வைரல் வேலை

துபாயில் இருக்கும் பெரும் கோடீஸ்வரர்களின் வீடுகளை நிர்வகிப்பதற்கு ஆட்கள் இல்லை. வீட்டுக்கு உரிமையாளர்கள் தங்களது பிசினஸ்களில் மூழ்கி விடுவதாலும், ஏக்கர் கணக்கில் பெரிதாக வீடுகள் இருப்பதாலும் வீட்டைச் சரியாக அவர்களால் நிர்வகிக்க முடிவதில்லை. ஓர் அலுவலகத்தை நிர்வகிப்பது போல வீட்டை நிர்ணயிப்பதற்கு ஹவுஸ் மேனேஜர்களைத் தேடுகின்றனர். 

வீட்டில் வேலை செய்யும் சமையல்காரர்கள், தோட்டக்காரர்கள், துப்புரவுப் பணியாளர்கள், எலெக்ட்ரீசியன், வாட்ச்மேன், பிளம்பர் உட்பட அனைத்து வேலையாட்களையும் நிர்வாகம் செய்வது, வீட்டுக்கு என்னென்ன தேவையோ அதையெல்லாம் வாங்குவது, மாத பட்ஜெட்டை வகுப்பது என பல வேலைகளை ஹவுஸ் மேனேஜர்கள் செய்ய வேண்டும். இந்த வேலைக்கு வருட சம்பளமாக 83 லட்ச ரூபாய் வழங்கப்படும். இந்தியாவில் மிக உயர்ந்த பதவியில் வகிப்பவர்களுக்குத்தான் இந்தச் சம்பளம் கிடைக்கும் என்பது குறிப்பிடத்தக்கது.

சமையலைக் கூட சலிப்பில்லாத ஒரு ஜாலியான அனுபவமாக மாற்றுவதற்காக சினிமா உணவகங்களை அறிமுகப்படுத்தியிருக்கிறது, சீனா. அங்கே உள்ள பொழுதுபோக்குத் துறையை ஒரு கலக்கு கலக்கி வருகிறது, சினிமா உணவகம். இந்த நவீன திரையரங்கில் ஒவ்வொரு இரண்டு இருக்கைக்கு முன்பாக ஒரு மேசை இருக்கும். வழக்கமான இருக்கைகளை விட மிகவும் குறைவான இருக்கைகளே இருக்கும். 

சமையலின் மீது ஆர்வமும், காதலும் கொண்டவர்களுக்காக இதை வடிவமைத்திருக்கின்றனர். நம் சமையலறையில் ஒரு மிகப்பெரிய திரை இருந்து, அதில் நமக்குப் பிடித்த படம் ஓடிக்கொண்டிருப்பதைப் பார்த்துக்கொண்டே சமைத்தால் சலிப்பு பறந்துவிடும். சமைப்பது கூட மகிழ்ச்சியான அனுபவமாகும். இதையே ஒரு பிசினஸாக மாற்றியிருக்கின்றனர் சீனர்கள்.