‘‘இன்னைக்கு இந்தியாவில் அதிகளவில் கடற்பசுக்கள் உள்ள பகுதி நம்ம தமிழ்நாடுதான். ஒருகாலத்துல அந்தமான், குஜராத் பகுதிகள்ல அதிகமிருந்தது. ஆனா, இப்ப அரிதாகிடுச்சு. குஜராத்துல ஆறு ஆண்டுகளுக்கு ஒருமுறை பார்த்ததாக அங்குள்ள மீனவர்கள் சொல்றாங்க.

தமிழ்நாட்டைப் பொறுத்தவரை மாசத்திற்கு ஒன்றிரண்டை மீனவர்கள் பார்க்கிறாங்க. அதனால்தான் அதனைப் பாதுகாக்கும் பொருட்டு தமிழ்நாடு அரசு கடந்த 2022ம் ஆண்டு தஞ்சை-புதுக்கோட்டை மாவட்டங்களில் அமைந்த பாக் ஜலசந்தி பகுதியை கடற்பசு காப்பகமாக அறிவிச்சது. 

கடற்பசுக்களுக்காக மட்டுமே வேலை செய்துவரும் ஓர் ஆச்சரிய இளைஞர் இவர். கடந்த 18 ஆண்டுகளாக இவரின் ஓம்கார் ஃபவுண்டேஷன் மூலம் இந்தப் பணியை முன்னெடுத்து வருகிறார்.

காரணம், எங்க கடல் பகுதியில் கடல்வாழ் உயிரினங்கள் வித்தியாசமாக இருந்ததுதான். அதை மற்றவங்களுக்கு சொல்லணும்னு தோணுச்சு. அந்நேரம் என்னுடைய பேராசிரியர் சிவசுப்ரமணியன் சார், எம்.எஸ்சி மரைன் பயாலஜி படிக்கச் சொன்னார்.

காரணம், கடல்குதிரையைப் பத்தி எம்.எஸ்சி அளவில் செய்ய வேண்டிய ஆய்வை நான் பி.எஸ்சி அளவிலேயே செய்திருந்தேன். அப்புறம் எம்.எஸ்சி, எம்.ஃபில், பிஹெச்.டி எல்லாம் முடிச்சேன். படிக்கும்போதே சுற்றுச்சூழல் சம்பந்தமான நிறுவனங்களில் தன்னார்வலராக வேலைகளும் செய்தேன். அப்படியாக பிஹெச்.டி பண்ணும்போது 2007ம் ஆண்டு இந்த ஓம்கார் ஃபவுண்டேஷனை ஆரம்பிச்சேன்.

அதனால், ஒருபக்கம் பாதுகாக்கப்பட்ட உயிரினமாக இருக்குது. இன்னொரு பக்கம் மீனவர்கள் வலையில் மாட்டினால் அவங்க சாப்பிடுறாங்க. அப்போ, முதல்ல நாம் அறிவியல்பூர்வமாக இப்படியொரு உயிரினம் இந்தக் கடல் பகுதியில் நிறைய இருக்குனு அரசுக்கு ஆதாரத்துடன் சொல்லணும்.

அது சாப்பிடக்கூடிய உணவு இந்தப் பகுதியில் அதிகம் விளையுதுனு நிரூபிக்கணும். அப்புறம், வேட்டையாடுவதைத் தடுத்து நிறுத்தணும். இதெல்லாம் சார்ந்து நாங்க வேலைகள் செய்ய ஆரம்பிச்சோம். பிறகு தமிழக வனத்துறையுடனும், மற்ற தன்னார்வ அமைப்புகளுடனும் இணைந்து பள்ளிகள், மீனவ கிராமங்கள்னு போய் ஒவ்வொரு நாளும் விழிப்புணர்வு ஏற்படுத்திட்டு வந்தோம்.    

2011க்குப் பிறகு மத்திய அரசின் அறிவியல் மற்றும் தொழில்நுட்ப அமைச்சகத்திடம் இந்தக் கடலுக்கு அடியில் உள்ள புற்கள் எவ்வளவு இருக்குதுனு அளப்பதற்கு ஒரு புராஜெக்ட் வாங்கினேன். 

இதன் பிறகு 2016ம் ஆண்டு மத்திய அரசின் இந்திய வனவிலங்கு நிறுவனம் வந்தாங்க. அவங்க இந்தியா முழுவதும் இந்தக் கடற்பசு எங்கெங்கு இருக்குனு கண்டுபிடிப்பதும், மக்களிடம் விழிப்புணர்வு செய்றதுமாக இருந்தாங்க. இதனால் கடற்பசு சம்பந்தமான பணிகள் மேலும் வேகமெடுத்தது. 

