உலகை வியப்பில் ஆழ்த்திய 7 வயது புகைப்படக் கலைஞர்!

உலக அமைதி புகைப்பட விருது யாருக்கு கிடைத்திருக்கிறது தெரியுமா? 7 வயது பெங்களூரு சிறுமியான ஆத்யாவுக்கு!இதற்காக அவருக்கு 1,000 யூரோ (இந்திய மதிப்பில் ரூ.87 ஆயிரம்) காசோலையும், டிப்ளமோ, பதக்கம் ஆகியவையும் கிடைத்துள்ளன. பெங்களூரு மல்லேசுவரத்தைச் சேர்ந்தவர் அரவிந்த் சங்கர். கம்ப்யூட்டர் என்ஜினியர். அவரது மனைவி ரோஷினி. அவர்களது மகள் ஆத்யா, ஹெப்பால் பகுதியில் உள்ள வித்யாநிகேதன் பள்ளியில் 2ம் வகுப்பு படித்து வருகிறார்.

செல்போனில் புகைப்படம் எடுக்கும் ஆர்வம் ஆத்யாவுக்கு நான்கு வயதில் வந்தது. தாய் ரோஷினியின் செல்போனில் தன் வீடு, தாத்தா வீட்டை புகைப்படம் எடுக்கத் தொடங்கினார். தன் மனம் கவர்ந்த இடம், பொருட்கள்... என அனைத்தையும் புகைப்படமாக எடுத்து மகிழ்ந்தார். தன் மகள் எடுத்த போட்டோக்களைப் பார்த்த அரவிந்த் சங்கருக்கு ஆச்சர்யம்; பிரமிப்பு. ஆத்யாவிடம் மிகச் சிறந்த புகைப்படக் கலைஞர் இருப்பதை உணர்ந்த அரவிந்த் சங்கர், தன் மகளை ஊக்குவித்து ஆதரிக்க வேண்டிய பொறுப்பு தனக்கிருப்பதை உணர்ந்தார்.