‘‘இயக்குநர்களுக்கு யாருக்கு படம் செய்கிறோம், அவர்களுடைய ஆடியன்ஸ் எந்த வகையைச் சேர்ந்தவர்கள் என்ற பல்ஸ் தெரிஞ்சிருக்கணும். அடுத்து அவர் இயக்குநரா, ரைட்டரா என்ற புரிதல் இருக்க வேண்டும். ஏனெனில், ரைட்டர் எது வேண்டுமானாலும் கற்பனையில் எழுத முடியும். இயக்குநர் பட்ஜெட்டை மனசுல வெச்சு கதை எழுதணும். அப்போதுதான் படம் மக்களிடம் சென்றடையும். 

இயக்குநர் சரியாக இருந்தால் சினிமா சரியாக இருக்கும்...’’ என்கிறார் அறிமுக இயக்குநர் ராஜநாதன் பெரியசாமி. இவர் நட்டி நடராஜன் ஹீரோவாக நடித்துள்ள ‘கம்பி கட்ன கதை’ படத்தை இயக்கியுள்ளார். தீபாவளி வெளியீடாக வரவுள்ள படம் குறித்து நம்மிடம் பேசினார்.

கதை எழுதி முடிச்சதும் மனசுக்குள் நட்டி சார்தான் தெரிந்தார். நட்டி சாருக்கு தினமும் பல கதைகள் வருகின்றன. ஃபில்டர் பண்ணிதான் படங்கள் செய்கிறார். புது இயக்குநர்களுக்கு நிறைய வாய்ப்பு தருகிறார்.

ஹீரோ என்பதால் கதையை மாத்துற வேலையெல்லாம் பண்ணமாட்டார். ஃபுல் சப்போர்ட் பண்ணுவார். சின்ன சஜஷன் சொல்வதாக இருந்தாலும் டைரக்டர் பர்மிஷன் கேட்டு செய்வார். நான் கவனிச்சவரை பெரிய கேமராமேன், பெரிய நடிகர் என்ற கெத்துடன் எப்பவும் அவர் நடந்துகிட்டதில்ல. 

இயக்குநர் வெற்றி அடையணும், தயாரிப்பாளர் லாபம் அடையணும்... அதுதான் அவர் கண் முன் தெரியும். அதுக்காக கடுமையாக உழைக்கிறார். ‘காசேதான் கடவுளடா’ படத்துல தேங்காய் சீனிவாசன் சார் ஆக்டிங் எப்படி இருந்துச்சோ அதுமாதிரி நட்டி சார் இதுல மிரட்டியிருக்கிறார். 

அவர் ஏற்றுள்ள அறிவானந்தா கேரக்டர் சிரிக்க வைக்கும். நட்டி சாருக்கு ஜோடியாக ஸ்ரீரஞ்சனி. மலையாள நடிகை. ‘கஸ்ஸார் கோல்ட்’ படத்துல அவர் ஆக்டிங் பிரமாதமா இருந்துச்சு. மொழி தெரியலைன்னாலும் பெர்ஃபாமன்ஸுல அடிச்சு நொறுக்கியிருக்கார். இவர்களுடன் முருகானந்தம், சிங்கம்புலி, சாம்ஸ், கோதண்டம் இருக்கிறார்கள்.