‘‘சும்மா தடவாம, ஷாட் அடிங்கப்பா!’’ என கிரிக்கெட் பார்த்து கூல் கமென்ட் உதிர்க்கும் நம்மை உலுக்கிப் போட்டுவிட்டது, பந்து தாக்கி இறந்த ஆஸ்திரேலிய கிரிக்கெட் வீரர் பிலிப் ஹ்யூக்ஸின் சோகம்.

12 வயதிலேயே மட்டை தூக்கிவிட்ட ஹ்யூக்ஸ், சர்வதேசப் போட்டி யில் நுழைந்து இரண்டாவது டெஸ்ட்டிலேயே சதம் கண்டவர். ‘ஒரு டெஸ்ட்டின் இரு இன்னிங்ஸிலுமே சதம் அடித்த மிக இளம் வீரர்’ என்ற சாதனை இப்போதும் அவர் வசம். ஆஷஸ் தொடரில், கடைசி விக்கெட்டுக்கு ஹ்யூக்ஸும் ஆஸ்டன் அகரும் சேர்ந்து 163 ரன் சேர்த்தது, வெகுநாள் வேர்ல்டு ரெக்கார்டாக இருந்தது. இப்படியொரு வீரரைப் பறிகொடுத்திருப்பது ஆஸ்திரேலிய அணிக்கு பெரும் இழப்புதான்.

உள்ளூர் போட்டியில் 63 ரன் எடுத்து ஆடிக்கொண்டிருந்த ஹ்யூக்ஸின் உயிரைக் குடித்த அந்த பவுன்ஸரை வீசியவர், நியூ சவுத் வேல்ஸ் அணியைச் சேர்ந்த ஆல்ரவுண்டர் சீன் அப்போட். சில வருடங்களுக்கு முன்புவரை ஹ்யூக்ஸும் இவரும் டீம் மேட்ஸ். நெருங்கிய நண்பர்கள். ஹ்யூக்ஸ் மரணித்த செய்தி கேட்டு, அப்போட் மருத்துவமனைக்கு வந்ததும், அழுததும், செம நெகிழ்ச்சி க்ளிக்ஸ்.

‘‘ஹ்யூக்ஸ் பொதுவாகவே பவுன்ஸரில் திணறுவார். அதுதான் அவரை பலி வாங்கி விட்டது’’ என்கிறார்கள் கிரிக்கெட் நிபுணர்கள். நவம்பர் 30 அன்று, தனது 26வது பிறந்த நாளைக் குதூகலமாகக் கொண்டாடியிருக்க வேண்டிய இந்தப் பையன், 27ம் தேதியே உலகைப் பிரிந்துவிட்டார். அந்தச் சோகம் நாடு கடந்தும் நம்மைத் தாக்குகிறது!

வாவ்...வளர்த்த பாசம்!

மாதக்கணக்கில் பேசுவார்கள் போல சல்மான் கான் தங்கை அர்பிதா வின் திருமணம் பற்றி. அத்தனை பிரம்மாண்டம். பாலிவுட் சூப்பர் ஸ்டார் சல்மான், அர்பாஸ், சோஹைல் கான்களின் இளைய தங்கையான அர்பிதா, உண்மையில் அவர்களின் சொந்தத் தங்கை அல்ல!

பிளாட்பாரத்தில் வசித்த தன் தாய் இறந்து கிடக்க, அருகில் அமர்ந்து அழுதுகொண்டிருந்த குழந்தை அர்பிதாவை சட்டப்படி தத்தெடுத்துக் கொண்டிருக்கிறது சல்மான் கானின் குடும்பம். அதன்பின் எல்லோருக்கும் அவர் செல்ல தேவதை. பள்ளி முடித்ததும், ‘‘லண்டன் ஸ்கூல் ஆஃப் ஃபேஷனில்தான் படிப்பேன்’’ என அர்பிதா ஆசைப்பட, அதையும் நிறைவேற்றினார்கள். அர்பிதாவுக்கு நடிகரும் தொழிலதிபருமான ஆயுஷோடு காதல். ஆயுஷின் தந்தை இமாசலப் பிரதேச அமைச்சர். பெரிய இடம் என்றாலும் தங்கைக்காகப் பேசி முடித்தார் சல்மான்.

அர்பிதா விருப்பப்படியே ஐதராபாத்தில் உள்ள தாஜ் ஃபலாக்னுமா பேலஸில் திருமணம்... புதுமணத் தம்பதிகள் வாழ 16 கோடி ரூபாயில் வீடு... எல்லாமே ரெடி. அர்பிதாவுக்கு இன்னும் ஓர் ஆசை...

தன் மனம் கவர்ந்த ஹீரோ ஷாருக் கான் கல்யாணத்துக்கு வரவேண்டும் என்று. ஷாருக் - சல்மான் பூசல் உலகம் அறிந்ததே. அதையெல்லாம் மறந்து சல்மான் அழைத்ததும், ஷாருக் வந்து ஆட்டம் போட்டு குதூகலப்படுத்தியதும் நெஞ்சம் கொள்ளாத நெகிழ்ச்சி! சல்மான் நிஜமாகவே சூப்பர் ஹீரோதான்!