கருப்பட்டி கடலைமிட்டாய் தயாரிக்கும் எஞ்சினியர்!

‘‘நம்மூர்ல 1960க்கு முன்பு வரை கருப்பட்டியில் செய்யப்பட்ட இனிப்புகளே அதிகம். வெல்லம் வந்ததும் கருப்பட்டி இனிப்புகள் எல்லாம் காணாமல் போயிடுச்சு. குறிப்பா, கருப்பட்டி கடலைமிட்டாய் உற்பத்தியே அழிஞ்சுபோச்சு. ‘ஒருகாலத்துல அப்படி ஒண்ணு இருந்தது தம்பி’னு பெரியவங்க சொல்லிக் கேட்ட நிலையில்தான் நான் இந்தத் தொழிலுக்குள்ள வந்தேன். இப்ப கருப்பட்டி கடலைமிட்டாயை எல்லோர்கிட்டயும் பரவலா கொண்டு சேர்த்திருக்கேன்.

ரொம்ப சந்தோஷமா இருக்கு...’’ உற்சாகம்பொங்க பேசுகிறார் ஸ்டாலின் பாலுச்சாமி.
எஞ்சினியரிங் பட்டதாரியான இவர், ஆறு ஆண்டுகள் ஒரு எலக்ட்ரிக் மோட்டார் கம்பெனியின் ரிசர்ச் அண்ட் டெவலப்மென்ட் பிரிவில் கைநிறைய சம்பளத்துடன் பணி செய்தவர். இப்போது கருப்பட்டி கடலைமிட்டாய் உற்பத்தியை குடும்பத்துடன் செய்து வருகிறார்.

எந்தக் கலப்படமும் இல்லாமல் கடலையில் தொடங்கி கருப்பட்டி வரை எல்லாவற்றையும் உற்பத்தியாளர்களிடமே நேரடியாகப் பார்த்துப் பார்த்து வாங்கி, கையினாலேயே இந்தக் கருப்பட்டி கடலைமிட்டாயை தயாரிக்கிறார். இதனால், தரமும் சுவையும் கூட வாடிக்கையாளர்கள் இடையே அமோக வரவேற்பு கிடைத்திருக்கிறது. கடந்த மூன்றாண்டுகளாக இதனை, motherway.in என்கிற இணையதளம் வழியே இந்தியா முழுவதும் விற்பனை செய்து வருகிறார்.

‘‘சொந்த ஊர் விருதுநகர் மாவட்டம் காரியாபட்டி. பிஇ முடிச்சதும் கோவையில் ஒரு எலக்ட்ரிக் மோட்டார் கம்பெனியில் வேலை பார்த்தேன். என் நேச்சருக்கும் என் பணிக்கும் பொருந்திப் போகல. இருந்தும் பணி செய்தேன். ஏன்னா, என்னுடையது நடுத்தரக் குடும்பம். அப்பா பாலுச்சாமி போஸ்ட் ஆபீஸ்ல கிளார்க்கா இருந்தார். அம்மா சாந்தி வீட்டுல தையல் வகுப்பு எடுத்திட்டு இருந்தாங்க. வீட்டுப் பொருளாதாரச் சூழலால் கடன் வாங்கித்தான் படிப்பை முடிச்சேன். அப்புறம், அந்த வேலையில் இருந்தே கடனை அடைச்சேன்.

இந்நேரம் என் அண்ணன் வினோத், ‘குக்கூ’ காட்டுப்பள்ளி அமைப்புடன் இணைஞ்சு வேலை பார்த்திட்டு இருந்தார். இதனால, நேரம் கிடைக்கிறப்ப அங்க போய் குழந்தைகளுக்கான பயிற்சிப் பட்டறைகள்ல கலந்துப்பேன். அங்க குழந்தைகள் சந்தோஷமாகவும், உற்சாகமாகவும் இருப்பாங்க. அதுக்குக் காரணம் அவங்க அவங்களா இருக்குறதுதான்னு தெரிஞ்சது. அந்த உற்சாகம் எனக்குள்ளும் வந்தது. அந்தத் தருணம்தான் எனக்கான தேடல் பத்தின புரிதல் கிடைச்சது.

ஒருகட்டத்துல எஞ்சினியரிங் பணி நமக்கானதல்லனு தோண, வேலையிலிருந்து விலகிட்டேன். 2015ன் தொடக்கத்திலிருந்து ஆறுமாசம் குக்கூ காட்டுப்பள்ளியில் முழுநேரமா இருந்தேன். இந்நேரம், திருமணம் முடிவாகிற சூழல் வந்தது. எனக்கான பொருளாதாரம், வாழ்வியல் பத்தி யோசிக்கிறப்ப சிவராஜ் அண்ணா, ‘நமக்கென நல்ல ஆரோக்கிய தின்பண்டங்கள் இங்க எதுவும் இல்ல. அதனால, கடலைமிட்டாய் தொழிலை சிறப்பா செய்யலாமே’னு சொன்னார்.