இதனால் அதிக கட்டணம் செலுத்தி ஷேர் ஆட்டோக்களிலும், மினி வேன்களிலும் பயணிக்க வேண்டிய நிலை. ‘‘லாபத்தை மட்டுமே முக்கியமாகக் கருதி அரசு இயங்கினால் மககளுக்குக் கிடைக்க வேண்டிய நல்ல திட்டங்கள் எல்லாம் காணாமல் போய்விடும்.

மினி பஸ் போன்ற அத்தியாவசிய தேவைகள் சுவடில்லாமல் அழிந்துபோய்விடும்...’’ என்று சமூக ஆர்வலர்கள் குரல் எழுப்பியுள்ளனர். இந்நிலையில் தமிழ்நாடு அரசு போக்குவரத்து ஊழியர் சம்மேளனத்தின் (சி.ஐ.டி.யு) பிரிவின் மாநில பொதுச்செயலாளர் ஆறுமுக நயினாரைச் சந்தித்தோம்.

‘‘அரசுப் போக்குவரத்து லாப நோக்கத்துக்காக அல்ல; அது மக்களுக்குச் சேவை செய்யவே உருவாக்கப்பட்டது. மினி பஸ் மட்டுமல்ல, தமிழ்நாட்டில் ஓடும் பெரிய டவுன் பஸ்களில் கூட 1500-ஐ நிறுத்திவிட்டார்கள்.

இதற்கும் லாபம் இல்லை என்று சொல்கிறார்கள். மக்களுக்காக இயக்கப்படும் பொதுப் போக்குவரத்து நஷ்டமடைவது இயல்புதான். உலகம் முழுவதும் இதுதான் நடக்கிறது. ஆனால், பஸ்ஸில் விட்ட லாபம் வேறு வழியில் கிடைக்கும்...’’ என்று கறாராக ஆரம்பித்தார் ஆறுமுக நயினார்.

‘‘பிரிட்டிஷ் காலத்தில் தனியார்தான் பஸ்களை இயக்கி வந்தனர். ‘தனியார் பஸ்கள் கொள்ளையடிக்கிறது’ என்று பொதுமக்களிடமிருந்து புகார் வர, அரசுப் போக்குவரத்தை பிரிட்டிஷ்காரர்கள் கொண்டுவந்தார்கள்.

நம்மை ஆண்ட ஒரு காலனி அரசே லாப நோக்கமில்லாமல் தான் பொதுப்போக்குவரத்தைக் கொண்டுவந்தது. ஆனால், இதில் லாபம் வேண்டும் என்று இப்போதைய அரசு சொல்வதில் என்ன நியாயமிருக்கிறது? கடந்த தி.மு.க ஆட்சியில் குறுகிய தெருக்களில் பஸ் போக்குவரத்தைக் கொண்டு வரும் நோக்கத்துடன் மினி பஸ் திட்டம் தீட்டப்பட்டது.

‘‘போக்குவரத்து போன்ற சேவை நிறுவனங்களில் ஏற்படும் நஷ்டம் வேறு வழிகளில் லாபத்தை சம்பாதித்துக்கொடுக்கும். உதாரணமாக பஸ் போக்குவரத்து சிறப்பாக இருந்தால் டூவீலர்கள் மற்றும் காரின் தேவை குறையும். இதனால் அதன் விற்பனையும், வெளிநாட்டு மற்றும் உள்நாட்டு வாகன கம்பெனிகளுக்காக நாம் செலவிடும் பணமும், அன்னிய செலவாணியும் குறையும்.

இப்படி நடந்தால் நம் பண மதிப்பு அதிகரிக்கும். அத்துடன் காற்று மாசுபாடு, டிராபிக் ஜாம், விபத்துகள் குறையும். இவையெல்லாம் பஸ் போக்குவரத்து சிறப்பாக செயல்படும்போது தான் நடக்கும்...’’ என்கிற நயினார் மினி பஸ், டவுன் பஸ் குறித்தும் பேசினார்.