கிரகத்தில் ஈடுபட்டதால் நீடாமங்கலம் சிறையில் மூணு வாரங்கள் அடைக்கப்படுறார். ‘வெள்ளையனே வெளியேறு’ இயக்கம் 1942ல் தொடங்கினபோது மன்னார்குடி கிராமமே வன்முறைக் களமாக மாறுது.

ரயில் நிலையம், தந்தி அலுவலகம் எல்லாம் வன்முறையால் தாக்கப்படுது. அப்ப மன்னார்குடியின் சர்க்கிள் இன்ஸ்பெக்டர் ராகவன், ‘ராமசாமிதான் இந்தக் கலவரத்திற்குக் காரணம்’னு நினைக்கிறார். அவரை சுட்டுப்பிடிக்க அரசாணை வாங்குறார். இதனால ராமசாமி மாறுவேடத்தில் திருச்சி, ஈரோடு உள்ளிட்ட பல ஊர்கள்ல தலைமறைவு வாழ்க்கை வாழ்றார். பவானி போலீஸ் அவரைக் கண்டுபிடிச்சு ரயில்ல மன்னார்குடிக்குக் கொண்டு வர்றாங்க.

ரயில்நிலையத்திலேயே இன்ஸ்பெக்டர் ராகவன், ராமசாமியை கடுமையாக அடிக்கிறார். அப்ப, ‘உன்னை இங்க தேடி அலையிறோம். நீ காக்கா மாதிரி பறந்து போயிட்ட’னு சொல்லிச் சொல்லி அடிச்சிருக்கார். அதைப் பார்த்த பொதுமக்கள் அவரை மரியாதைக்காக, ‘காக்காஜி’னு அழைக்க ஆரம்பிச்சிருக்காங்க. இவர் சுதந்திரத்திற்குப் பிறகு மன்னார்குடியில் 27 ஆண்டுகள் தொடர்ந்து கவுன்சிலராகவும், நகராட்சி துணைத் தலைவராகவும் இருந்திருக்கார். இவரை கௌரவிக்கும் பொருட்டு இந்திய அரசு 1972ம் ஆண்டு 25வது சுதந்திர தினத்தை முன்னிட்டு தாமிரப் பட்டயம் கொடுத்திருக்கு.