சமீபத்தில் தென்கொரியாவில் உள்ள குவாங்சூ நகரில் உலக பாரா வில்வித்தை சாம்பியன்ஷிப் போட்டிகள் நடந்தன. 

இப்போட்டிகளில் 47 நாடுகளைச் சேர்ந்த, 239 பாரா வில்வித்தை வீரர்களும், வீராங்கனைகளும் கலந்துகொண்டனர். இதில் இந்தியாவைச் சேர்ந்த பாரா வில்வித்தை வீராங்கனையான சீத்தல் தேவியும் போட்டியிட்டு, வரலாறு படைத்திருக்கிறார். 

ஜம்மு காஷ்மீரில் உள்ள கிஸ்ட்வார் மாவட்டத்தில் அமைந்திருக்கும் லோய்தர் எனும் ஊரில் பிறந்தவர், சீத்தல் தேவி. பிறக்கும்போதே ‘போக்கோமெலியா’ என்ற அரிய மருத்துவப் பிரச்னையுடன் பிறந்தார். 

அதாவது, சீத்தல் பிறக்கும்போதே அவருக்கு இரண்டு கைகளும் இல்லை. இந்த உடல் ரீதியான குறைபாட்டைத் தகர்த்து, பாரா வில்வித்தையில் பல சாதனைகளைப் படைத்து, வாழ்க்கையில் சாதிக்க நினைப்பவர்களுக்கு ரோல் மாடலாகத் திகழ்கிறார், சீத்தல். 

கடந்த 2019ம் வருடம் கிஸ்ட்வாரில் இந்திய இராணுவம் இளைஞர்களுக்காக ஒரு நிகழ்வை நடத்தியது. அந்த நிகழ்வில் பார்வையாளராக கலந்துகொண்டு, இராணுவத்தின் கவனத்தை ஈர்த்தார். 

ஆனால், அந்தப் பயிற்சியாளர்களுக்குக் கைகள் இல்லாத ஒருவருக்கு வில்வித்தைப் பயிற்சி கொடுத்த அனுபவம் இல்லை. இந்நிலையில் அமெரிக்காவைச் சேர்ந்த மேட் ஸ்டட்ஸ்மேன் என்ற பாரா வில்வித்தை வீரரின் அனுபவங்கள் சீத்தலுக்குப் பயிற்சி கொடுக்க உதவியது. 

ஆம்; சீத்தலைப் போலவே கைகள் இல்லாத வில்வித்தை வீரர், மேட். கடந்த வருடம் நடந்த கோடைகால பாரா ஒலிம்பிக் போட்டியில் பாரா வில்வித்தையில் தங்கப்பதக்கம் வென்றவர் மேட். இதுபோக, ஏராளமான பதக்கங்களை வென்றிருக்கிறார். 

வில்வித்தை மட்டுமல்லாமல் தனது வாழ்க்கையின் அனைத்து செயல்களையும் கால்களின் துணையுடன் மட்டுமே செய்கிறார். இவர் வில்வித்தைப் பயிற்சி செய்யும் விதம், நுணுக்கங்கள் என அனைத்தையும் அறிந்துகொண்டு, சீத்தலுக்குப் பயிற்சியளித்தனர் அந்தப் பயிற்சியாளர்கள். 11 மாதங்களிலேயே கால்களைக் கொண்டு, வில்வித்தை செய்வதை சிறப்பாக கற்றுக்கொண்டார் சீத்தல்.