ரசனை
முத்தம் வாங்கியபடியே
இசைக்கிறது
புல்லாங்குழல்
- பொ.ராஜா

ஆசை
கீழே கிடந்த
ரூபாயை எடுத்தபோது
எழுந்த ஆசை,
தொலைத்தவனின் துயரத்தை
தூர விரட்டியது
- கே.சிவகணேசன்

உருகுதல்
ஒரு கரத்தில்
ஐஸ்கிரீமை பிடித்துக்கொண்டு
இன்னொரு ஐஸ்கிரீம்
வேண்டுமென்று அழுகிறாள்
அபிக்குட்டி.
அழுகுரல் கேட்டு
உருகி வழிகிறது ஐஸ்கிரீம்
அபிக்குட்டியின்
குட்டி விரல்களிலிருந்து
- ரவிஉதயன்

ஏக்கம்
தூங்கும் குழந்தையின்
அணைப்பிலிருந்து
நழுவிய பொம்மை,
எப்போது கண்விழிக்கும் என
ஏக்கத்தோடு பார்க்கிறது
குழந்தையை
- அ.சுகுமார்

அறிமுகம்
ப்ளேஸ்கூலில் சேரும் குழந்தை
புதுப்புது விளையாட்டுகள்
சொல்லித் தரப் போகிறது
அங்குள்ள டீச்சருக்கு!
- நா.கிருஷ்ணமூர்த்தி

வசீகரம்
கைக்கு எட்டாத உயரத்தில்
வைக்கப்படுவதே
வசீகரிக்கிறது குழந்தையை
- வீ.விஷ்ணுகுமார்