உலகின் மிகப்பெரிய பள்ளி!

இந்தியா முழுவதும் சுமார் 15 லட்சம் பள்ளிகள் இயங்கி வருகின்றன. இதில் தனியார் மற்றும் அரசுப் பள்ளிகள் அனைத்தும் அடங்கும். இந்தப் பள்ளிகளில் சுமார் 25 கோடி மாணவ - மாணவிகள் படித்து வருகின்றனர்; 98 லட்சம் ஆசிரியர், ஆசிரியைகளும் பணிபுரிந்து வருகின்றனர். அதே நேரத்தில் ஆசிரியர் மற்றும் மாணவர்களின் பற்றாக்குறை காரணமாக பள்ளிக்கூடங்கள் மூடப்படுவதும் நிகழ்ந்து கொண்டுதான் இருக்கிறது. விஷயம் இதுவல்ல.

உலகிலேயே மிகப்பெரிய பள்ளியும் கூட இந்தியாவுக்குள்தான் இருக்கிறது. ஆம்;  லக்னோவில் இயங்கி வரும் சிட்டி மான்டிசோரி ஸ்கூல் எனும் சிஎம்எஸ் பள்ளிதான் உலகிலேயே மிகப்பெரிய பள்ளி என்று கின்னஸ் சாதனை படைத்திருக்கிறது.

கடந்த ஆகஸ்ட் 2023ல் எடுக்கப்பட்ட கணக்கின் படி, சிஎம்எஸ் பள்ளியில் 61,345 மாணவ - மாணவிகள் படித்து வந்தனர். இப்போது 65 ஆயிரம் மாணவ - மாணவிகள் படிக்கின்றனர். 3,500 ஆசிரியர், ஆசிரியைகள் மற்றும் அலுவலர்கள் இப்பள்ளியில் பணிபுரிந்து வருகின்றனர். சுமார் 3900 மாணவ - மாணவிகள் பொதுத்தேர்வில் 90 சதவீதத்துக்கும் அதிகமான மதிப்பெண்களைப் பெற்றுள்ளனர்.