அப்புறம் மீனவர்கள் கடற்பசுவை சாப்பிடுறதை கொஞ்சம் கொஞ்சமாக நிறுத்தினாங்க. அவங்க வலையில் மாட்டினதும் எங்கள் மூலமாக வனத்துறைக்குத் தகவல் சொன்னாங்க. நாங்களும் கடற்பசுவை விடுவிப்பதற்கான பணிகளைச் செய்தோம். மீனவர்களிடம் மாற்றங்கள் வர ஆரம்பிச்சது. இதனை சாப்பிடக்கூடாதுனு உணர்ந்தாங்க. 

இந்நிலையில் 2021ம் ஆண்டு தமிழ்நாடு வனத்துறை கடற்பசுக்களை பாதுகாக்கணும்னு இந்திய வனவிலங்கு நிறுவனத்துடன் சேர்ந்து பணியாற்றினாங்க. அப்போ, என்னையும் அதில் இணைத்தனர். இதில் ஆராய்ச்சியாளர்கள் ஒன்றிணைந்து எவ்வளவு தூரம் கடற்பசுக்கள் இருக்குதுனு பார்த்தோம்.

அம்மாபட்டினத்தில் இருந்து அதிராமபட்டினம் வரைக்கும் மார்க் செய்தோம். தொடர்ந்து இதற்கான வரைவுத் திட்டம் கொண்டு வரப்பட்டது. பிறகு தமிழ்நாடு அரசு 2022ம் ஆண்டு இதனை கடற்பசு காப்பகமாக அறிவிச்சாங்க. இது மொத்தம் 449 சதுர கிலோமீட்டர் கொண்டது...’’ என்கிறவர், கடற்பசு இங்கே அதிகமாக இருக்கக் காரணம் குறித்தும், நன்மைகள் பற்றியும் பேசினார்.  

அதேபோல் இந்தக் கடற்பசுக்களும் 14 வகையான கடல் புற்களைச் சாப்பிட்டு தொடர்ச்சியாகப் பயணிக்கும்போது அதன் கழிவுகள் மூலமாக விதைகளைப் பரவச் செய்யுது. இதனால், மேலும் கடல் புற்கள் செழிப்பாக வளருது. இந்தக் கடல் புற்களால் என்ன நன்மைனா, இவை கடலுக்கு அடியில் மண் அரிப்பைத் தடுக்கும் ஆற்றல் கொண்டது. 

இப்போ சென்னை உள்ளிட்ட பல்வேறு பகுதிகளில் கடல் அரிப்பு பத்தின செய்திகளைப் பார்த்திருப்பீங்க. ஆனா தஞ்சாவூர், புதுக்கோட்டை, ராமநாதபுரம் பகுதிகளில் இப்படியொரு செய்தி வராது. இதுக்கு முக்கிய காரணம் இந்தப் பகுதியில் கடல் புற்கள் பெரிய அளவில் பரவி இருப்பதுதான்.  அத்துடன் பவளப் பாறைகளும் நிறைய இருக்குது.

இதுதவிர இந்தக் கடல் புற்களுக்குள் நண்டு, சிறிய மீன், இறால், கடல் அட்டை, கடல் குதிரை உள்ளிட்ட சிறிய உயிரினங்கள் வாழும். இவை பெரிய மீன்களிடம் இருந்து தங்களைத் தற்காத்துக் கொள்ள இப்படி புற்செடிகளுக்குள் மறைந்திருக்கும்.இந்தப் புற்களின் இலையின் அடிப்பகுதியில் கணவாய் மீன்கள் முட்டையிடும். 

அதனால் கடல் புற்கள் நன்றாக இருந்தால் அங்கே மீன்களும், நண்டுகளும், இறால்களும் நிறைய உற்பத்தியாகும். எங்க பகுதியில் கணவாய், கொடுவா மீன்கள் நிறைய கிடைக்கும். அதேபோல் நீலக்கால் நண்டு, ஃப்ளவர் ஷ்ரிம்ப்னு சொல்லப்படுற ‘வெள்ளை இறால்’ ஆகியவை இந்தப் பகுதியில் இருந்து நிறைய ஏற்றுமதி ஆகுது. இவை எல்லாவற்றுக்கும் காரணம் கடல் புற்கள்தான்.