மலையேற்றம் என்பது சாகசம் நிறைந்த செயல். அதை எல்லோரும் அவ்வளவு எளிதில் செய்துவிட முடியாது. அதற்குப் போதுமான பயிற்சிகள் அவசியம். சிலர் ஆன்மிகப் பயணமாக கோயில்களில் மலையேறுவது என்பது வேறு விஷயம். 

ஆனால், இளைஞர் கோபாலகிருஷ்ணனின் மலையேற்றம் என்பது இதில் எதிலும் அடங்காது. அவரின் மலையேற்றத்தை, மலை ஓட்டம் என்றே சொல்ல வேண்டும். ஏனெனில், அவர் அப்படித்தான் அந்தச் செங்குத்தான கொண்டரங்கி மலையில் தினமும் ஓடியே ஏறி இறங்குகிறார்.

அதுவும் ஓரிரு முறை அல்ல. நான்கு முறை. தன்னுடைய பெயர் சாதனை புத்தகங்களில் இடம்பெற வேண்டும் என்கிற ஒற்றைக் குறிக்கோளுடன் கடந்த இரண்டு ஆண்டுகளாக இந்தச் சாதனை ஓட்டத்தை அவர் முன்னெடுத்து வருகிறார். 

திண்டுக்கல் மாவட்டம் ஒட்டன்சத்திரத்தில் இருந்து இருபது கிலோமீட்டர் தொலைவில் இருக்கிறது கே.கீரனூர் கிராமம். இங்குள்ள கொண்டரங்கி மலை செங்குத்தான ஒன்று. சுமார் 4 ஆயிரம் படிகள் கொண்டது. முழுக்க பாறைகளால் ஆனது.  

இந்த மலையின் உச்சியில் மல்லிகார்ஜுனா சுவாமி என்ற பிரசித்தி பெற்ற சிவன் கோயிலும் இருக்கிறது. இந்த மலையில் ஒருமுறை ஏறி இறங்கினாலே நமக்கு ஒரு வாரத்திற்கு எழ முடியாத அளவுக்கு சோர்வு வந்திடும். 

ஆனால், சாதனைக்காக இதில் தொடர்ந்து அசால்ட்டாக ஏறி இறங்குகிறார் கோபாலகிருஷ்ணன். ‘‘என்னுடைய டார்கெட் ஆயிரம் நாட்கள். இப்போ, 720 நாட்கள் கடந்திருக்கேன். இன்னும் 280 நாட்கள் ஏறி இறங்கணும்...’’ என உற்சாகமாகப் பேசும் கோபாலகிருஷ்ணன் மழை, வெயில், காற்று என எதையும் பார்ப்பதில்லை. காலநிலை எப்படியிருந்தாலும் தன் சாதனையை தொடர்ந்தபடியே இருக்கிறார். 

‘‘சொந்த ஊர் தாராபுரம் அருகே புத்தூர்னு ஒரு கிராமம். அப்பா, அம்மா இருவருமே கூலி வேலை செய்றாங்க. நான் பி.எஸ்சி இயற்பியல் படிச்சிருக்கேன். போலீஸ் தேர்வுக்காக படிச்சிட்டு இருக்கேன். 

அதுக்காக ஜிம் போய் உடலை ஃபிட்டாக வச்சிட்டு இருந்தேன். இந்த ஜிம் ஃபிட்னஸ்ல கார்டியோ வொர்க்அவுட்னு இருக்கு. அதாவது வாரம் ஒருநாள் உடலையும், இதயத்தையும் பலப்படுத்த ரோட்டுல ஓடுவாங்க. அப்போ, நாம் புதுசா ஏதாவது செய்வோமேனு தோணுச்சு. 

அப்புறம், 2023ம் ஆண்டு நாம் ஏதாவது சாதிக்கணும்னு தோணுச்சு. 

அப்போ, இந்த கொண்டரங்கி மலையில் தொடர்ந்து ஏறி இறங்கினால் என்னனு நினைச்சேன். அதனால், 108 நாட்கள்னு கணக்கு வச்சு ஓடினேன். ஆனா, எனக்குள் அது ஒருவித ஆர்வத்தை ஏற்படுத்துச்சு. அப்படியே ஆயிரம் நாட்கள்னு டார்கெட்டை அமைச்சேன்.   

ஏழு மணியிலிருந்து ஒன்பது மணி வரை ஏறி இறங்குவேன். எங்கேயும் உட்காரவோ, நிற்கவோ மாட்டேன். தண்ணீரும் குடிக்கமாட்டேன். இதனை வீடியோ எடுத்து என் இன்ஸ்டாவுல பதிவிடுவேன். அப்புறம், வீட்டுக்குப்போய் காவலர் தேர்வுக்குப் படிப்பேன். கடந்த ரெண்டு ஆண்டுகளாக என்னுடைய வேலை இப்படித்தான் போயிட்டு இருக்கு. 

இன்றுடன் 720 நாட்களாகிடுச்சு...’’ என சந்தோஷமாகச் சொல்கிற கோபாலகிருஷ்ணன், காலில் ஷூவோ, செருப்போ அணியாமல் வெறும் காலுடனே இந்தச் சாதனையைச் செய்கிறார். அதுமட்டுமில்லாமல் மேல்சட்டையும் அவர் அணிவதில்லை. 

அதுமட்டுமில்லாமல் இப்படி ஓடுறதால் என் உடம்பும் நல்லாயிருக்கு. உடல் ஆற்றல் அதிகரிச்சிருப்பதை நானே பார்க்கிறேன். அந்த நாள் முழுவதும் புத்துணர்ச்சியுடன் இருக்கமுடியுது...’’ என்கிற கோபாலகிருஷ்ணன், தொடர்ந்து பேசினார்.  ‘‘இப்ப இந்தியன் புக் ஆஃப் ரெக்கார்ட்ஸ் இந்தச் சாதனையை எடுத்துக்கிறோம்னு சொல்லியிருக்காங்க. இதில் நான் ஆயிரம் நாட்கள் ஏறினது சாதனையாக மாறுமானு தெரியல. 

ஆனா, 2 மணி நேரத்தில் நான்குமுறை ஏறி இறங்குறேன் இல்லையா... அது சாதனையாக மாறும். அந்த அங்கீகாரமே எனக்குப் போதும். அடுத்து காவலர் தேர்வில் வெற்றி பெறணும். அப்புறம், விளையாட்டுத் துறையில் அதலெட்டிக்ஸில் வாய்ப்பு கிடைத்தால் சாதிக்கணும்னு ஆசையிருக்கு. 

இப்போ, எனக்கு ஒரு அண்ணன் அதலெட்டிக்ஸ்ல கோச்சிங் தர்றேன்னு சொல்லியிருக்காங்க. அடுத்த ஆண்டு ஜூலை மாதம் 16ம் தேதியுடன் இந்த மலையேற்றம் ஆயிரம் நாட்களைத் தொடும்.