தீபாவளி வந்தாலே இந்தியர்களிடம் உற்சாகம் கரைபுரளத் தொடங்கிவிடும். அது எந்த மதத்தவராக இருந்தாலும் சரி, தீபாவளி என்றால் கொண்டாட்டம்தான். காரணம், தீபாவளி என்பது இந்தியர்களுக்கு மதச் சடங்கும் பண்பாட்டுத் திருவிழாவும் மட்டுமல்ல; இந்தியத் துணைக் கண்டத்தின் பொருளாதார உற்சவம் இது.

தீபாவளி காலத்தில்தான் எளிய மனிதர்கள் உட்பட எல்லோரிடமும் பணப் புழக்கம் வழக்கத்தைவிட அதிகமாக இருக்கும். சம்பளதாரர்களுக்கு போனஸ் வருமானம், கடைக்காரர்களுக்கு விற்பனை உயர்வு, ஊடகங்களுக்கு விளம்பர வருமானம் என்று இந்தியப் பொருளாதாரத்தின் அத்தனை உள் நீரோட்டங்களிலும் உயிர்ச்சத்து பாய்ந்து உற்சாகம் கரை ததும்பும்.

கடந்த தீபாவளியின்போதே அமேசான், வால்மார்ட் உட்பட எல்லா சில்லறை விற்பனையாளர்களையும் சேர்த்த தீபாவளி விற்பனை ரூபாய் 29 ஆயிரம் கோடி என்கிறது ரெட்ஷீர் கன்சல்டன்ட் என்ற நிறுவனத்தின் ஆய்வறிக்கை. இது அதற்கு முந்தைய ஆண்டைவிட 55% அதிகம் என்பது குறிப்பிடத்தக்கது.

இத்தனைக்கும் போன வருடம் கொரோனாவின் தாக்கம் கடுமையாக இருந்தது என்பதை நாம் கவனிக்க வேண்டும்.இந்த வருடமும் ஆன்லைன் விற்பனை களை கட்டுகிறது. சென்ற வருடத்தைவிட சிறப்பான ஆன்லைன் வர்த்தகம் நிகழ்ந்து கொண்டிருப்பதாக மகிழ்ச்சியுடன் சொல்கிறார்கள். கடந்த வருடத்தின் வருமானத்தை இந்நேரம் ஆன்லைன் சந்தைகள் கடந்திருக்கும் என்ற நிலையில் இது ஆன்லைன் நிறுவனங்களுக்கு மகிழ்ச்சி பொங்கும் தீபாவளிதான்.