‘களகாத்தா சந்தனமேரம் வெகவேகா பூத்திருக்கு...’ கேரளாவின் ஹிட் பாடல் பாடியவர் அட்டப்பாடி நஞ்சம்மா. ‘அய்யப்பனும் கோஷியும்’ மலையாளப் படத்தில் வரும் இந்தப் பாடலைப் பாடியதற்காக சிறந்த பின்னணிப் பாடகிக்கான தேசிய விருதினைப் பெறுகிறார் நஞ்சம்மா. இருளர் சமூக ஆதிவாசிப் பெண்.

கேரள மாநிலம் அட்டப்பாடி அகழியிலிருந்து சுமார் ஐந்து கிலோமீட்டர் தூரம் இவரின் வீடு. முன்பெல்லாம் இரண்டாவது பெட்ரோல் பங்க் என்ற பெயருள்ள பஸ் நிறுத்தம் இப்போதெல்லாம் அட்டப்பாடி நஞ்சம்மா வீடு பஸ் ஸ்டாப் என்ற பெயராக மருவி நிற்கிறது. சின்ன வீடு. ஆடு, மாடு மேய்ப்புத் தொழில். நாம் போகும்போது கூட, தான் மேய்க்கும் செல்ல ஆடுகளுடன் பேசிக் கொண்டிருந்தார்.

வெள்ளந்திப் பேச்சு. வார்த்தைக்கு வார்த்தை கொள்ளை கொள்ளும் சிரிப்பு. இன்னமும் விருது பெற்றதற்கான தகவல் தில்லியிலிருந்து எழுத்துபூர்வமாக  இல்லம் வந்து சேரவில்லை. என்றாலும் இவரின் வீட்டில் அடுத்தடுத்து கூட்டம் நிரம்பி வழிகிறது.

மலையாள சேனல்கள் மாறி மாறி பேட்டிகளை எடுக்கின்றன. ஆதிவாசிப் பெண்கள், மகளிர் சங்கத்தவர்கள் வந்து கொண்டே இருக்கிறார்கள். சால்வை போர்த்திக் கொண்டே இருக்கிறார்கள். மலையாளம் கொஞ்சம். தமிழ் இன்னமும் கொஞ்சம். மிகுதியாக ஆதிவாசிகளின் இருளர் மொழி. இதுதான் நஞ்சம்மாவின் அடையாளம்.

அவார்டு நல்ல சந்தோஷம். எனக்கு மட்டுமில்ல. என் மக்களுக்கு. மக்கள் ஏற்படுத்தித் தந்த சந்தோஷமில்லே... அது அரசாங்கம் கொடுத்ததா நினைக்கலை. ராஜராஜ நம்ம மக்களு. வாரிக் கொடுத்துட்டது இல்லே. இந்த ஊரு, நாடு, உலகமே பாடின பாட்டில்லே அது... அதுதான் பெரிய சந்தோஷம். இப்ப கூடுதல் சந்தோஷம்.

இதை முன்கை எடுத்தவங்க, எனக்கு ஒத்துழைத்து சினிமாவுல அறிமுகப்படுத்துனவுங்க, அவங்களும் என்னைப் போல நம்ம ராஜ்ய மக்களு. எல்லோருக்கும் இந்த விருது போய்ச் சேரணும். நம்ம இருக்கிற வரைக்கும் நம்ம. நம்ம மரிச்சுப் போயிட்டா யாரு..? அதோட நம்ம காணாது போயிருவோம் இல்லியா? அது போல இல்லாம நான் இந்த பாட்டு மூலமா நஞ்சம்மா பாட்டுன்னு பாட வைப்பேன்ல... அது சந்தோஷம்.