மாற்றங்களின் மடியிலிருந்து

*  எல்லா தகவல்களையும்
    அழித்த பின்னரும்
    முன்திரையில்
    கொள்ளையழகு காட்டிச் சிரிக்கிற
    குழந்தையின் புகைப்படத்தை
    என்ன செய்வதென விழிக்கிறான்
    செல்பேசியைக் களவாடியவன்.

*  வரிசையாய்க் கட்டப்பட்டிருக்கும்
    வீடுகளைக் காண்பித்து
    ‘என்ன’வென்று கேட்கிற
    குஞ்சுப் பறவைக்கு
    வயல்வெளிகளைக்
    கொன்று புதைத்துக்
    கட்டிய கல்லறைகள்
    என்று கண்ணீர் உகுக்கிறது
    தாய்ப்பறவை.
    ஆறுவழிச் சாலைகளைத்
    தாண்டுகையில்
*  ஓய்வு வேண்டுகிற
    இணைப் பறவையிடம்
    ‘‘இன்னும் 5 கிலோமீட்டரில்
    டோல்கேட் வந்துவிடும்
    அங்கே நிழலிருக்கும்’’
    எனச் சொல்லிப்
    பறக்கிறது ஆண் பறவை.

*  சொந்த ஊரின்
    பரம்பரை வீடுகளின்
    கழுத்தறுத்து
    ரத்தம் குடித்து
    புஷ்டியாய் வளர்கின்றன
    நகர அடுக்ககப் புது வீடுகள்.

*  எச்சிலிலைகளை விழுங்கி
    வாழ்வாங்கு
    வாழ்ந்து கொண்டிருந்த
    வீதி மாடுகள்
    பிளாஸ்டிக் பேப்பர்களை விழுங்கி
    அற்பாயுளில் உதிர்கின்றன.