‘‘மன்னா, என் அக்கவுன்ட் நம்பர் 5656432879...’’
‘‘என்ன புலவரே இது..?’’
‘‘என் பாடலுக்கான பரிசுத் தொகையை இந்த எண்ணிற்கு நெட் பேங்கிங்கில் ஆர்டிஜிஎஸ் செய்து விடுங்கள் மன்னா!’’

‘‘அமைச்சர் ஆகற மாதிரி கனவு கண்டும் தலைவர் வருத்தமா இருக்காரே... ஏன்?’’
‘‘மூணு நாள் மட்டும் அமைச்சரா இருக்கிற மாதிரிதான் கனவு வந்ததாம்!’’

‘‘ஓட்டலைத் திறந்து வச்ச தலைவர் என்ன கேட்கிறார்..?’’
‘‘ஒரு மாசத்துக்கான சாப்பாடு டோக்கன்..!’’

‘‘நம்ம தலைவர் கட்சி மாறப் போறார்னு
எப்படிச் சொல்றே..?’’
‘‘புதுப்புது கார்ல போற மாதிரி அடிக்கடி கனவு வருதுன்னு சொல்றாரே..!’’

‘‘எதுக்கு தலைவரே பொதுக் கூட்டத்தை ஏ.சி ஹால்ல போட்டிருக்கீங்க..?’’
‘‘வெயிலுக்கு பயந்தாவது கொஞ்சம் தொண்டர்கள் என் பேச்சை கேட்க வரலாமில்லையா... அதான்!’’

என்னதான் எதையும் எதிர்பார்க்கக் கூடாதுன்னாலும், ஏ.டி.எம் மெஷின்ல கார்டைச் சொருகி, பின் நெம்பரை அழுத்திட்டு, பணம் வெளியில வரும்னு எதிர்பார்க்காம இருக்க முடியுமா?
- கடமையைச் செய்து பலனை எதிர்பார்ப்போர் சங்கம்

என்னதான் ஆராய்ச்சி மணியா இருந்தாலும், அதைக் கொண்டு போய் சயின்ஸ் லேப்ல எல்லாம் கட்ட முடியாது!
- ஆராய்ச்சி மணியை அடித்து டாக்டர் பட்டம் வாங்க விரும்புவோர் சங்கம்