புது வருடம் தொடங்கியதுமே, பலவித உறுதிமொழிகளோடு (Resolution)  நமது நாட்களை ஆரம்பிப்போம். இதில், பெரும்பாலும் அவரவர் தனிப்பட்ட வாழ்க்கையில் செய்த நல்ல விஷயங்களைக் கூடுதலாக மேம்படுத்தவும், கடந்த ஆண்டுகளில் செய்த தவறுகளை மீண்டும் செய்யாமல் இருக்கவும் உறுதிமொழி எடுப்போம்.சிலர் புது வேலைக்கு மாற நினைப்பார்கள். சிலர் புது வீடு கட்ட வேண்டும் என்பார்கள். 

சிலர் எனது நீண்டநாள் கனவை நிறைவேற்றப் போகிறேன் என்பார்கள்.  இப்படியாக மனிதர்கள், தங்களுக்குத் தாங்களே விதவிதமாக உறுதிமொழிகளை எடுத்து செயல்படுவதைப் பார்க்கும் போது, பார்க்கும் நமக்கும் எனர்ஜி தொற்றிக் கொள்ளும். உடனிருப்பவர்கள், இம்மாதிரியாக உறுதிமொழி எடுப்பவர்களை, மரியாதையுடன் அல்லது அவர்களுக்கு உதவும் பொருட்டு உறுதுணையாகவே இருப்பார்கள்.

எந்தவொரு விஷயமும் நமது கட்டுப்பாட்டில் இருக்க வேண்டும். டயட் இருப்பதற்காகவே பல ஆயிரங்களை செலவழிக்கும் நபர்களை கண்கூடாகவே நாம் பார்க்கிறோம். உண்மைகள் என்னவெனப் புரியாமலே அல்லது புரிந்து கொள்ள விரும்பாமலே மக்கள் இருக்கிறார்கள் என்றுதான் சொல்ல வேண்டும். 

அதீத உடற்பயிற்சியும், அதீத உணவுக்கட்டுப்பாடும் சுய வதைக்கு நம்மை இட்டுச் செல்லும். சுய வதையினை என்றைக்குமே மக்கள் வெறுப்பார்கள். அதனால்தான், உடற்பயற்சியும் உணவுக் கட்டுப்பாட்டிற்கான ‘டயட்’ என்கிற வார்த்தையும், அதிகம் நம்மை பயப்படவைக்கும் பேசுபொருளாக மாறி நிற்கிறது.

நமது மருத்துவத்துறை மற்றும் உலக சுகாதார அமைப்பின் ஆலோசனைபடி, உடற்பயிற்சிக்கு ஒரு நாளில் நாற்பத்தைந்து நிமிடங்கள் அல்லது வாரத்தில் நான்கு நாட்கள் என மொத்தமாக வாரத்தில் மூன்று மணி நேரம்தேவைப்படும். அப்போதுதான்உடலிலுள்ள மெட்டபாலிசம் சரியாக இருக்கும் என்கிறார்கள். 

அதாவது, நமக்கு பிடித்துச் செய்கிற செயல்பாடுகளில் உள்ள ஓடுவது, விளையாடுவது, நடனமாடுவது, யோகா செய்வது, நடப்பது போன்ற பயிற்சிகளில், ஒன்றினை எடுத்து, முழு மனதோடு செய்தாலே போதுமானது. எந்தவொரு உடற்பயிற்சியும் உடலையும், மனதையும் இலகுவாக்க செய்யப்பட வேண்டியதாக இருக்க வேண்டும்.

விளையாடாமல் படிக்கும் குழந்தைகளின் மனமும், உடலும் ஆரோக்கியத்தை வெகுவாக இழக்கிறது என்கிறார்கள். அதனால்தான், பள்ளிகளில் விளையாடுவதற்கென ஒரு வகுப்பு மாணவர்களுக்கு கண்டிப்பாக வேண்டுமென்று தொடர்ந்து கூறி வருகிறோம்.பல்வேறு விளையாட்டு சார்ந்த அமைப்புகள் இன்று சிறுசிறு குழுக்களாக இருக்கிறது. 

அதில் அனைத்து வயதினரும் பங்கேற்கவும், பல்வேறு தரப்பட்ட மனிதர்களும் ஒன்று சேர்ந்து விளையாடவும் வாய்ப்புகள் இருக்கிறது. இதன் மூலமாக வீடு, வேலை என்பதைத் தாண்டி நமக்கான, பிடித்த உலகத்தை உருவாக்கிக் கொள்ளவும் நம்மால் முடியும். இப்படித் தொடர்ச்சியாக விளையாடும் போது, நமது உடலும், மனதும் தொடர்ந்து ஒத்துழைக்கும். எனவே எங்கெல்லாம் விளையாட வாய்ப்பிருக்கிறதோ அதைத் தவறவிடாமல் பயன்படுத்திக் கொள்ள வேண்டும்.

உடல் ஆரோக்கியத்திற்காக, உணவிலும், உடற் பயிற்சியிலும் நம்மை வதைத்துக் கொள்ளாமல், நமக்கு மிகவும் பிடித்துச் செய்கிற விஷயங்களாக இருக்குமாறு பார்த்துக் கொண்டால், உடல் பருமன், மன அழுத்தம், உடல் சோர்வு அனைத்தும் தானாகவே சரியாகிவிடும்.

இன்றைய வாழ்கை சூழலில் நம்மை அழுத்துகிற பதற்றம், மன அழுத்தம், தேவையில்லாத எண்ணங்களில் இருந்து எளிதாக விடுபட முடியும். இவை அனைத்துமே நம்மை நாம் ஆரோக்கியமாக வைக்க நாம் செய்கின்ற முதலீடுகள் என்பதை ஒருபோதும் மறந்து விட வேண்டாம்.